ହଂକଂ ଓପନ୍ ସୁପର ୫୦୦ ବ୍ୟାଡମିଣ୍ଟନ୍ ଟୁର୍ଣ୍ଣାମେଣ୍ଟରେ ଭାରତର ଲକ୍ଷ୍ୟ ସେନ୍ଙ୍କ ବିଜୟ ଧାରା ଜାରି ରହିଛି। ଶୁକ୍ରବାର ଖେଳାଯାଇଥିବା ପୁରୁଷ ସିଙ୍ଗଲ୍ସ କ୍ୱାର୍ଟର ଫାଇନାଲ୍ରେ ସେ ସିଙ୍ଗାପୁରର ପୂର୍ବତନ ବିଶ୍ୱଚାମ୍ପିଅନ୍ ଲୋହ କିନ୍ ୟୁଙ୍କୁ ୨୧-୧୭, ୧୦-୨୧, ୨୧-୧୩ରେ ପରାସ୍ତ କରିଛନ୍ତି। ୫୫ ମିନିଟ୍ ଧରି ଚାଲିଥିବା ଏହି ମ୍ୟାଚ୍ରେ ଲକ୍ଷ୍ୟ ପ୍ରଥମ ଗେମ୍ ଜିତିଥିଲେ ମଧ୍ୟ ଦ୍ୱିତୀୟ ଗେମ୍ରେ ପରାଜିତ ହୋଇଥିଲେ। ତେବେ ନିର୍ଣ୍ଣାୟକ ତୃତୀୟ ଗେମ୍ରେ ଜବରଦସ୍ତ ପ୍ରତ୍ୟାବର୍ତ୍ତନ କରି ବିଜୟ ହାସଲ କରିଥିଲେ।
ଏହି ବିଜୟ ସହ ଲୋହ କିନ୍ ୟୁଙ୍କ ବିପକ୍ଷରେ ଲକ୍ଷ୍ୟଙ୍କ ମୋଟ ବିଜୟ ସଂଖ୍ୟା ୧୩ଟି ମ୍ୟାଚ୍ରେ ୮କୁ ବୃଦ୍ଧି ପାଇଛି। ଏହା ସହ ହଂକଂ ଓପନ୍ର ସେମିଫାଇନାଲ୍ରେ ନିଜ ସ୍ଥାନ ପକ୍କା କରିଛନ୍ତି ସେ।
ଚଳିତ ମାସରେ ଲକ୍ଷ୍ୟ ସେନ୍ଙ୍କ ପ୍ରଦର୍ଶନ ବେଶ୍ ଉଚ୍ଚକୋଟୀର ରହିଛି। ଜର୍ମାନୀରେ ହାଇଲୋ ଓପନ୍ ଟାଇଟଲ୍ ଜିତିବା ପରେ ସେ ଜାପାନର କୁମାମୋଟୋ ମାଷ୍ଟର୍ସ ଟାଇଟଲ୍ ମଧ୍ୟ ହାତେଇଥିଲେ। ଏବେ ହଂକଂ ଓପନ୍ରେ ମଧ୍ୟ ତାଙ୍କ ବିଜୟ ଅଭିଯାନ ଜାରି ରହିଛି।
ଏହି ଦୁଇଟି ଟାଇଟଲ୍ ଜିତିବା ପରେ ଲକ୍ଷ୍ୟ ପାଞ୍ଚ ବର୍ଷ ବ୍ୟବଧାନରେ ପୁଣି BWF ୱାର୍ଲ୍ଡ ଟୁର୍ ଫାଇନାଲ୍ସ ପାଇଁ ଯୋଗ୍ୟତା ହାସଲ କରିଛନ୍ତି। ହଂକଂ ଓପନ୍ ସେମିଫାଇନାଲ୍ରେ ସେ ଡେନମାର୍କର ଆଣ୍ଡର୍ସ ଆଣ୍ଟନସେନ୍ କିମ୍ବା ଚୀନ୍ର ଝୁ ସୁଆନ୍ ଚେନ୍ଙ୍କ ମଧ୍ୟରୁ ଜଣଙ୍କୁ ଭେଟିବେ।
ରାକ୍ଷିତାଙ୍କ ସ୍ୱପ୍ନର ଯାତ୍ରାରେ ବ୍ରେକ୍
ମହିଳା ସିଙ୍ଗଲ୍ସରେ ଭାରତର ୧୯ ବର୍ଷୀୟା ଖେଳାଳି ରାକ୍ଷିତା ଶ୍ରୀ ସନ୍ତୋଷ ରାମରାଜଙ୍କ ଅଭିଯାନ କ୍ୱାର୍ଟର ଫାଇନାଲ୍ରେ ଶେଷ ହୋଇଛି। ସେ ଥାଇଲାଣ୍ଡର ପଞ୍ଚମ ସିଡ୍ ପର୍ଣ୍ଣପାୱି ଚୋଚୁୱଙ୍ଗଙ୍କଠାରୁ ୧୯-୨୧, ୧୬-୨୧ରେ ପରାସ୍ତ ହୋଇଛନ୍ତି।
