ମୁମ୍ବାଇ: Bigg Boss 20ର Weekend Ka Vaar ଏପିସୋଡ୍‌କୁ ନେଇ ଏବେ ଚର୍ଚ୍ଚା ବଢ଼ିଛି। ନୂଆ ପ୍ରୋମୋରେ ଅଭିନେତ୍ରୀ ଫାତିମା ସନା ଶେଖ୍ ହୋଷ୍ଟ ସଲମାନ ଖାନଙ୍କ ସହ ଟ୍ରୋଲିଂ ଏବଂ ସାଇବରବୁଲିଂ ପ୍ରସଙ୍ଗରେ କଥା ହୋଇଥିବା ଦେଖାଯାଇଛି। ଫାତିମା ନିଜ ୱେବ୍ ସିରିଜ୍ Hunkkaar: The Roarର ପ୍ରମୋସନ ପାଇଁ ଶୋ’ରେ ଯୋଗ ଦେଇଛନ୍ତି।

ପ୍ରୋମୋରେ ଫାତିମା ସଲମାନଙ୍କୁ ଉଦ୍ଦେଶ୍ୟ କରି କହିଛନ୍ତି ଯେ, ଏଥର ସେ ଟ୍ରୋଲ୍‌ମାନଙ୍କୁ ଯେଉଁଭଳି ଜବାବ ଦେଇଛନ୍ତି ଏବଂ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ନିଜ ମତ ରଖିଛନ୍ତି, ତାହା ବଡ଼ କଥା। ତାଙ୍କ ମତରେ, ସାର୍ବଜନୀନ ଜୀବନରେ ପ୍ରଭାବଶାଳୀ ବ୍ୟକ୍ତିମାନେ ଏଭଳି ବିଷୟରେ ମତ ରଖିଲେ ଏହାର ବ୍ୟାପକ ପ୍ରଭାବ ପଡ଼ିପାରେ।

ଫାତିମାଙ୍କ ଏହି ମନ୍ତବ୍ୟ ପୂର୍ବତନ Weekend Ka Vaar ଏପିସୋଡ୍‌ରେ ସଲମାନଙ୍କ ଟ୍ରୋଲିଂ ବିରୋଧୀ ଆଲୋଚନାକୁ ନେଇ ଥିଲା। ସଲମାନ ଅନଲାଇନ୍‌ରେ ଅଭିନେତା-ଅଭିନେତ୍ରୀଙ୍କ ଶରୀର, ବୟସ ଓ ଚେହେରାକୁ ନେଇ ହେଉଥିବା ଟିପ୍ପଣୀ ସମ୍ପର୍କରେ କଥା କହିଥିଲେ।

ସଲମାନ ବିଶେଷକରି ମହିଳାମାନଙ୍କୁ ନେଇ ହେଉଥିବା ବଡି-ଶେମିଂ ଏବଂ ପ୍ରସବ ପରବର୍ତ୍ତୀ ଶରୀରକୁ ନେଇ ଟ୍ରୋଲିଂ ପ୍ରସଙ୍ଗ ଉଠାଇଥିଲେ। ଏହା ସହ କିଛି ପାପାରାଜି ଫଟୋଗ୍ରାଫି ପ୍ରଥାକୁ ନେଇ ମଧ୍ୟ ସେ ପ୍ରଶ୍ନ ଉଠାଇଥିଲେ।

ସଲମାନ ନିଜେ ମଧ୍ୟ ବୟସ ଓ ଓଜନକୁ ନେଇ ଟ୍ରୋଲିଂର ଉଦାହରଣ ଦେଇଥିଲେ। ଟ୍ରୋଲିଂ ଏବଂ ସମାଲୋଚନା ମଧ୍ୟରେ ତଫାତ ଥିବା କଥା କହି ସେ କାହାର କାମ କିମ୍ବା ଫିଲ୍ମକୁ ନେଇ ମତାମତ ଦେବା ଏବଂ ବ୍ୟକ୍ତିଗତ ଆକ୍ରମଣ କରିବା ଏକ ନୁହେଁ ବୋଲି ମତ ରଖିଥିଲେ।

ଏବେ ଫାତିମାଙ୍କ ପ୍ରଶଂସା ପରେ Bigg Boss 20ର ଏହି Weekend Ka Vaar ଏପିସୋଡ୍‌କୁ ନେଇ ଦର୍ଶକଙ୍କ ଆଗ୍ରହ ବଢ଼ିଛି। ଏହି ଏପିସୋଡ୍‌ରେ ଶୋ’ର ଅନ୍ୟ କିଛି ବିଷୟକୁ ନେଇ ମଧ୍ୟ ସଲମାନ ପ୍ରତିଯୋଗୀମାନଙ୍କୁ ସମ୍ବୋଧନ କରିବେ।