ଭାରତୀୟ ସେନାର ମୁଖ୍ୟ ପଦରୁ ମଙ୍ଗଳବାର ବିଦାୟ ନେଇଛନ୍ତି ଜେନେରାଲ ଉପେନ୍ଦ୍ର ଦ୍ୱିବେଦୀ। ଦାୟିତ୍ୱ ହସ୍ତାନ୍ତର ଅବସରରେ ସେ କହିଛନ୍ତି ଯେ, ଚାରି ଦଶନ୍ଧିରୁ ଅଧିକ ସମୟ ଧରି ଭାରତୀୟ ସେନାରେ ସେବା କରିବା ତାଙ୍କ ଜୀବନର ସର୍ବଶ୍ରେଷ୍ଠ ସୌଭାଗ୍ୟ ଥିଲା। ସେ ନୂତନ ସେନାମୁଖ୍ୟ ଜେନେରାଲ ଧୀରଜ ସେଠଙ୍କୁ ଦାୟିତ୍ୱ ହସ୍ତାନ୍ତର କରିଛନ୍ତି।

ବିଦାୟ ପୂର୍ବରୁ ଜେନେରାଲ ଦ୍ୱିବେଦୀ ନୂଆଦିଲ୍ଲୀସ୍ଥିତ ଜାତୀୟ ଯୁଦ୍ଧ ସ୍ମାରକରେ ପୁଷ୍ପମାଲ୍ୟ ଅର୍ପଣ କରି ଦେଶ ପାଇଁ ବଳିଦାନ ଦେଇଥିବା ବୀର ଯବାନମାନଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ।

ବିଦାୟୀ ସମାରୋହରେ ସେ କହିଥିଲେ, ସୈନିକ ସ୍କୁଲରୁ ଆରମ୍ଭ ହୋଇଥିବା ତାଙ୍କ ଯାତ୍ରା ଅବିସ୍ମରଣୀୟ। ଭାରତୀୟ ସେନାର ଶକ୍ତି କୌଣସି ଜଣେ ବ୍ୟକ୍ତି ନୁହେଁ, ବରଂ ସୈନିକ, କମାଣ୍ଡର, ପୂର୍ବତନ ସେନା କର୍ମଚାରୀ, ସେମାନଙ୍କ ପରିବାର ଏବଂ ଦେଶବାସୀଙ୍କ ଅଟୁଟ ବିଶ୍ୱାସରୁ ଆସିଥାଏ। କର୍ତ୍ତବ୍ୟ ପାଳନ ସମୟରେ ସର୍ବୋଚ୍ଚ ବଳିଦାନ ଦେଇଥିବା ସମସ୍ତ ବୀର ଯବାନଙ୍କୁ ସେ ନମନ କରିଥିଲେ।

ଜେନେରାଲ ଦ୍ୱିବେଦୀ କହିଥିଲେ ଯେ, ଗତ ଦୁଇ ବର୍ଷ ଧରି ଭାରତୀୟ ସେନା ସମସ୍ତ ସୀମାରେ ଉଚ୍ଚସ୍ତରୀୟ ସତର୍କତା ଏବଂ ପ୍ରସ୍ତୁତି ବଜାୟ ରଖିଛି। ଉତ୍ତର ସୀମାରେ ଅପରେସନ୍ ସ୍ନୋ ଲିଓପାର୍ଡ ଏବଂ ପଶ୍ଚିମ ସୀମାରେ ଅପରେସନ୍ ସିନ୍ଦୂର ସେନାର ସାହସ, ଦକ୍ଷତା ଓ ପ୍ରସ୍ତୁତିର ଉଦାହରଣ ବୋଲି ସେ କହିଥିଲେ।

ସେ ଆହୁରି କହିଥିଲେ ଯେ, ଜାତୀୟ ସୁରକ୍ଷା କ୍ଷେତ୍ରରେ ସେନା, ନୌସେନା ଏବଂ ବାୟୁସେନା ମଧ୍ୟରେ ସମନ୍ୱୟ ପୂର୍ବାପେକ୍ଷା ଅଧିକ ସୁଦୃଢ଼ ହୋଇଛି। ଭବିଷ୍ୟତର ଯୁଦ୍ଧ ଯୁଗ୍ମ ଓ ସମନ୍ୱିତ ରଣନୀତି ଉପରେ ଆଧାରିତ ହେବ ବୋଲି ଉଲ୍ଲେଖ କରି ସେ କହିଥିଲେ, "ଏକାଠି ଦେଖିବା, ଏକାଠି ନିଷ୍ପତ୍ତି ନେବା ଏବଂ ଏକାଠି କାର୍ଯ୍ୟ କରିବା" ହେଉଛି ଆଗାମୀ ଦିନର ଦିଗ।

ନୂତନ ସେନାମୁଖ୍ୟ ଜେନେରାଲ ଧୀରଜ ସେଠଙ୍କ ପ୍ରଶଂସା କରି ଜେନେରାଲ ଦ୍ୱିବେଦୀ କହିଥିଲେ ଯେ, ସେ ଜଣେ ଅଭିଜ୍ଞ ଓ ଦକ୍ଷ ସାମରିକ ନେତା। ତାଙ୍କ ନେତୃତ୍ୱରେ ଭାରତୀୟ ସେନା ନିଜର ଗୌରବମୟ ପରମ୍ପରା, ବୃତ୍ତିଗତ ଦକ୍ଷତା ଓ ସାମରିକ ପ୍ରସ୍ତୁତିକୁ ବଜାୟ ରଖି ନୂଆ ଉଚ୍ଚତାରେ ପହଞ୍ଚିବ ବୋଲି ସେ ପୂର୍ଣ୍ଣ ବିଶ୍ୱାସ ବ୍ୟକ୍ତ କରିଥିଲେ।