ଭାରତୀୟ ସମ୍ବିଧାନ, ଆଇନ ଓ ମତପ୍ରକାଶର ସ୍ୱାଧୀନତାକୁ ନେଇ ଗଭୀର ଅଧ୍ୟୟନ କରୁଥିବା ଆଇନ ବିଶେଷଜ୍ଞ ଗୌତମ ଭାଟିଆଙ୍କୁ ମିଳିଛି ବଡ଼ ସମ୍ମାନ। ତାଙ୍କୁ ୨୦୨୬ ମସିହାର ଇନ୍‌ଫୋସିସ୍ ପୁରସ୍କାରରେ ସମ୍ମାନିତ କରାଯାଇଛି। ମାନବିକତା ଓ ସାମାଜିକ ବିଜ୍ଞାନ (Humanities and Social Sciences) ବର୍ଗରେ ତାଙ୍କୁ ଏହି ପୁରସ୍କାର ମିଳିଛି।

କେବଳ ଜଣେ ଆଇନ ବିଶେଷଜ୍ଞ ନୁହନ୍ତି, ଗୌତମ ଭାଟିଆ ଜଣେ ଲେଖକ ଓ ସାଇନ୍ସ ଫିକ୍ସନ୍ ଉପନ୍ୟାସକାର ଭାବେ ମଧ୍ୟ ପରିଚିତ। ଭାରତୀୟ ସମ୍ବିଧାନର ମୂଲ୍ୟବୋଧ, ସମାନତା ଓ ନ୍ୟାୟକୁ ନେଇ ତାଙ୍କର ଅଧ୍ୟୟନ ଏବଂ ଲେଖା ପାଇଁ ଏହି ସମ୍ମାନ ଦିଆଯାଇଛି।

ନ୍ୟାସନାଲ୍ ଲ’ ସ୍କୁଲ୍‌ରୁ ଅକ୍ସଫୋର୍ଡ ଓ ୟେଲ୍ ପର୍ଯ୍ୟନ୍ତ ଯାତ୍ରା

ଗୌତମ ଭାଟିଆ ବେଙ୍ଗାଲୁରୁସ୍ଥିତ ନ୍ୟାସନାଲ୍ ଲ’ ସ୍କୁଲ୍ ଅଫ୍ ଇଣ୍ଡିଆ ୟୁନିଭର୍ସିଟିରୁ ୨୦୧୧ରେ ବିଏ ଏଲ୍‌ଏଲ୍‌ବି ଡିଗ୍ରୀ ହାସଲ କରିଥିଲେ। ଏହାପରେ ରୋଡ୍ସ ସ୍କଲାର୍ ଭାବେ ଅକ୍ସଫୋର୍ଡର ବାଲିଓଲ୍ କଲେଜରେ ଉଚ୍ଚଶିକ୍ଷା ଗ୍ରହଣ କରିଥିଲେ।

୨୦୧୨ରେ ଅକ୍ସଫୋର୍ଡରୁ ବ୍ୟାଚେଲର ଅଫ୍ ସିଭିଲ୍ ଲ’ ଏବଂ ୨୦୧୩ରେ ଏମ୍‌ଫିଲ୍ ଡିଗ୍ରୀ ହାସଲ କରିଥିଲେ। ପରେ ୨୦୧୪ରେ ଆମେରିକାର ୟେଲ୍ ୟୁନିଭର୍ସିଟିରୁ ଏଲ୍‌ଏଲ୍‌ଏମ୍ କରିଥିଲେ। ଏହାପରେ ପୁଣି ଅକ୍ସଫୋର୍ଡ ଫେରି ୨୦୨୧ରେ ଆଇନରେ ଡକ୍ଟରେଟ୍ ଡିଗ୍ରୀ ସମାପ୍ତ କରିଥିଲେ।

ସମ୍ବିଧାନ ଓ ମତପ୍ରକାଶର ସ୍ୱାଧୀନତା ଉପରେ ପାଞ୍ଚଟି ପୁସ୍ତକ

ଭାରତୀୟ ଆଇନ ଓ ସମ୍ବିଧାନକୁ ନେଇ ଗୌତମ ଭାଟିଆ ପାଞ୍ଚଟି ପୁସ୍ତକ ରଚନା କରିଛନ୍ତି। ତାଙ୍କର ପ୍ରଥମ ପୁସ୍ତକ ‘Offend, Shock, or Disturb: Free Speech Under the Indian Constitution’ ୨୦୧୫ରେ ପ୍ରକାଶିତ ହୋଇଥିଲା। ଏଥିରେ ଭାରତୀୟ ସମ୍ବିଧାନ ଅନୁସାରେ ମତପ୍ରକାଶର ସ୍ୱାଧୀନତା ଓ ଏହା ସହ ଜଡ଼ିତ ବିଭିନ୍ନ ଆଇନଗତ ପ୍ରଶ୍ନ ଉପରେ ଆଲୋଚନା କରାଯାଇଛି।

