ଓଡ଼ିଶାରେ ଲଗାଣ ବର୍ଷା ଜନଜୀବନକୁ ପ୍ରଭାବିତ କରୁଥିବା ବେଳେ କେନ୍ଦୁଝର ଜିଲ୍ଲାରୁ ଏକ ଚିନ୍ତାଜନକ ଖବର ସାମ୍ନାକୁ ଆସିଛି। ବୈତରଣୀ ନଦୀ ଉପରେ ନିର୍ମାଣାଧୀନ କାନପୁର ଡ୍ୟାମର ଅସ୍ଥାୟୀ କଫର ଡ୍ୟାମ ଗୁରୁବାର ସକାଳ ପ୍ରାୟ ୮ଟା ସମୟରେ ଭାଙ୍ଗିଯାଇଛି।

ସୂଚନା ଅନୁଯାୟୀ, ଭାରି ବର୍ଷା କାରଣରୁ ବୈତରଣୀ ନଦୀରେ ହଠାତ୍ ଜଳପ୍ରବାହ ବଢ଼ିଥିଲା। ଏହାର ଚାପରେ କେନ୍ଦୁଝର ଜିଲ୍ଲାର କୋଣ୍ଡରା ଗାଁ ନିକଟରେ ଥିବା କଫର ଡ୍ୟାମ ଭାଙ୍ଗିଯାଇଥିଲା। ଏହି କଫର ଡ୍ୟାମଟି ଡ୍ୟାମର ସ୍ପିଲୱେ ନିର୍ମାଣ କାମ ପାଇଁ ଅସ୍ଥାୟୀ ଭାବେ ନିର୍ମାଣ କରାଯାଇଥିଲା।

ଘଟଣା ପରେ ଜିଲ୍ଲା ପ୍ରଶାସନ ତୁରନ୍ତ ସତର୍କତା ଅବଲମ୍ବନ କରି ବୈତରଣୀ ନଦୀର ତଳମୁଣ୍ଡରେ ଥିବା ଗ୍ରାମଗୁଡ଼ିକର ଲୋକଙ୍କୁ ସତର୍କ ରହିବାକୁ ପରାମର୍ଶ ଦେଇଛି। ନଦୀ ନିକଟକୁ ନ ଯିବା, ନଦୀ ପାର ନ କରିବା ଏବଂ ନଦୀରେ ପ୍ରବେଶ ନ କରିବାକୁ ମଧ୍ୟ ପ୍ରଶାସନ ପକ୍ଷରୁ ନିବେଦନ କରାଯାଇଛି।

ବୁଧବାର ଚମ୍ପୁଆ ଉପଜିଲ୍ଲାପାଳ, ବଡ଼ବିଲ ତହସିଲଦାର ଓ ଡ୍ୟାମ କର୍ତ୍ତୃପକ୍ଷ ପ୍ରକଳ୍ପ ସ୍ଥଳ ପରିଦର୍ଶନ କରି ପରିସ୍ଥିତିର ସମୀକ୍ଷା କରିଥିଲେ।

ପ୍ରଶାସନ ପକ୍ଷରୁ ଲୋକଙ୍କୁ ଅଫବାହରେ କାନ ନ ଦେବାକୁ ଏବଂ କେବଳ ସରକାରୀ ସୂଚନା ଉପରେ ଭରସା କରିବାକୁ ଅପିଲ କରାଯାଇଛି। ଜଳସ୍ତର ବୃଦ୍ଧି ପାଉଥିବାରୁ କାନପୁର ଡ୍ୟାମର ୬ଟି ଗେଟ୍ ଖୋଲା ରହିଛି। ପରିସ୍ଥିତି ଉପରେ ପ୍ରଶାସନ ନଜର ରଖିଥିବା ବେଳେ ତଳିଆ ଅଞ୍ଚଳର ଲୋକଙ୍କୁ ସତର୍କ ରହିବାକୁ କୁହାଯାଇଛି।