ବେଙ୍ଗାଲୁରୁ:ଆଗାମୀ ଏସିଆ କପ୍ ହକିକୁ ନଜରରେ ରଖି ଭାରତୀୟ କନିଷ୍ଠ ପୁରୁଷ ହକି ଦଳ ନିଜର ପ୍ରସ୍ତୁତିକୁ ଆହୁରି ମଜବୁତ କରିଛି। ଏହାର ଅଂଶ ଭାବେ ବେଙ୍ଗାଲୁରୁର SAI ନେତାଜୀ ସୁଭାଷ ଦକ୍ଷିଣ କେନ୍ଦ୍ରରେ ଭାରତ ଓ ମାଲେସିଆ U-21 ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ଏକ୍ସପୋଜର ସିରିଜ୍ ଆୟୋଜିତ ହେବ।

ଅଗଷ୍ଟ ୭ରୁ ୧୩ ତାରିଖ ମଧ୍ୟରେ ଭାରତୀୟ ଜୁନିୟର ଦଳ ଓ ମାଲେସିଆ U-21 ଦଳ ମଧ୍ୟରେ ୫ଟି ମ୍ୟାଚ୍ ଖେଳାଯିବ। ସମଗ୍ର ଗସ୍ତରେ ମାଲେସିଆ ଦଳ ମୋଟ ୮ଟି ମ୍ୟାଚ୍ ଖେଳିବ। ଏଥିରୁ ୫ଟି ମ୍ୟାଚ୍ ଭାରତୀୟ କନିଷ୍ଠ ଦଳ ବିପକ୍ଷରେ ଏବଂ ୩ଟି ମ୍ୟାଚ୍ SAI ଦଳ ବିପକ୍ଷରେ ହେବ।

ମାଲେସିଆ U-21 ଦଳ ଅଗଷ୍ଟ ୩ ଓ ୫ ତାରିଖରେ SAI ବିପକ୍ଷରେ ଦୁଇଟି ମ୍ୟାଚ୍ ଖେଳିବ। ଏହାପରେ ଅଗଷ୍ଟ ୭, ୮, ୧୦, ୧୨ ଓ ୧୩ ତାରିଖରେ ଭାରତୀୟ ଜୁନିୟର ଦଳ ବିପକ୍ଷରେ ୫ଟି ମୁକାବିଲା ଖେଳିବ। ଗସ୍ତର ଶେଷ ମ୍ୟାଚ୍ ଅଗଷ୍ଟ ୧୫ରେ SAI ଦଳ ବିପକ୍ଷରେ ଖେଳାଯିବ।

ଆଗାମୀ ଏସିଆ କପ୍ ସହ ଅନ୍ୟ ଅନ୍ତର୍ଜାତୀୟ ପ୍ରତିଯୋଗିତା ପାଇଁ ଏହି ସିରିଜ୍କୁ ଭାରତୀୟ ଦଳର ପ୍ରସ୍ତୁତିର ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟାୟ ଭାବେ ଦେଖାଯାଉଛି। ଭାରତୀୟ କନିଷ୍ଠ ପୁରୁଷ ହକି ଦଳର ମୁଖ୍ୟ ପ୍ରଶିକ୍ଷକ ଫ୍ରେଡେରିକ୍ ସୋୟେଜ୍ଙ୍କ ଅନୁସାରେ, ଏସିଆ କପ୍ ପ୍ରସ୍ତୁତିରେ ଏହି ଶୃଙ୍ଖଳାର ବିଶେଷ ଗୁରୁତ୍ୱ ରହିଛି।

ବେଲଜିୟମ ଗସ୍ତରୁ ଭାରତୀୟ ଦଳର ଏହି ପ୍ରସ୍ତୁତି ଅଭିଯାନ ଆରମ୍ଭ ହୋଇଥିବା ବେଳେ ଏସିଆ କପ୍ ପର୍ଯ୍ୟନ୍ତ ଏଭଳି ଅଭ୍ୟାସ ଓ ଏକ୍ସପୋଜର ମ୍ୟାଚ୍ ଜାରି ରହିବ। ଘରୋଇ ପରିବେଶରେ ମାଲେସିଆ ଭଳି ଦଳ ବିପକ୍ଷରେ ଖେଳିବା ଭାରତୀୟ ଯୁବ ଖେଳାଳିଙ୍କୁ ଅନ୍ତର୍ଜାତୀୟ ଅଭିଜ୍ଞତା ଦେବ।

ଏହି ମ୍ୟାଚ୍ଗୁଡ଼ିକ ମାଧ୍ୟମରେ ଖେଳାଳିମାନେ ନିଜର ଦକ୍ଷତା ପ୍ରମାଣ କରିବା ସହ ଦଳର ଦୁର୍ବଳତା ଚିହ୍ନଟ କରିବାର ସୁଯୋଗ ପାଇବେ। ଏହାକୁ ଆଧାର କରି ଏସିଆ କପ୍ ପାଇଁ ଚୂଡ଼ାନ୍ତ ରଣନୀତି ପ୍ରସ୍ତୁତ କରିବାରେ କୋଚିଂ ଷ୍ଟାଫ୍ ଓ ଚୟନକର୍ତ୍ତାଙ୍କୁ ମଧ୍ୟ ସହାୟତା ମିଳିବ।