ଇସ୍ରାଏଲ ଓ ଲେବାନନ୍ ମଧ୍ୟରେ ଚାଲିଥିବା ଅସ୍ତ୍ରବିରତି ସତ୍ତ୍ୱେ ପରିସ୍ଥିତି ତିବ୍ର ହୋଇଯାଇଛି। ଦକ୍ଷିଣ ଲେବାନନ୍ରେ ଇସ୍ରାଏଲ ପକ୍ଷରୁ ଏୟାର ଷ୍ଟ୍ରାଇକ୍ କରାଯାଇଥିବାରୁ ଅସ୍ତ୍ରବିରତି ଉଲ୍ଲଂଘନ ଅଭିଯୋଗ ଉଠିଛି।

ଏହି ଆକ୍ରମଣରେ ଜଣେ ମହିଳା ସାମ୍ବାଦିକଙ୍କ ସମେତ ମୋଟ ୫ ଜଣଙ୍କ ମୃତ୍ୟୁ ଘଟିଛି। ଏହା ଅଞ୍ଚଳରେ ଭୟ ଓ ଅସ୍ଥିରତାକୁ ବଢ଼ାଇଦେଇଛି ଏବଂ ଅସ୍ତ୍ରବିରତି ଚୁକ୍ତି ଉପରେ ପ୍ରଶ୍ନ ଉଠାଇଛି।

ରିପୋର୍ଟ ଅନୁସାରେ, ପ୍ରଥମ ଆକ୍ରମଣ ଦକ୍ଷିଣ ଲେବାନନ୍ର ଆଟ୍-ତିରି ଗାଁରେ ଏକ ଯାନକୁ ଲକ୍ଷ୍ୟ କରି କରାଯାଇଥିଲା। ଏହି ଆକ୍ରମଣରେ ଗାଡ଼ି ଭିତରେ ଥିବା ଦୁଇଜଣଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ଘଟଣାସ୍ଥଳକୁ ପହଞ୍ଚିଥିବା ସାମ୍ବାଦିକମାନେ ମଧ୍ୟ ଧମକର ସମ୍ମୁଖୀନ ହୋଇଥିବା ଅଭିଯୋଗ ରହିଛି।

ଇସ୍ରାଏଲୀ ପ୍ରତିରକ୍ଷା ବାହିନୀ (IDF) ଏହି ଆକ୍ରମଣକୁ ନ୍ୟାୟସଙ୍ଗତ ବୋଲି କହିଛି। ସେମାନଙ୍କ ଅନୁସାରେ, ହେଜବୁଲ୍ଲା ଦଳ ଅସ୍ତ୍ରବିରତି ଉଲ୍ଲଂଘନ କରୁଥିଲା ଏବଂ ସେମାନଙ୍କ ଏକ ଘାଟିରୁ ବାହାରୁଥିବା ଯାନକୁ ଲକ୍ଷ୍ୟ କରି ଏହି ଆକ୍ରମଣ କରାଯାଇଥିଲା।

ସେନା କହିଛି ଯେ ଦକ୍ଷିଣ ଲେବାନନ୍ର ସାଲୁକି ଅଞ୍ଚଳରେ ଦୁଇଜଣ ହେଜବୁଲ୍ଲା ସଦସ୍ୟ ଫରୱାର୍ଡ ଡିଫେନ୍ସ ଲାଇନ୍ ପାର କରି ଇସ୍ରାଏଲୀ ସେନାଙ୍କ ନିକଟକୁ ଆସିଥିଲେ। ସମ୍ଭାବ୍ୟ ବିପଦକୁ ରୋକିବା ପାଇଁ ବିମାନ ଆକ୍ରମଣ କରାଯାଇଥିବା ବୋଲି IDF ଦାବି କରିଛି।

ଅନ୍ୟପଟେ, ଲେବାନନ୍ ଅଭିଯୋଗ କରିଛି ଯେ ଉଦ୍ଧାର କାର୍ଯ୍ୟ ଚାଲିଥିବା ସମୟରେ ମଧ୍ୟ ଇସ୍ରାଏଲ ପୁଣି ଆକ୍ରମଣ କରିଥିଲା, ଯାହା ଅସ୍ତ୍ରବିରତି ଉଲ୍ଲଂଘନର ଗୁରୁତର ଉଦାହରଣ।

ଏହି ଘଟଣା ପ୍ରମାଣ କରୁଛି ଯେ ଅସ୍ତ୍ରବିରତି ସତ୍ତ୍ୱେ ମଧ୍ୟ ଅଞ୍ଚଳରେ ଉତ୍ତେଜନା କମିନାହିଁ ଏବଂ ଆଗାମୀ ଦିନରେ ସଂଘର୍ଷ ଆହୁରି ତିବ୍ର ହେବାର ସମ୍ଭାବନା ରହିଛି।