ଆମେରିକା ଓ ଇରାନ ମଧ୍ୟରେ ଚାଲିଥିବା କୂଟନୈତିକ ତତ୍ପରତା ଏବଂ ଅଞ୍ଚଳୀୟ ସୁରକ୍ଷା ପରିସ୍ଥିତିକୁ ନଜରରେ ରଖି ତେହେରାନସ୍ଥିତ ଭାରତୀୟ ଦୂତାବାସ ଭାରତୀୟ ନାଗରିକଙ୍କ ପାଇଁ ଏକ ନୂତନ ଯାତ୍ରା ପରାମର୍ଶ ଜାରି କରିଛି।

ବୁଧବାର ପ୍ରକାଶିତ ଏହି ପରାମର୍ଶରେ ସମସ୍ତ ଭାରତୀୟଙ୍କୁ ଇରାନକୁ ଅନାବଶ୍ୟକ ଯାତ୍ରା ଏଡାଇବାକୁ ଅନୁରୋଧ କରାଯାଇଛି। ଦୂତାବାସ କହିଛି ଯେ ସେମାନେ ତେହେରାନ ଏବଂ ସମଗ୍ର ଇରାନର ସୁରକ୍ଷା ପରିସ୍ଥିତି ଉପରେ ନିରନ୍ତର ନଜର ରଖିଛନ୍ତି।

ଦୂତାବାସ ପକ୍ଷରୁ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ ମାଧ୍ୟମରେ ସେୟାର କରାଯାଇଥିବା ସୂଚନାରେ କୁହାଯାଇଛି ଯେ, ବର୍ତ୍ତମାନ ପରିସ୍ଥିତିରେ ଅତ୍ୟାବଶ୍ୟକ କାରଣ ନଥିଲେ ଭାରତୀୟମାନେ ଇରାନ ଯାତ୍ରା କରିବାରୁ ବିରତ ରୁହନ୍ତୁ। ସାମ୍ପ୍ରତିକ ସକାରାତ୍ମକ ଘଟଣାକ୍ରମ ସତ୍ତ୍ୱେ ମଧ୍ୟ ସତର୍କତା ଜାରି ରଖିବାକୁ ଦୂତାବାସ ପରାମର୍ଶ ଦେଇଛି।

ଏହା ସହିତ ଇରାନରେ ପୂର୍ବରୁ ବସବାସ କରୁଥିବା କିମ୍ବା ଜରୁରୀ କାମରେ ସେଠାକୁ ଯାଉଥିବା ଭାରତୀୟ ନାଗରିକଙ୍କୁ ସର୍ବାଧିକ ସତର୍କତା ଅବଲମ୍ବନ କରିବାକୁ କୁହାଯାଇଛି। ସେମାନଙ୍କୁ ସ୍ଥାନୀୟ ପରିସ୍ଥିତି ବିଷୟରେ ସଚେତନ ରହିବା ସହ ଦୂତାବାସର ସମସ୍ତ ନିର୍ଦ୍ଦେଶକୁ ଅନୁସରଣ କରିବାକୁ ଅନୁରୋଧ କରାଯାଇଛି।

ଦୂତାବାସ ଇରାନରେ ଅବସ୍ଥାନ କରୁଥିବା ସମସ୍ତ ଭାରତୀୟଙ୍କୁ ନିଜର ବ୍ୟକ୍ତିଗତ ବିବରଣୀ ଯଥାଶୀଘ୍ର ଦୂତାବାସରେ ପଞ୍ଜୀକରଣ କରିବାକୁ କହିଛି। ସେହିପରି ନୂତନ ସୂଚନା ଓ ନିର୍ଦ୍ଦେଶ ପାଇଁ ଦୂତାବାସର ସରକାରୀ ୱେବସାଇଟ୍ ଏବଂ ସୋସିଆଲ ମିଡିଆ ଚ୍ୟାନେଲ ଉପରେ ନଜର ରଖିବାକୁ ପରାମର୍ଶ ଦିଆଯାଇଛି।

ଜରୁରୀକାଳୀନ ପରିସ୍ଥିତିରେ ସହାୟତା ପାଇଁ ଦୂତାବାସ ଚାରୋଟି ମୋବାଇଲ୍ ନମ୍ବର ଓ ଏକ ଇ-ମେଲ୍ ଠିକଣା ମଧ୍ୟ ଜାରି କରିଛି। ଭାରତୀୟ ନାଗରିକଙ୍କ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦେଇ ଏହି ପରାମର୍ଶ ଜାରି କରାଯାଇଥିବା ଦୂତାବାସ ସ୍ପଷ୍ଟ କରିଛି।