କୃତ୍ରିମ ବୁଦ୍ଧିମତା (AI) କ୍ଷେତ୍ରରେ ବିଶ୍ୱସ୍ତରରେ ବଢ଼ୁଥିବା ପ୍ରତିଯୋଗିତା ମଧ୍ୟରେ ବ୍ରିଟେନ ସରକାର ଏକ ବଡ଼ ପଦକ୍ଷେପ ନେଇଛି। ନୂଆ ପ୍ରଧାନମନ୍ତ୍ରୀ ଆଣ୍ଡି ବର୍ଣ୍ଣହାମ୍‌ ଭାରତୀୟ ବଂଶୋଦ୍ଭବ ସାଂସଦ କନିଷ୍କ ନାରାୟଣଙ୍କୁ କ୍ୟାବିନେଟ୍‌ ସ୍ତରର ଏଆଇ ମନ୍ତ୍ରୀ ଭାବେ ନିଯୁକ୍ତ କରିଛନ୍ତି।

କନିଷ୍କ ନାରାୟଣ ପୂର୍ବରୁ ଆର୍ଟିଫିସିଆଲ ଇଣ୍ଟେଲିଜେନ୍ସ ଏବଂ ଅନଲାଇନ୍ ସୁରକ୍ଷା କ୍ଷେତ୍ରରେ କାର୍ଯ୍ୟ କରିଆସୁଥିଲେ। ବର୍ତ୍ତମାନ କ୍ୟାବିନେଟ୍‌ରେ ସ୍ଥାନ ପାଇବା ପରେ ଦେଶର ଏଆଇ ନୀତି, ପ୍ରଯୁକ୍ତି ବିକାଶ ଓ ଡିଜିଟାଲ ସୁରକ୍ଷା ସମ୍ବନ୍ଧୀୟ ବଡ଼ ବଡ଼ ନିଷ୍ପତ୍ତିରେ ତାଙ୍କର ସିଧାସଳଖ ଭୂମିକା ରହିବ।

ବର୍ତ୍ତମାନ ସମୟରେ ଏଆଇର ବ୍ୟବହାର ଦ୍ରୁତ ଗତିରେ ବଢ଼ୁଛି। ସରକାରୀ ପ୍ରଶାସନଠାରୁ ଆରମ୍ଭ କରି ଶିଳ୍ପ, ଶିକ୍ଷା, ସ୍ୱାସ୍ଥ୍ୟ ଓ ବ୍ୟବସାୟ କ୍ଷେତ୍ର ପର୍ଯ୍ୟନ୍ତ ଏଆଇର ପ୍ରଭାବ ବଢ଼ିବାରୁ ବ୍ରିଟେନ ସରକାର ଏହି କ୍ଷେତ୍ରକୁ ସ୍ୱତନ୍ତ୍ର ଗୁରୁତ୍ୱ ଦେଉଛି।

ଗତ କିଛି ବର୍ଷ ଧରି ବ୍ରିଟେନ ନିଜକୁ ବିଶ୍ୱର ଏକ ପ୍ରମୁଖ AI Hub ଭାବେ ଗଢ଼ି ତୋଳିବାକୁ ପ୍ରୟାସ ଜାରି ରଖିଛି। ଗୁଗୁଲ୍ ଡିପ୍‌ମାଇଣ୍ଡ ଭଳି ଅଗ୍ରଣୀ ଏଆଇ କମ୍ପାନୀ ଏଠାରେ କାର୍ଯ୍ୟ କରୁଛନ୍ତି। ସରକାର ଏଆଇ ଷ୍ଟାର୍ଟଅପ୍‌, ଗବେଷଣା, ଡାଟା ସେଣ୍ଟର ଏବଂ ନୂତନ ପ୍ରଯୁକ୍ତି ଭିତ୍ତିଭୂମିରେ ବ୍ୟାପକ ନିବେଶ କରୁଛି। AI Growth Zones ଏବଂ Sovereign AI Fund ଭଳି ପ୍ରକଳ୍ପ ଏହି ଯୋଜନାର ମୁଖ୍ୟ ଅଂଶ।

କିଏ ଏହି କନିଷ୍କ ନାରାୟଣ?

କନିଷ୍କ ନାରାୟଣ ଭାରତୀୟ ବଂଶୋଦ୍ଭବ ଏବଂ ବ୍ରିଟେନର ଲେବର୍ ପାର୍ଟିର ଜଣେ ପ୍ରମୁଖ ନେତା। ତାଙ୍କ ପରିବାରର ମୂଳ ଭାରତ ସହ ଜଡ଼ିତ ଥିବାବେଳେ ସେ ବ୍ରିଟେନର ରାଜନୀତିରେ ସକ୍ରିୟ। ୨୦୨୪ରେ ୱେଲ୍ସର ଭେଲ୍ ଅଫ୍ ଗ୍ଲାମୋର୍ଗାନ୍ ଆସନରୁ ସେ ସାଂସଦ ଭାବେ ନିର୍ବାଚିତ ହୋଇଥିଲେ।

୨୦୨୫ରେ ତାଙ୍କୁ ଏଆଇ ଏବଂ ଅନଲାଇନ୍ ସୁରକ୍ଷା ମନ୍ତ୍ରୀ କରାଯାଇଥିଲା। ବର୍ତ୍ତମାନ ପ୍ରଧାନମନ୍ତ୍ରୀ ଆଣ୍ଡି ବର୍ଣ୍ଣହାମ୍‌ ତାଙ୍କୁ ପଦୋନ୍ନତି ଦେଇ କ୍ୟାବିନେଟ୍‌ରେ ସ୍ଥାନ ଦେଇଛନ୍ତି, ଯାହା ବ୍ରିଟେନର ଏଆଇ ନୀତିକୁ ଆହୁରି ଶକ୍ତିଶାଳୀ କରିବାର ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ଦେଖାଯାଉଛି।