୨୦୩୬ ଅଲିମ୍ପିକ୍ସ ଆୟୋଜନ ପାଇଁ ଭାରତର ଦାବିକୁ ଆହୁରି ମଜବୁତ କରିବା ଦିଗରେ ଏକ ବଡ଼ ପଦକ୍ଷେପ ନିଆଯାଇଛି। ଭାରତୀୟ ଅଲିମ୍ପିକ୍ ଆସୋସିଏସନ୍‌ (IOA) ଅହମ୍ମଦାବାଦକୁ କେନ୍ଦ୍ର କରି ‘Rising Together’ ନାମରେ ନିଜର ଭିଜନ୍ ଉପସ୍ଥାପନ କରିଛି। ଏହି ଭିଜନ୍‌ର ମୁଖ୍ୟ ଲକ୍ଷ୍ୟ ହେଉଛି କ୍ରୀଡ଼ାକୁ ଦେଶର ସାମାଜିକ ଓ ଯୁବ ବିକାଶର ଏକ ମାଧ୍ୟମରେ ପରିଣତ କରିବା। 

ଭାରତ ୨୦୨୪ରେ ୨୦୩୬ ଅଲିମ୍ପିକ୍ସ ଆୟୋଜନ ପାଇଁ ନିଜର Expression of Interest ଦାଖଲ କରିଥିଲା। ଗତ ପ୍ରାୟ ୧୮ ମାସ ଧରି IOC ସହ ଆଲୋଚନା ପରେ ଏବେ ଭାରତ ନିଜର ଆୟୋଜନ ଯୋଜନାକୁ ଆଗକୁ ବଢ଼ାଇଛି। 

ବର୍ତ୍ତମାନ ଭାରତ ସମେତ ୭ଟି ଦେଶ ୨୦୩୬ ଅଲିମ୍ପିକ୍ସ ଆୟୋଜନ ପାଇଁ IOCର ‘Continuous Dialogue’ ପ୍ରକ୍ରିୟାରେ ଅଛନ୍ତି। ଏହି ତାଲିକାରେ ଭାରତ ସହ ଜର୍ମାନୀ, ହଙ୍ଗେରୀ, କତାର, ଦକ୍ଷିଣ କୋରିଆ, ଦକ୍ଷିଣ ଆଫ୍ରିକା ଓ ତୁର୍କିଏ ରହିଛନ୍ତି।

IOA ଅଧ୍ୟକ୍ଷା ପି.ଟି. ଉଷା କହିଛନ୍ତି ଯେ ‘Rising Together’ କେବଳ ଏକ ସ୍ଲୋଗାନ୍ ନୁହେଁ, ବରଂ ଭାରତର ଶକ୍ତି, ଆକାଂକ୍ଷା ଓ ବିବିଧତାକୁ ଏକତ୍ର କରିବାର ଏକ ପ୍ରତିବଦ୍ଧତା। ଭାରତ ଏଭଳି ଏକ ଅଲିମ୍ପିକ୍ସ ଆୟୋଜନ କରିବାକୁ ଚାହୁଁଛି, ଯାହା ଦେଶର ଯୁବ ଜନସଂଖ୍ୟାକୁ ପ୍ରତିଫଳିତ କରିବ ଏବଂ ନୂଆ ପିଢ଼ିକୁ କ୍ରୀଡ଼ା ସହ ଯୋଡ଼ିବ। 

କେନ୍ଦ୍ରୀୟ କ୍ରୀଡ଼ାମନ୍ତ୍ରୀ ମନସୁଖ ମାଣ୍ଡଭିୟଙ୍କ ଅନୁସାରେ, ୨୦୩୬ ପାଇଁ ଭାରତର ଲକ୍ଷ୍ୟ ହେଉଛି କ୍ରୀଡ଼ା ମାଧ୍ୟମରେ ଦେଶର ଭବିଷ୍ୟତକୁ ଆହୁରି ମଜବୁତ କରିବା। ଅଲିମ୍ପିକ୍ସ ଆୟୋଜନ ହେଲେ ଲକ୍ଷ ଲକ୍ଷ ଯୁବକ-ଯୁବତୀ କ୍ରୀଡ଼ାରେ ଅଂଶଗ୍ରହଣ ପାଇଁ ପ୍ରେରିତ ହେବା ସହ ଶିକ୍ଷା, ରୋଜଗାର ଓ ସାମାଜିକ ବିକାଶରେ ନୂଆ ସୁଯୋଗ ସୃଷ୍ଟି ହୋଇପାରିବ। 

IOC ଭାରତ ସମେତ ଆଗ୍ରହୀ ଦେଶଗୁଡ଼ିକର ପ୍ରସ୍ତାବକୁ ଭେନ୍ୟୁ ମାଷ୍ଟରପ୍ଲାନ୍, ଆଥଲେଟ୍‌ ଅନୁଭବ, ଫଣ୍ଡିଂ ଷ୍ଟ୍ରାଟେଜି, ସରକାରୀ ଓ ଜନସମର୍ଥନ, ଆୟୋଜନ କ୍ଷମତା ଏବଂ ଦୀର୍ଘମିଆଦୀ ଲାଭ ଆଧାରରେ ମୂଲ୍ୟାୟନ କରିବ। 

ଭାରତର ପରବର୍ତ୍ତୀ ବଡ଼ ପଦକ୍ଷେପ ହେବ IOCର Future Host Commission ସମ୍ମୁଖରେ ନିଜର ପ୍ରସ୍ତାବ ଉପସ୍ଥାପନ କରିବା। IOCର ଯୋଜନା ଅନୁସାରେ ୨୦୨୭ ମାର୍ଚ୍ଚରେ ପରବର୍ତ୍ତୀ ପର୍ଯ୍ୟାୟ ପାଇଁ ଦେଶଗୁଡ଼ିକୁ ଶର୍ଟଲିଷ୍ଟ କରାଯାଇପାରେ ଏବଂ ୨୦୨୯ ମଧ୍ୟଭାଗରେ ୨୦୩୬ ଅଲିମ୍ପିକ୍ସର ଆୟୋଜକ ଦେଶ ଚୟନ ହେବାର ସମ୍ଭାବନା ରହିଛି।