ଗୁଜରାଟର ସାବରକାଣ୍ଠା ଜିଲ୍ଲାରେ ଏକ ମାସର ଶିଶୁ କନ୍ୟାକୁ ୧.୫ ଲକ୍ଷ ଟଙ୍କାରେ ବିକ୍ରି କରିବା ଉଦ୍ୟମକୁ ପୋଲିସ ବିଫଳ କରିଛି। ମୁମ୍ବାଇର ଜଣେ ମହିଳାଙ୍କୁ ଶିଶୁଟିକୁ ବିକ୍ରି କରିବା ପାଇଁ ନେଇଯାଉଥିବା ଅଭିଯୋଗରେ ୫ ଜଣଙ୍କୁ ଗିରଫ କରାଯାଇଛି। ଆଉ ଦୁଇ ଜଣ ଅଭିଯୁକ୍ତ, ଯେଉଁମାନଙ୍କ ମଧ୍ୟରେ ଜଣେ ମହିଳା ମଧ୍ୟସ୍ଥ ଥିବା କୁହାଯାଉଛି, ଫେରାର ଅଛନ୍ତି।

ପୋଲିସ ଅନୁସାରେ, ଗିରଫ ହୋଇଥିବା ଅଭିଯୁକ୍ତମାନେ ହେଲେ ଦେବୀଲାଲ ଗମାର, ପୋପଟ ଗମାର, ବାବିବେନ ଗମାର, ପ୍ରବୀଣ ଡାଙ୍ଗୀ ଓ ଦିନେଶ ଡାଙ୍ଗୀ। ପୋପଟ ଓ ତାଙ୍କ ପତ୍ନୀ ବାବିବେନ ନିଜର ସାନ ଭାଇଙ୍କ ଏକ ମାସର ଝିଅକୁ ଟଙ୍କା ପାଇଁ ବିକ୍ରି କରିବାକୁ ଯୋଜନା କରିଥିବା ଅଭିଯୋଗ ହୋଇଛି।

ତଦନ୍ତରେ ଜଣାପଡ଼ିଛି ଯେ, ମୁମ୍ବାଇରେ ରହୁଥିବା କବିତା ନାମକ ଜଣେ ମହିଳାଙ୍କୁ ୧.୫ ଲକ୍ଷ ଟଙ୍କାରେ ଶିଶୁଟିକୁ ବିକ୍ରି କରିବା ପାଇଁ ଚୁକ୍ତି ହୋଇଥିଲା। ଦେବୀଲାଲ ଗମାର ଓ ସୀତାରାମ ପରମାର ମୁଖ୍ୟ ମଧ୍ୟସ୍ଥ ଭାବେ କାମ କରୁଥିବାବେଳେ ପ୍ରବୀଣ ଓ ଦିନେଶ ଡାଙ୍ଗୀ ଦମ୍ପତିଙ୍କୁ ମଧ୍ୟସ୍ଥମାନଙ୍କ ସହ ଯୋଡ଼ିଥିବା ପୋଲିସ କହିଛି।

ଆଣ୍ଟି-ହ୍ୟୁମାନ୍ ଟ୍ରାଫିକିଂ ୟୁନିଟ୍ (AHTU)ର ଏକ ଟିମ୍ ପାଟ୍ରୋଲିଂ କରୁଥିବା ସମୟରେ ଶିଶୁକୁ ଗାଡ଼ିରେ ନେଇ ବିକ୍ରି କରିବାକୁ ଯାଉଥିବା ନେଇ ସୂଚନା ପାଇଥିଲା। ଏହାପରେ ଇଡର-ହିମ୍ମତନଗର ହାଇୱେରେ ଏକ କାରକୁ ଅଟକାଇ ଯାଞ୍ଚ କରାଯାଇଥିଲା। କାର ଭିତରୁ ୫ ଜଣଙ୍କୁ ଧରାଯିବା ସହ ଶିଶୁଟିକୁ ଉଦ୍ଧାର କରାଯାଇଥିଲା।

ପୋଲିସ ପଚରାଉଚରାରୁ ଜାଣିବାକୁ ପାଇଛି ଯେ, ଫେରାର ଥିବା ମହିଳା ମଧ୍ୟସ୍ଥ ଜଣକ ପୂର୍ବରୁ ବିଭିନ୍ନ ସହରରେ ପ୍ରାୟ ୧୨ ଜଣ ଶିଶୁଙ୍କୁ ବିକ୍ରି କରିଥିବା ଅଭିଯୋଗ ରହିଛି। ଏହି ଦାବିର ମଧ୍ୟ ପୋଲିସ ତଦନ୍ତ କରୁଛି।

ଗିରଫ ଅଭିଯୁକ୍ତମାନଙ୍କୁ ରିମାଣ୍ଡରେ ନିଆଯାଇଛି। ଫେରାର ଥିବା ଦୁଇ ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଓ ତଲାସୀ ଜାରି ରଖିଛି।