ଆଗାମୀ ଏଫ୍‌ଆଇଏଚ୍‌ ମହିଳା ହକି ବିଶ୍ୱକପ୍ ପାଇଁ ଶୁକ୍ରବାର ହକି ଇଣ୍ଡିଆ ୨୦ ଜଣିଆ ଭାରତୀୟ ଦଳ ଘୋଷଣା କରିଛି। ଏଥିରେ ମିଡଫିଲ୍ଡର ସଲିମା ଟେଟେଙ୍କୁ ଦଳର ଅଧିନାୟିକା ଭାବେ ନିଯୁକ୍ତ କରାଯାଇଛି।

ଏହି ଦଳରେ ଓଡ଼ିଶାରୁ କେବଳ ସୁନେଲିତା ଟୋପ୍ପୋ ସ୍ଥାନ ପାଇଛନ୍ତି। ବେଙ୍ଗାଲୁରୁରେ ଚାଲିଥିବା ଜାତୀୟ ପ୍ରଶିକ୍ଷଣ ଶିବିରରୁ ଏହି ଚୂଡ଼ାନ୍ତ ଦଳ ଚୟନ କରାଯାଇଛି।

ଗତ ମାସରେ ନ୍ୟୁଜିଲ୍ୟାଣ୍ଡରେ ଆୟୋଜିତ ଏଫ୍‌ଆଇଏଚ୍‌ ନେସନ୍ସ କପ୍ରେ ଭାରତ ଅପରାଜିତ ରହି ଟ୍ରଫି ଜିତିଥିଲା। ସେହି ସଫଳତାକୁ ବିଶ୍ୱକପ୍‌ରେ ମଧ୍ୟ ଜାରି ରଖିବାକୁ ଦଳ ଲକ୍ଷ୍ୟ ରଖିଥିବା ବେଳେ ମୁଖ୍ୟ ପ୍ରଶିକ୍ଷକ ଜୋର୍ଡ ମାରିନ୍ ମଧ୍ୟ ଆଶାବାଦୀ ରହିଛନ୍ତି।

ଚଳିତ ବର୍ଷ ଅଗଷ୍ଟ ୧୫ରୁ ୩୦ ପର୍ଯ୍ୟନ୍ତ ନେଦରଲ୍ୟାଣ୍ଡସ୍ ଓ ବେଲଜିୟମ୍ ମିଳିତ ଭାବେ ମହିଳା ହକି ବିଶ୍ୱକପ୍ ଆୟୋଜନ କରିବେ। ଭାରତ ପୁଲ୍-ଡିରେ ଚୀନ୍, ଇଂଲଣ୍ଡ ଓ ଦକ୍ଷିଣ ଆଫ୍ରିକା ସହ ରହିଛି।

ଭାରତ ତା'ର ସମସ୍ତ ପୁଲ୍ ପର୍ଯ୍ୟାୟ ମ୍ୟାଚ୍ ନେଦରଲ୍ୟାଣ୍ଡସ୍‌ର ଆମ୍ଷ୍ଟେଲଭିନ୍‌ସ୍ଥିତ ୱାଗେନର ହକି ଷ୍ଟାଡିୟମ୍ରେ ଖେଳିବ। ଦଳ ଅଗଷ୍ଟ ୧୬ରେ ଚୀନ୍, ୧୮ରେ ଦକ୍ଷିଣ ଆଫ୍ରିକା ଏବଂ ୨୦ରେ ଇଂଲଣ୍ଡ ବିପକ୍ଷରେ ମୁକାବିଲା କରିବ।

ଭାରତୀୟ ମହିଳା ହକି ଦଳ:

ଗୋଲକିପର: ସବିତା, ବିଚୁ ଦେବୀ ଖାରିବାମ୍

ଡିଫେଣ୍ଡର: ଈଶିକା ଚୌଧୁରୀ, ସୁଶିଲା ଚାନୁ ପୁଖ୍ରାମ୍ବାମ୍, ଲାଲଥାନ୍ତଲୁଆଙ୍ଗୁ, ଜ୍ୟୋତି, ଶିଳ୍ପୀ ଦାବାସ

ମିଡଫିଲ୍ଡର: ସଲିମା ଟେଟେ (ଅଧିନାୟିକା), ନିକ୍କି ପ୍ରଧାନ, ସାକ୍ଷୀ ରାଣା, ସୁନେଲିତା ଟୋପ୍ପୋ, ନେହା, ଦୀପିକା ସୋରେଙ୍ଗ

ଫରୱାର୍ଡ: ଲାଲରେମସିଆମି, ଋତୁଜା ପିସାଲ, ନବନୀତ କୌର, ଈଶିକା, ବଲଜିତ କୌର, ବିଉଟି ଡୁଙ୍ଗଡୁଙ୍ଗ।