କେନ୍ଦ୍ରାପଡ଼ାରେ ଆରମ୍ଭ ହୋଇଛି ବହୁ ପ୍ରତୀକ୍ଷିତ ଗଜଲକ୍ଷ୍ମୀ ପୂଜା। ମା’ ଲକ୍ଷ୍ମୀଙ୍କ ଆଗମନ ସହ ସମଗ୍ର ସହର ଉତ୍ସବର ରଙ୍ଗରେ ରଙ୍ଗିନ ହୋଇଛି। ବିଭିନ୍ନ ସ୍ଥାନରେ ଆକର୍ଷଣୀୟ ତୋରଣ, ଆଲୋକସଜ୍ଜା ଓ ସୁନ୍ଦର ମଣ୍ଡପ ଭକ୍ତଙ୍କୁ ଆକୃଷ୍ଟ କରୁଛି।

ଚଳିତବର୍ଷ କେନ୍ଦ୍ରାପଡ଼ା ସହରର ୬୮ଟି ପୂଜା ମଣ୍ଡପରେ ଗଜଲକ୍ଷ୍ମୀ ପୂଜା ଆୟୋଜିତ ହେଉଥିବା ବେଳେ ଆଖପାଖ ଅଞ୍ଚଳରେ ମଧ୍ୟ ୧୦୦ରୁ ଅଧିକ ମଣ୍ଡପରେ ମା’ଙ୍କ ଆରାଧନା କରାଯାଉଛି। ମାଧିଆଳ ଅଞ୍ଚଳର ଗଙ୍ଗା ଭାଗୀରଥୀ ପୂଜା ମଣ୍ଡପରେ ସୁନା ମୁକୁଟ ଓ ଚମତ୍କାର ରୁପା ପଛପଟ ସଜ୍ଜାରେ ମା’ଙ୍କ ପ୍ରତିମା ବିଶେଷ ଆକର୍ଷଣ ପାଲଟିଛି।

ପୁରାଣ ଓ ପରମ୍ପରା ଅନୁସାରେ ସମୁଦ୍ର ମନ୍ଥନ ସମୟରେ ମା’ ଲକ୍ଷ୍ମୀଙ୍କ ଆବିର୍ଭାବ ହୋଇଥିଲା। ଆଶ୍ୱିନ ମାସର ପୂର୍ଣ୍ଣିମା ତିଥିରେ ମା’ଙ୍କ ଆରାଧନା କରାଯାଇ ସମୃଦ୍ଧି, ଧନ-ସମ୍ପଦ ଓ କଲ୍ୟାଣ ପାଇଁ ଭକ୍ତମାନେ ପ୍ରାର୍ଥନା କରନ୍ତି।

ଗଜଲକ୍ଷ୍ମୀ ପୂଜା ଅବସରରେ କେନ୍ଦ୍ରାପଡ଼ାରେ ଭକ୍ତଙ୍କ ଭିଡ଼କୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ମଧ୍ୟ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ସହରର ବିଭିନ୍ନ ସ୍ଥାନରେ ପ୍ରାୟ ୨୫ ପ୍ଲାଟୁନ୍ ପୁଲିସ୍ ମୁତୟନ କରାଯାଇଥିବା ସହ ସମ୍ବେଦନଶୀଳ ସ୍ଥାନଗୁଡ଼ିକ ଉପରେ CCTV ମାଧ୍ୟମରେ ନଜର ରଖାଯାଉଛି।

ସାତ ଦିନିଆ ଏହି ଉତ୍ସବରେ ପରିବାର ଓ ସମ୍ପର୍କୀୟଙ୍କ ସହ ଭକ୍ତମାନେ ବିଭିନ୍ନ ମଣ୍ଡପ ବୁଲି ମା’ଙ୍କ ଦର୍ଶନ କରୁଛନ୍ତି। ମା’ ଗଜଲକ୍ଷ୍ମୀଙ୍କ ଆଗମନରେ କେନ୍ଦ୍ରାପଡ଼ାରେ ଭକ୍ତି ଓ ଉତ୍ସବର ମାହୋଲ ସୃଷ୍ଟି ହୋଇଛି।