କର୍ଣ୍ଣାଟକରେ ଏଚଆଇଭି ସଂକ୍ରମଣକୁ ନେଇ ଚିନ୍ତା ବଢ଼ିଥିବା ବେଳେ ରାଜ୍ୟ ସରକାର ଏକ ବଡ଼ ପଦକ୍ଷେପ ନେଇଛନ୍ତି। କର୍ଣ୍ଣାଟକ ଷ୍ଟେଟ୍ ଏଡ୍ସ ପ୍ରିଭେନସନ୍ ସୋସାଇଟି (KSAPS) ଏବଂ ବିଶ୍ୱେଶ୍ୱରୟା ଟେକ୍ନୋଲଜିକାଲ୍ ୟୁନିଭର୍ସିଟି (VTU)ର ସହଯୋଗରେ ରାଜ୍ୟର ସମସ୍ତ କଲେଜରେ ଏଚଆଇଭି ସଚେତନତା ଓ ସ୍ୱଇଚ୍ଛିକ ସ୍କ୍ରିନିଂ କ୍ୟାମ୍ପ ଆୟୋଜନ କରାଯିବ।

ସ୍ୱାସ୍ଥ୍ୟ ବିଭାଗର ତଥ୍ୟ ଅନୁଯାୟୀ, ୧୮ରୁ ୩୫ ବର୍ଷ ବୟସ ବର୍ଗରେ ଏଚଆଇଭି ସଂକ୍ରମଣ ହାର ବଢ଼ୁଛି। ଏହାକୁ ଦୃଷ୍ଟିରେ ରଖି ଯୁବପିଢ଼ିଙ୍କ ମଧ୍ୟରେ ସଚେତନତା ସୃଷ୍ଟି, ସମୟୋପଯୋଗୀ ପରୀକ୍ଷା ଓ ପରାମର୍ଶ ପ୍ରଦାନ କରିବା ଲକ୍ଷ୍ୟ ରଖାଯାଇଛି।

ଏହି ସ୍ୱାସ୍ଥ୍ୟ ଶିବିରଗୁଡ଼ିକରେ ଏଚଆଇଭି ସ୍କ୍ରିନିଂ ସହ ହେପାଟାଇଟିସ୍-ବି, ସିଫିଲିସ୍ ଭଳି ରୋଗ ସମ୍ପର୍କରେ ମଧ୍ୟ ସଚେତନତା ସୃଷ୍ଟି କରାଯିବ। ଛାତ୍ରଛାତ୍ରୀଙ୍କ ପାଇଁ କ୍ୟୁଆର କୋଡ୍ ଆଧାରିତ ସେଲ୍ଫ-ରିସ୍କ ଆସେସମେଣ୍ଟ ସୁବିଧା ମଧ୍ୟ ଉପଲବ୍ଧ ହେବ।

ଭିଟିୟୁ ପକ୍ଷରୁ ସ୍ପଷ୍ଟ କରାଯାଇଛି ଯେ, ଏଚଆଇଭି ପରୀକ୍ଷା କୌଣସି ଛାତ୍ରଛାତ୍ରୀଙ୍କ ପାଇଁ ବାଧ୍ୟତାମୂଳକ ନୁହେଁ। ଏହା ସମ୍ପୂର୍ଣ୍ଣ ସ୍ୱଇଚ୍ଛିକ ହେବ ଏବଂ ସମସ୍ତ ପରୀକ୍ଷା ଓ ରିପୋର୍ଟକୁ ଗୋପନୀୟ ରଖାଯିବ।

ବିଶେଷଜ୍ଞମାନଙ୍କ ମତରେ, ଏଚଆଇଭି ସମ୍ପର୍କରେ ଥିବା ଭ୍ରାନ୍ତି ଓ ସାମାଜିକ କଳଙ୍କ ଦୂର କରିବା ପାଇଁ ଏପରି ସଚେତନତା ଅଭିଯାନ ଅତ୍ୟନ୍ତ ଜରୁରୀ। ଆସନ୍ତା ଆଠ ମାସ ଧରି ପର୍ଯ୍ୟାୟକ୍ରମେ ଏହି କାର୍ଯ୍ୟକ୍ରମ ଚାଲିବ ବୋଲି ସୂଚନା ମିଳିଛି।