ଯଦିଓ ରାକ୍ଷିତାଙ୍କ ଅଭିଯାନ ଶେଷ ହୋଇଛି, ତଥାପି ଏହି ଟୁର୍ଣ୍ଣାମେଣ୍ଟରେ ତାଙ୍କ ପ୍ରଦର୍ଶନ ଚର୍ଚ୍ଚାରେ ରହିଛି। ପ୍ରି-କ୍ୱାର୍ଟର ଫାଇନାଲ୍ରେ ସେ ଟୋକିଓ ଅଲିମ୍ପିକ୍ସ ସ୍ୱର୍ଣ୍ଣପଦକ ବିଜେତା ଚୀନ୍ର ଚେନ୍ ୟୁଫେଇଙ୍କୁ ୨୧-୧୮, ୨୪-୨୨ରେ ହରାଇ ବଡ଼ ଅପସେଟ୍ କରିଥିଲେ। ଏହା ଥିଲା ତାଙ୍କ କ୍ୟାରିୟରର ଅନ୍ୟତମ ବଡ଼ ବିଜୟ ଏବଂ ପ୍ରଥମ ସୁପର ୫୦୦ କ୍ୱାର୍ଟର ଫାଇନାଲ୍ ଅଭିଜ୍ଞତା।
ପୁରୁଷ ଡବଲ୍ସରେ ଭାରତର ଶୀର୍ଷ ଯୋଡ଼ି ସାତ୍ତ୍ୱିକସାଇରାଜ ରାଙ୍କିରେଡ୍ଡୀ ଓ ଚିରାଗ ସେଟ୍ଟୀ ମଧ୍ୟ ସେମିଫାଇନାଲ୍ରେ ପହଞ୍ଚିଛନ୍ତି। କ୍ୱାର୍ଟର ଫାଇନାଲ୍ରେ ସେମାନେ ଚୀନ୍ର ହୁ କେ ୟୁଆନ୍ ଓ ଲିନ୍ ସିଆଙ୍ଗ ୟିଙ୍କୁ ୨୧-୧୨, ୧୩-୨୧, ୨୧-୧୬ରେ ହରାଇଛନ୍ତି। ଏହି ମ୍ୟାଚ୍ ୫୯ ମିନିଟ୍ ଧରି ଚାଲିଥିଲା।
ଚଳିତ ବର୍ଷ ସିଙ୍ଗାପୁର ଓପନ୍ ଏବଂ ଚାଇନା ଓପନ୍ ଭଳି ଦୁଇଟି ସୁପର ୭୫୦ ଟାଇଟଲ୍ ଜିତିଥିବା ଏହି ଭାରତୀୟ ଯୋଡ଼ି ହଂକଂରେ ମଧ୍ୟ ଭଲ ଫର୍ମ ଦେଖାଉଛନ୍ତି। ସେମିଫାଇନାଲ୍ରେ ସେମାନେ ଡେନମାର୍କ କିମ୍ବା ମାଲେସିଆର ଯୋଡ଼ିଙ୍କ ମଧ୍ୟରୁ ଜଣଙ୍କୁ ଭେଟିବେ।
ଚୀନ୍‌ରେ ବନ୍ଦୀ ଥିବା ଆମେରିକୀୟ ନାଗରିକ ଏବଂ ଅନ୍ୟ ର...
ଭୁବନେଶ୍ୱରରେ ଆୟୋଜିତ ହେଲା ‘ପିପୁଲ୍‌ଭର୍ସ ୨୦...
ବାତ୍ୟା ‘ଅକଭାନ୍’ ସମୟରେ ଯେପରି ମୋବାଇଲ୍ ଯୋ...
ଆମେରିକାର ରାଜନୀତିରେ ଏବେ ଚର୍ଚ୍ଚାରେ ଅଛନ୍ତି ଟେସଲା ଓ ସ୍...
ତୁର୍କୀର ଏକ ସାମରିକ ଅଭ୍ୟାସ ଏବେ ଅନ୍ତର୍ଜାତୀୟ ପ୍ରତିରକ୍ଷ...
ଗୋପାଳପୁର ନିକଟରେ ସ୍ଥଳଭାଗ ଛୁଇଁଲା ବାତ୍ୟା ‘ଅକଭାନ...
ବଙ୍ଗୋପସାଗରରେ ସୃଷ୍ଟି ହୋଇଥିବା ବାତ୍ୟା ‘ଅକଭାନ୍&r...
ନେପଚ୍ୟୁନ୍‌ ପାରେ ପ୍ରାଚୀନ ଜଳବରଫର ସଙ୍କେତ ମହାକ...