ବଲିଉଡ ଅଭିନେତା ହ୍ରିତିକ୍ ରୋଶନ ଓ ଇଣ୍ଟେରିୟର ଡିଜାଇନର ସୁଜାନ୍ ଖାନଙ୍କ ବିଚ୍ଛେଦ ପରେ ସୁଜାନ୍ ୪୦୦ କୋଟି ଟଙ୍କା ଆଲିମୋନି ପାଇଥିବା ଚର୍ଚ୍ଚା ବର୍ଷ ବର୍ଷ ଧରି ସୋସିଆଲ ମିଡିଆରେ ଘୁରି ବୁଲୁଥିଲା। ଏବେ ଏହି ଗୁଜବକୁ ସୁଜାନଙ୍କ ଭଉଣୀ ତଥା ଜୁଏଲେରୀ ଡିଜାଇନର ଫରାହ ଖାନ୍ ଅଲି ସମ୍ପୂର୍ଣ୍ଣ ଖଣ୍ଡନ କରିଛନ୍ତି।

ଏକ ୟୁଟ୍ୟୁବ୍ ସାକ୍ଷାତ୍କାରରେ ଫରାହ କହିଛନ୍ତି ଯେ, ହ୍ରିତିକ୍ ଓ ସୁଜାନଙ୍କ ବିଚ୍ଛେଦ ପରେ ଲୋକମାନଙ୍କ ମଧ୍ୟରେ ଅନେକ ଗୁଜବ ଓ ଅନୁମାନ ଚାଲିଥିଲା। କିନ୍ତୁ ୪୦୦ କୋଟି ଟଙ୍କା ଆଲିମୋନି ଦିଆଯାଇଥିବା କଥା ସମ୍ପୂର୍ଣ୍ଣ ଭୁଲ ଏବଂ ମିଥ୍ୟା।

ଫରାହଙ୍କ କହିବା ଅନୁଯାୟୀ, ସୁଜାନ୍ କେବେ ବି ବିଚ୍ଛେଦକୁ ଆର୍ଥିକ ଲାଭର ମାଧ୍ୟମ କରିନଥିଲେ। ସେ ନିଜ ପରିବାରର ସଂସ୍କାର ଅନୁସାରେ ସମ୍ପର୍କକୁ ଧନଠାରୁ ଅଧିକ ଗୁରୁତ୍ୱ ଦେଇଥିଲେ। ଏହି କାରଣରୁ ଆଜି ମଧ୍ୟ ହ୍ରିତିକ୍, ତାଙ୍କ ପିତାମାତା ରାକେଶ ରୋଶନ ଓ ପିଙ୍କି ରୋଶନଙ୍କ ସହ ସୁଜାନଙ୍କ ସମ୍ପର୍କ ଅତ୍ୟନ୍ତ ଭଲ ରହିଛି।

ଫରାହ ଆହୁରି କହିଛନ୍ତି ଯେ, ବିଚ୍ଛେଦ ପରେ ସେ ସୁଜାନଙ୍କୁ ଏହି ଗୁଜବର ପ୍ରତିବାଦ କରିବାକୁ କହିଥିଲେ। କିନ୍ତୁ ସୁଜାନ୍ କହିଥିଲେ ଯେ, ଲୋକମାନେ କଣ ଭାବୁଛନ୍ତି ତାହାକୁ ସେ ଗୁରୁତ୍ୱ ଦିଅନ୍ତି ନାହିଁ ଏବଂ ଭିତ୍ତିହୀନ ଅଭିଯୋଗର ଉତ୍ତର ଦେବାକୁ ସେ ଆବଶ୍ୟକ ମନେ କରୁନାହାନ୍ତି।

ହ୍ରିତିକ୍ ରୋଶନ ଓ ସୁଜାନ୍ ଖାନ ୨୦୦୦ ମସିହାରେ ବିବାହ କରିଥିଲେ। ସେମାନଙ୍କର ଦୁଇ ପୁଅ ଅଛନ୍ତି। ୨୦୧୩ରେ ସେମାନେ ଅଲଗା ହୋଇଥିଲେ ଏବଂ ୨୦୧୪ରେ ସେମାନଙ୍କ ବିଚ୍ଛେଦ ଆଇନଗତ ଭାବେ ସମ୍ପନ୍ନ ହୋଇଥିଲା। ବିଚ୍ଛେଦ ପରେ ମଧ୍ୟ ଉଭୟ ନିଜ ସନ୍ତାନଙ୍କ ଦାୟିତ୍ୱ ସାଙ୍ଗରେ ନେଉଛନ୍ତି ଏବଂ ପାରିବାରିକ କାର୍ଯ୍ୟକ୍ରମରେ ଏକାଠି ନଜର ଆସୁଛନ୍ତି।