ତାମିଲନାଡୁର ଏକ ଛୋଟ ଓ ଦୂରସ୍ଥ ଗାଁରୁ ଆରମ୍ଭ ହୋଇଥିବା ଇଲୟାରାଜାଙ୍କ ସଙ୍ଗୀତ ଯାତ୍ରା ଏବେ ଅଷ୍ଟ୍ରେଲିଆ ସଂସଦ ପର୍ଯ୍ୟନ୍ତ ପହଞ୍ଚିଛି। ସିନେମା ଜଗତରେ ୫୦ ବର୍ଷ ପୂରଣ କରିଥିବା ଏହି ପ୍ରସିଦ୍ଧ ସଙ୍ଗୀତ ନିର୍ଦ୍ଦେଶକଙ୍କୁ ଅଷ୍ଟ୍ରେଲିଆ ସଂସଦରେ ସ୍ମାରକ ଡାକ ଟିକେଟ ମାଧ୍ୟମରେ ସମ୍ମାନିତ କରାଯାଇଛି।

ସୋସିଆଲ ମିଡିଆରେ ଏହି ସମ୍ମାନ ସମ୍ପର୍କରେ ଇଲୟାରାଜା କୃତଜ୍ଞତା ପ୍ରକାଶ କରିଛନ୍ତି। ଭିକ୍ଟୋରିଆର ଅର୍ଥମନ୍ତ୍ରୀ ଏନଭର ଏର୍ଦୋଗାନ ଏମପି ଏବଂ ଅଷ୍ଟ୍ରେଲିଆ ସଂସଦର ସଦସ୍ୟମାନଙ୍କୁ ସେ ଧନ୍ୟବାଦ ଜଣାଇଛନ୍ତି।

ନିଜ ଯାତ୍ରାକୁ ମନେ ପକାଇ ଇଲୟାରାଜା କହିଛନ୍ତି ଯେ ତାମିଲନାଡୁର ଏକ ଛୋଟ ଦୂରସ୍ଥ ଗାଁରେ ଜନ୍ମ ନେଇ ଅଷ୍ଟ୍ରେଲିଆ ସଂସଦରେ ସମ୍ମାନିତ ହେବା ତାଙ୍କ ପାଇଁ ଅତ୍ୟନ୍ତ ଭାବପ୍ରବଣ ଅନୁଭୂତି। ତାଙ୍କ ସଙ୍ଗୀତକୁ ଜୀବନ ଦେଇଥିବା କଳାକାର, ସହଯୋଗୀ ଏବଂ ପିଢ଼ି ପିଢ଼ି ଧରି ତାଙ୍କ ସଙ୍ଗୀତକୁ ଭଲପାଇଥିବା ଶ୍ରୋତାମାନଙ୍କୁ ମଧ୍ୟ ସେ ଧନ୍ୟବାଦ ଦେଇଛନ୍ତି।

ଇଲୟାରାଜାଙ୍କ ୫୦ ବର୍ଷର ସିନେମା ଯାତ୍ରାକୁ ନେଇ ବର୍ଷସାରା ବିଭିନ୍ନ କାର୍ଯ୍ୟକ୍ରମ ଓ କନସର୍ଟ ଆୟୋଜିତ ହେଉଛି। ଜୁଲାଇରୁ ଆରମ୍ଭ ହୋଇଥିବା ତାଙ୍କ ଗୋଲ୍ଡେନ ଜୁବିଲି ଟୁର୍ରେ ଉତ୍ତର ଆମେରିକାର ବିଭିନ୍ନ ସ୍ଥାନରେ ସେ ପ୍ରଦର୍ଶନ କରିଛନ୍ତି। ଅଷ୍ଟ୍ରେଲିଆରେ ସେପ୍ଟେମ୍ବର ୨୬ରେ ସିଡନୀ ଏବଂ ଅକ୍ଟୋବର ୫ରେ ବ୍ରିସବେନରେ ତାଙ୍କର କାର୍ଯ୍ୟକ୍ରମ ରହିଛି।

ଏହାର ପୂର୍ବରୁ ୨୦୨୫ ସେପ୍ଟେମ୍ବରରେ ତାମିଲନାଡୁ ସରକାର ମଧ୍ୟ ଚେନ୍ନାଇର ଜବାହରଲାଲ ନେହରୁ ଷ୍ଟାଡିୟମରେ ଇଲୟାରାଜାଙ୍କ ୫୦ ବର୍ଷର ସିନେମା ଯାତ୍ରା ଅବସରରେ ତାଙ୍କୁ ସମ୍ମାନିତ କରିଥିଲେ।

ନିକଟରେ ଇଲୟାରାଜାଙ୍କ ସଙ୍ଗୀତ ଥିବା ମରାଠୀ ଥ୍ରିଲର‘ଗୋନ୍ଧଲ’ଭାରତର ଅଫିସିଆଲ ଅସ୍କାର ପ୍ରବେଶିକା ଭାବେ ଚୟନ ହୋଇଥିବାରୁ ମଧ୍ୟ ସେ ଚର୍ଚ୍ଚାରେ ରହିଛନ୍ତି।

ଏବେ ଇଲୟାରାଜାଙ୍କ ସଙ୍ଗୀତରେ ସଜିଥିବା କାର୍ତ୍ତିକ ସୁବ୍ବାରାଜଙ୍କ ନିର୍ଦ୍ଦେଶିତ‘Dorothy’ଫିଲ୍ମ ମଧ୍ୟ ମୁକ୍ତି ପାଇବାକୁ ଯାଉଛି। କୀର୍ତ୍ତି ସୁରେଶ, ରିଶିକାନ୍ତ ଏବଂ ସନନ୍ଥଙ୍କ ଅଭିନୀତ ଏହି ଫିଲ୍ମ ସେପ୍ଟେମ୍ବର ୨୫ରେ ପ୍ରେକ୍ଷାଳୟକୁ ଆସିବ।