୫୦ ବର୍ଷ ବୟସରେ ଚାକିରି ଛାଡ଼ି ଆର୍ଥିକ ଚିନ୍ତାମୁକ୍ତ ଜୀବନ ବିତାଇବା—ଏବେ ଅନେକ ସହରୀ ଭାରତୀୟଙ୍କ ସ୍ୱପ୍ନ। କିନ୍ତୁ ଏହି ସ୍ୱପ୍ନ ଓ ବାସ୍ତବ ସଞ୍ଚୟ ମଧ୍ୟରେ ଏକ ବଡ଼ ଫାରାକ ରହିଛି।

Axis Max Life ଏବଂ Kantar ପକ୍ଷରୁ କରାଯାଇଥିବା IRIS 6.0 ଅଧ୍ୟୟନ ଅନୁସାରେ, ପ୍ରାୟ ୭୦% ସହରୀ ଭାରତୀୟ ପାରମ୍ପରିକ ୫୮-୬୦ ବର୍ଷ ବୟସ ପୂର୍ବରୁ ଅବସର ନେବାକୁ ଆକର୍ଷଣୀୟ ବୋଲି ମନେ କରନ୍ତି। ଏମାନଙ୍କ ମଧ୍ୟରୁ ପ୍ରାୟ ଅର୍ଦ୍ଧେକ ୫୦ ବର୍ଷ ପୂର୍ବରୁ Financial Independence and Retire Early (FIRE) ଲକ୍ଷ୍ୟ ରଖିଛନ୍ତି।

ତେବେ ସମସ୍ୟା ହେଉଛି ସଞ୍ଚୟ। ଅଧ୍ୟୟନ ଅନୁଯାୟୀ, ସହରୀ ଭାରତୀୟମାନେ ହାରାହାରି ନିଜ ଲକ୍ଷ୍ୟ ରିଟାୟରମେଣ୍ଟ କର୍ପସର ମାତ୍ର ୨୮% ହାସଲ କରିଛନ୍ତି। ଅର୍ଥାତ୍‌ ଅବସର ପୂର୍ବରୁ ଆବଶ୍ୟକ ଆର୍ଥିକ ସୁରକ୍ଷା ଗଢ଼ିବାରେ ଏବେବି ବଡ଼ ଅନ୍ତର ରହିଛି।

ପ୍ରଥମ ଦରମାରୁ ଅବସର ପାଇଁ ଯୋଜନା

ଅଧ୍ୟୟନରେ ପ୍ରତି ୨ ଜଣରୁ ୧ ଜଣ କହିଛନ୍ତି ଯେ ପ୍ରଥମ ଦରମା ମିଳିବା ସମୟରୁ ରିଟାୟରମେଣ୍ଟ ପ୍ଲାନିଂ ଆରମ୍ଭ କରିବା ଉଚିତ। ଉତ୍ତରଦାତାମାନେ ହାରାହାରି ୩୧ ବର୍ଷ ବୟସରେ ଅବସର ପାଇଁ ସଞ୍ଚୟ ଆରମ୍ଭ କରିବା ଉଚିତ ବୋଲି କହିଛନ୍ତି। Gen Z ପାଇଁ ଏହି ବୟସ ଆହୁରି କମି ୨୯ ବର୍ଷ ହୋଇଛି।

ଅବସର ପାଇଁ ନିବେଶ ଆରମ୍ଭ କରିଥିବା Gen Zଙ୍କ ହାର ପ୍ରାୟ ୬୨%, Millennialsଙ୍କ ୭୦% ଏବଂ Gen X+ଙ୍କ ୭୫% ବୋଲି ଅଧ୍ୟୟନରେ ଦର୍ଶାଯାଇଛି।

ଟଙ୍କା ଅଛି, କିନ୍ତୁ ଯଥେଷ୍ଟ କି?

ପ୍ରାୟ ୬୧% ଉତ୍ତରଦାତା କହିଛନ୍ତି ଯେ ଅବସର ପରେ ବର୍ତ୍ତମାନର ଜୀବନଶୈଳୀ ବଜାୟ ରଖିବା ପାଇଁ କେତେ ଟଙ୍କା ଆବଶ୍ୟକ ହେବ, ସେମାନେ ଜାଣନ୍ତି।

କିନ୍ତୁ ମାତ୍ର ୧୧% ଲୋକ ନିଶ୍ଚିତ ଯେ ସେମାନଙ୍କ ରିଟାୟରମେଣ୍ଟ କର୍ପସ ସାରା ଜୀବନ ପର୍ଯ୍ୟନ୍ତ ଚାଲିବ। ଅନ୍ୟପଟେ ୩୯% ଲୋକଙ୍କ ଆଶଙ୍କା, ସେମାନଙ୍କ

ସଞ୍ଚୟ ୫ ବର୍ଷ ମଧ୍ୟରେ ଶେଷ ହୋଇପାରେ।

ଅବସର ନିକଟରେ ଥିବା ଲୋକଙ୍କ ଅନୁଭବ

୪୫ ବର୍ଷରୁ ଅଧିକ ବୟସର Gen X+ ଉତ୍ତରଦାତାଙ୍କ ମଧ୍ୟରୁ ୯୧% କହିଛନ୍ତି ଯେ ସେମାନେ ରିଟାୟରମେଣ୍ଟ ପାଇଁ ଆଗରୁ ନିବେଶ ଆରମ୍ଭ କରିନଥିବାରୁ ଏବେ ଅନୁତାପ କରୁଛନ୍ତି। ସେହିପରି ୮୨% ଲୋକ କହିଛନ୍ତି ଯେ ନିୟମିତ ଆୟର ଆବଶ୍ୟକତା ଥିବାରୁ ସେମାନଙ୍କୁ ଆହୁରି କିଛି ସମୟ କାମ କରିବାକୁ ପଡ଼ିପାରେ।

୫୦ ବର୍ଷରେ ଅବସର ନେବାର ଅର୍ଥ ହେଉଛି ଚାକିରିରୁ ଆୟ ବନ୍ଦ ହେବା ପରେ ଆହୁରି ଦୀର୍ଘ ସମୟ ପର୍ଯ୍ୟନ୍ତ ସଞ୍ଚୟ ଉପରେ ନିର୍ଭର କରିବା। ଏହା ସହିତ ମୁଦ୍ରାସ୍ଫୀତି, ସ୍ୱାସ୍ଥ୍ୟ ଖର୍ଚ୍ଚ ଏବଂ ଅନ୍ୟାନ୍ୟ ଦୀର୍ଘମିଆଦୀ ଖର୍ଚ୍ଚକୁ ମଧ୍ୟ ହିସାବରେ ରଖିବାକୁ ପଡ଼େ।

ତେଣୁ ଭାରତୀୟମାନଙ୍କ ମଧ୍ୟରେ Early Retirement ଏବଂ FIRE ପ୍ରତି ଆଗ୍ରହ ବଢ଼ୁଥିବା ବେଳେ, ଏହାକୁ ବାସ୍ତବରେ ପରିଣତ କରିବା ପାଇଁ ଦୀର୍ଘମିଆଦୀ ସଞ୍ଚୟ ଓ ନିବେଶର ଭୂମିକା ଗୁରୁତ୍ୱପୂର୍ଣ୍ଣ ହୋଇଛି।