ତାଙ୍କର ଅନ୍ୟ ପୁସ୍ତକଗୁଡ଼ିକ ମଧ୍ୟରେ ‘The Transformative Constitution: A Radical Biography in Nine Acts’, ‘Horizontal Rights: An Institutional Approach’, ‘Unsealed Covers: A Decade of the Constitution, The Courts, and The State’ ଏବଂ ‘The Indian Constitution: A Conversation with Power’ ରହିଛି।

ଏହି ପୁସ୍ତକଗୁଡ଼ିକରେ ରାଜ୍ୟର କ୍ଷମତା, ନାଗରିକଙ୍କ ଅଧିକାର, ସମାନତା, ନ୍ୟାୟ ଓ ମାନବିକ ମୂଲ୍ୟବୋଧ ଭଳି ବିଷୟକୁ ଗୁରୁତ୍ୱ ଦିଆଯାଇଛି।

ଆଇନ ବିଶେଷଜ୍ଞ ସହ ସାଇନ୍ସ ଫିକ୍ସନ୍ ଲେଖକ

ଗୌତମ ଭାଟିଆଙ୍କ ବ୍ୟକ୍ତିତ୍ୱର ଆଉ ଏକ ଆକର୍ଷଣୀୟ ଦିଗ ହେଉଛି ତାଙ୍କର ସାହିତ୍ୟ ପ୍ରତି ରୁଚି। ଆଇନ ଓ ସମ୍ବିଧାନ ଉପରେ ଗବେଷଣା କରିବା ସହିତ ସେ ସାଇନ୍ସ ଫିକ୍ସନ୍ ଲେଖକ ଓ ଉପନ୍ୟାସକାର ଭାବେ ମଧ୍ୟ ନିଜର ପରିଚୟ ସୃଷ୍ଟି କରିଛନ୍ତି।

ଇନ୍‌ଫୋସିସ୍ ପୁରସ୍କାରର ବିଚାରକ ମଣ୍ଡଳୀ ତାଙ୍କର ବ୍ୟାପକ ଜ୍ଞାନ, ଗବେଷଣା ଓ ବିଭିନ୍ନ ବିଷୟକୁ ଯୋଡ଼ି ଯୁକ୍ତିସଙ୍ଗତ ଭାବେ ଆଇନକୁ ବିଶ୍ଳେଷଣ କରିବାର କ୍ଷମତାକୁ ପ୍ରଶଂସା କରିଛନ୍ତି। ଆଇନ ସହିତ ଅର୍ଥନୀତି, ସମାଜବିଜ୍ଞାନ, ରାଜନୈତିକ ଚିନ୍ତାଧାରା ଓ ନୈତିକ ଦର୍ଶନ ଭଳି ବିଷୟରେ ତାଙ୍କର ଅଧ୍ୟୟନକୁ ମଧ୍ୟ ବିଚାରକମାନେ ଗୁରୁତ୍ୱ ଦେଇଛନ୍ତି।

ଇନ୍‌ଫୋସିସ୍ ପୁରସ୍କାରରେ ମିଳିବ ୧ ଲକ୍ଷ ଡଲାର

ଇନ୍‌ଫୋସିସ୍ ସାଇନ୍ସ ଫାଉଣ୍ଡେସନ୍ ପକ୍ଷରୁ ୨୦୨୬ ପାଇଁ ଛଅଟି ବର୍ଗରେ ମୋଟ ଛଅଜଣ ଗବେଷକଙ୍କୁ ଚୟନ କରାଯାଇଛି। ପ୍ରତ୍ୟେକ ବିଜେତାଙ୍କୁ ଏକ ସ୍ୱର୍ଣ୍ଣ ପଦକ, ପ୍ରଶସ୍ତିପତ୍ର ସହ ୧ ଲକ୍ଷ ଆମେରିକୀୟ ଡଲାର ପୁରସ୍କାର ରାଶି ପ୍ରଦାନ କରାଯିବ।

୨୦୦୯ରେ ଆରମ୍ଭ ହୋଇଥିବା ଏହି ପୁରସ୍କାର ଗବେଷଣା ଓ ଶିକ୍ଷା କ୍ଷେତ୍ରରେ ଉତ୍କର୍ଷତାକୁ ସ୍ୱୀକୃତି ଦେବା ଉଦ୍ଦେଶ୍ୟରେ ପ୍ରଦାନ କରାଯାଏ। ୨୦୨୪ରୁ ଏହି ପୁରସ୍କାରରେ ୪୦ ବର୍ଷରୁ କମ୍ ବୟସର ଗବେଷକଙ୍କୁ ଅଧିକ ଗୁରୁତ୍ୱ ଦିଆଯାଉଛି।