ସମଗ୍ର ୟୁରୋପରେ ଜାରି ରହିଥିବା ପ୍ରଚଣ୍ଡ ଗ୍ରୀଷ୍ମ ପ୍ରବାହ ମଧ୍ୟରେ ଫ୍ରାନ୍ସ ସବୁଠାରୁ ଅଧିକ ପ୍ରଭାବିତ ହୋଇଛି। ଅତ୍ୟଧିକ ଉତ୍ତାପ ଓ ପାଣିପାଗ ଜନିତ ବିପର୍ଯ୍ୟୟ କାରଣରୁ ଦେଶରେ ଏପର୍ଯ୍ୟନ୍ତ ୪୦ରୁ ଅଧିକ ଲୋକଙ୍କ ମୃତ୍ୟୁ ଘଟିଥିବା ସୂଚନା ମିଳିଛି। ଗରମରୁ ରକ୍ଷା ପାଇବା ପାଇଁ ଅସୁରକ୍ଷିତ ନଦୀ, ହ୍ରଦ ଓ କେନାଲରେ ଗାଧୋଇବାକୁ ଯାଇ ଅନେକ ଲୋକ ବୁଡ଼ି ପ୍ରାଣ ହରାଇଥିବା ଘଟଣା ମଧ୍ୟ ସାମ୍ନାକୁ ଆସିଛି।

ପରିସ୍ଥିତିର ଗମ୍ଭୀରତାକୁ ଦୃଷ୍ଟିରେ ରଖି ଫ୍ରାନ୍ସର ଜାତୀୟ ପାଣିପାଗ ସଂସ୍ଥାମେଟିଓ-ଫ୍ରାନ୍ସଦେଶର ଅର୍ଦ୍ଧାଧିକ ଅଞ୍ଚଳରେ ସର୍ବୋଚ୍ଚ ସ୍ତରରରେଡ୍ ଆଲର୍ଟଜାରି କରିଛି। ବିଶେଷକରି ଶିଶୁ, ବୃଦ୍ଧ ଓ ଅସୁସ୍ଥ ବ୍ୟକ୍ତିମାନଙ୍କୁ ଘରେ ରହିବା ସହ ପର୍ଯ୍ୟାପ୍ତ ପାଣି ପିଇବାକୁ ପରାମର୍ଶ ଦିଆଯାଇଛି।

ରାଜଧାନୀ ପ୍ୟାରିସ୍ ସମେତ ସମଗ୍ର ଫ୍ରାନ୍ସରେ ତାପମାତ୍ରା ସମସ୍ତ ପୂର୍ବ ରେକର୍ଡକୁ ଅତିକ୍ରମ କରିଛି। ଚଳିତ ସପ୍ତାହରେ ପ୍ୟାରିସ୍ରେ ଲଗାତାର ୪୦ ଡିଗ୍ରୀ ସେଲସିୟସ୍ରୁ ଅଧିକ ତାପମାତ୍ରା ରେକର୍ଡ ହୋଇଛି, ଯାହା ଗତ ୧୪୭ ବର୍ଷରେ ପ୍ରଥମ ଘଟଣା। ଦେଶର ହାରାହାରି ତାପମାତ୍ରା ୨୯.୮ ଡିଗ୍ରୀ ସେଲସିୟସ୍ରେ ପହଞ୍ଚି ନୂତନ ରେକର୍ଡ ସୃଷ୍ଟି କରିଛି। ସେହିପରି ଦକ୍ଷିଣ-ପଶ୍ଚିମ ଫ୍ରାନ୍ସର ପିସୋସ୍ରେ ସର୍ବାଧିକ ୪୪.୩ ଡିଗ୍ରୀ ସେଲସିୟସ୍ ତାପମାତ୍ରା ରେକର୍ଡ କରାଯାଇଛି।

ୟୁରୋପର ଅଧିକାଂଶ ଘରରେ ଏୟାର କଣ୍ଡିସନର (ଏସି) ବ୍ୟବସ୍ଥା ନଥିବାରୁ ଏହି ଅସହ୍ୟ ଗରମ ସାଧାରଣ ଜୀବନକୁ ଗୁରୁତର ଭାବେ ପ୍ରଭାବିତ କରିଛି। କେବଳ ଫ୍ରାନ୍ସ ନୁହେଁ, ବ୍ରିଟେନ, ସ୍ପେନ୍ ଓ ଇଟାଲୀରେ ମଧ୍ୟ ତାପମାତ୍ରା ଅସାଧାରଣ ଭାବେ ବୃଦ୍ଧି ପାଇଛି ଏବଂ ସରକାରମାନେ ସତର୍କତା ଜାରି କରିଛନ୍ତି।

ବୈଜ୍ଞାନିକମାନଙ୍କ ମତରେ, ଜୁନ୍ ମାସରୁ ଏଭଳି ଚରମ ଗ୍ରୀଷ୍ମ ପ୍ରବାହ ଦେଖାଯିବା ମାନବ-ସୃଷ୍ଟ ଜଳବାୟୁ ପରିବର୍ତ୍ତନର ସ୍ପଷ୍ଟ ସଙ୍କେତ। ଆଗାମୀ ବର୍ଷଗୁଡ଼ିକରେ ଏଭଳି ହିଟୱେଭ୍ ଆହୁରି ଦୀର୍ଘସ୍ଥାୟୀ ଓ ଭୟଙ୍କର ହୋଇପାରେ ବୋଲି ସେମାନେ ସତର୍କ କରିଛନ୍ତି।