ନୂଆଦିଲ୍ଲୀ: ଭାରତୀୟ ସେନା ନିଜର ଡ୍ରୋନ୍ କ୍ଷମତାକୁ ଆହୁରି ମଜବୁତ କରିବା ଦିଗରେ ବଡ଼ ପଦକ୍ଷେପ ନେଇଛି। ସେନା ୨୨୫ଟି First-Person View (FPV) ଡ୍ରୋନ୍ ପାଇଁ ଅର୍ଡର ଦେଇଛି। ପ୍ରତିରକ୍ଷା କ୍ଷେତ୍ରରେ ସ୍ୱଦେଶୀ ଓ ଶୀଘ୍ର ମୁତୟନଯୋଗ୍ୟ ଡ୍ରୋନ୍ ପ୍ରଣାଳୀର ବ୍ୟବହାର ବଢ଼ାଇବା ଦିଗରେ ଏହାକୁ ଏକ ବଡ଼ ପଦକ୍ଷେପ ଭାବେ ଦେଖାଯାଉଛି।

ଏହି ଡ୍ରୋନ୍‌ଗୁଡ଼ିକର ଚୟନ ପୂର୍ବରୁ କଠୋର ପ୍ରତିଯୋଗିତାମୂଳକ ମୂଲ୍ୟାୟନ ଓ ଫିଲ୍ଡ ଟ୍ରାଏଲ୍ କରାଯାଇଥିଲା। ବିଶେଷ ଭାବେ ହିମାଳୟରେ ୧୭,୫୦୦ ଫୁଟ୍ ପର୍ଯ୍ୟନ୍ତ ଉଚ୍ଚତାରେ ଏହାର କାର୍ଯ୍ୟକ୍ଷମତା ପରୀକ୍ଷା କରାଯାଇଥିଲା। ଟ୍ରାଏଲ୍‌ରେ ଡ୍ରୋନ୍‌ର endurance, accuracy, speed ଏବଂ ବିଭିନ୍ନ କାର୍ଯ୍ୟକ୍ଷମତା ମାପଦଣ୍ଡ ଯାଞ୍ଚ କରାଯାଇଥିଲା। 

ଏହି ଅର୍ଡର Aerodrone Robotics Pvt Ltdକୁ ଦିଆଯାଇଥିବା ରିପୋର୍ଟ ରହିଛି। କମ୍ପାନୀର ସିଷ୍ଟମ୍‌ଗୁଡ଼ିକୁ କଠିନ ଉଚ୍ଚତା ଓ ଫିଲ୍ଡ ପରିସ୍ଥିତିରେ ପରୀକ୍ଷା କରାଯାଇଥିଲା। ସଫଳ ଟ୍ରାଏଲ୍ ପରେ ଏବେ ଏହି ପ୍ରଣାଳୀ ସେନାର ଉପକରଣ ତାଲିକାରେ ସାମିଲ ହେବ। 

କାହିଁକି FPV ଡ୍ରୋନ୍ ଉପରେ ଗୁରୁତ୍ୱ?

ଆଧୁନିକ ଯୁଦ୍ଧ ପରିସ୍ଥିତିରେ ଛୋଟ, ଦ୍ରୁତ ଏବଂ ଶୀଘ୍ର ମୁତୟନ କରାଯାଇପାରୁଥିବା unmanned systemsର ଗୁରୁତ୍ୱ ବଢ଼ିଛି। FPV ଏବଂ ଅନ୍ୟ ଛୋଟ ଡ୍ରୋନ୍‌ଗୁଡ଼ିକ କମ୍ପାକ୍ଟ ହେବା ସହ ଦୁର୍ଗମ ଅଞ୍ଚଳରେ ମଧ୍ୟ ବିଭିନ୍ନ ମିଶନ୍‌ରେ ବ୍ୟବହାରଯୋଗ୍ୟ।

ଭାରତୀୟ ସେନା ମଧ୍ୟ ନିଜର ଡ୍ରୋନ୍ କ୍ଷମତାକୁ କେବଳ ପରୀକ୍ଷା କିମ୍ବା ଡେମୋ ପର୍ଯ୍ୟାୟରେ ରଖିବା ପରିବର୍ତ୍ତେ ଫିଲ୍ଡ ୟୁନିଟ୍‌ଗୁଡ଼ିକ ପର୍ଯ୍ୟନ୍ତ ବିସ୍ତାର କରିବା ଦିଗରେ ଆଗକୁ ବଢ଼ୁଛି। ରିପୋର୍ଟ ଅନୁସାରେ, ସେନାର ପ୍ରାୟ ୪୦୦ଟି ଇନ୍‌ଫାଣ୍ଟ୍ରି ବାଟାଲିୟନ୍‌ରେ ଡ୍ରୋନ୍ ଅପରେସନ୍ ପାଇଁ ନିର୍ଦ୍ଦିଷ୍ଟ ‘Ashni’ ପ୍ଲାଟୁନ୍ ମଧ୍ୟ ପ୍ରସ୍ତୁତ କରାଯାଇଛି।

ଏହି ୟୁନିଟ୍‌ଗୁଡ଼ିକରେ ଡ୍ରୋନ୍ ପରିଚାଳନା ପାଇଁ ପ୍ରଶିକ୍ଷିତ ଯବାନ ରହିଥିବା ରିପୋର୍ଟ ରହିଛି। ଏହା ସେନାର ଡ୍ରୋନ୍ କ୍ଷମତାକୁ ଅଧିକ ବିକେନ୍ଦ୍ରୀକୃତ କରିବା ଏବଂ ଫ୍ରଣ୍ଟଲାଇନ୍ ୟୁନିଟ୍‌ଗୁଡ଼ିକୁ ଅଧିକ unmanned capability ଦେବା ଦିଗରେ ଏକ ବଡ଼ ପରିବର୍ତ୍ତନକୁ ସୂଚାଉଛି।

୧୭,୫୦୦ ଫୁଟ୍‌ରେ ପରୀକ୍ଷା କାହିଁକି ଗୁରୁତ୍ୱପୂର୍ଣ୍ଣ?

ହିମାଳୟର ଅତ୍ୟଧିକ ଉଚ୍ଚତାରେ ପାଣିପାଗ, ବାୟୁର ଘନତା, ଯୋଗାଯୋଗ ଓ ମାନୁଭରାବିଲିଟି ଭଳି ଅନେକ ଚ୍ୟାଲେଞ୍ଜ ରହିଥାଏ। ତେଣୁ ଏଭଳି ପରିବେଶରେ ଡ୍ରୋନ୍‌ର ସଫଳ ପରୀକ୍ଷା ଦୁର୍ଗମ ସୀମାନ୍ତ ଅଞ୍ଚଳରେ ଏହାର ବ୍ୟବହାରିକତାକୁ ଦର୍ଶାଏ। 

୨୨୫ଟି FPV ଡ୍ରୋନ୍‌ର ଏହି ଅର୍ଡର କେବଳ ସଂଖ୍ୟା ଦୃଷ୍ଟିରୁ ନୁହେଁ, ବରଂ ଉଚ୍ଚ ଉଚ୍ଚତାରେ ଫିଲ୍ଡ ଟ୍ରାଏଲ୍ ପରେ ସ୍ୱଦେଶୀ ଡ୍ରୋନ୍ ସିଷ୍ଟମ୍‌କୁ ସେନାରେ ସାମିଲ କରିବା ଦୃଷ୍ଟିରୁ ମଧ୍ୟ ଗୁରୁତ୍ୱ ବହନ କରୁଛି।