ୟୁଏସ୍‌ଏ ଷ୍ଟ୍ରାଇକର୍ ଫୋଲାରିନ୍ ବାଲୋଗନଙ୍କୁ ରେଡ୍ କାର୍ଡ ପ୍ରଦାନ କରାଯିବା ପରେ ବ୍ରାଜିଲର ରେଫରି ରାଫେଲ କ୍ଲଜ୍‌ଙ୍କ ନିଷ୍ପତ୍ତିକୁ ନେଇ ଚର୍ଚ୍ଚା ଜୋର ଧରିଛି। ଏହି ଘଟଣାକୁ ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରଶ୍ନ ଉଠାଇଥିଲେ। ତେବେ ବିଶ୍ୱ ଫୁଟବଲର ସର୍ବୋଚ୍ଚ ସଂସ୍ଥା ଫିଫା ରେଫରିଙ୍କ ନିଷ୍ପତ୍ତିକୁ ସମର୍ଥନ କରିଛି।

ରାଉଣ୍ଡ-୩୨ ମ୍ୟାଚ୍‌ରେ ବୋସନିଆ ଓ ହାର୍ଜେଗୋଭିନା ବିପକ୍ଷରେ ଖେଳୁଥିବା ବେଳେ ବାଲୋଗନ୍ ପ୍ରତିପକ୍ଷ ଖେଳାଳି ତାରିକ ମୁହାରେମୋଭିକଙ୍କ ଗୋଇଠିକୁ ବୁଟ୍‌ରେ ଆଘାତ କରିଥିଲେ। 'ଭାର୍' ଯାଞ୍ଚ ପରେ ରେଫରି ରାଫେଲ କ୍ଲଜ୍ ତାଙ୍କୁ ରେଡ୍ କାର୍ଡ ଦେଖାଇଥିଲେ।

ପରେ ଫିଫା ବାଲୋଗନଙ୍କ ରେଡ୍ କାର୍ଡ ନିଲମ୍ବନକୁ ବାତିଲ କରିଥିଲେ ମଧ୍ୟ ମ୍ୟାଚ୍ ସମୟରେ ରେଫରିଙ୍କ ନିଷ୍ପତ୍ତି ସଠିକ୍ ଥିଲା ବୋଲି ସ୍ପଷ୍ଟ କରିଛି।

ଡୋନାଲ୍ଡ ଟ୍ରମ୍ପ କହିଥିଲେ ଯେ, ଏହି ନିଷ୍ପତ୍ତିର ସମୀକ୍ଷା ହେବା ଉଚିତ ଥିଲା। ସେ ରେଫରିଙ୍କ ନାମ ଉଲ୍ଲେଖ ନ କରି କହିଥିଲେ ଯେ, ତାଙ୍କ ଅତୀତ ରେକର୍ଡ ଯାଞ୍ଚ କଲେ କିଛି ସନ୍ଦେହ ସୃଷ୍ଟି ହୋଇପାରେ।

ଏହାର ଜବାବରେ ଫିଫା କହିଛି ଯେ ରାଫେଲ କ୍ଲଜ୍ ଜଣେ ଏଲିଟ୍ ବିଶ୍ୱକପ୍ ରେଫରି ଏବଂ ନିଜ କ୍ୟାରିୟରରେ ସଚ୍ଚୋଟତା ଓ ନିଷ୍ଠା ସହ ଦାୟିତ୍ୱ ପାଳନ କରିଆସୁଛନ୍ତି। ଫୁଟବଲ୍ ଖେଳରେ ରେଫରିଙ୍କ ଭୂମିକାକୁ ସମ୍ମାନ କରିବା ଆବଶ୍ୟକ ବୋଲି ଫିଫା ଉଲ୍ଲେଖ କରିଛି।

ଫିଫାର ମୁଖ୍ୟ ରେଫରି ଅଧିକାରୀ ତଥା ରେଫରି କମିଟି ଅଧ୍ୟକ୍ଷ ପିଏରଲୁଇଗି କୋଲିନା କହିଛନ୍ତି ଯେ, ୪୫ ବର୍ଷୀୟ ରାଫେଲ କ୍ଲଜ୍ ୬୦୦ରୁ ଅଧିକ ଆନ୍ତର୍ଜାତିକ ଓ ଘରୋଇ ମ୍ୟାଚ୍ ପରିଚାଳନା କରିସାରିଛନ୍ତି। ସେ ୨୦୨୨ କତାର ବିଶ୍ୱକପ୍‌ରେ ମଧ୍ୟ ରେଫରି ଥିଲେ ଏବଂ ତାଙ୍କ ଅଭିଜ୍ଞତା ଉପରେ ଫିଫାର ପୂର୍ଣ୍ଣ ଭରସା ରହିଛି।