ଭାରତର ପୂର୍ବତନ କ୍ରିକେଟର ବିନୋଦ କାମ୍ବଲିଙ୍କ ସ୍ୱାସ୍ଥ୍ୟକୁ ନେଇ ପୁଣି ଚର୍ଚ୍ଚା ଆରମ୍ଭ ହୋଇଛି। ଠାଣେର Nidan Centre for Elderly Careରେ ରହି ସେ ବର୍ତ୍ତମାନ ଚିକିତ୍ସା ନେଉଥିବା କଥା ନିଜେ ଏକ ଭିଡିଓ ବାର୍ତ୍ତାରେ କହିଛନ୍ତି।

ଭିଡିଓରେ କାମ୍ବଲି କହିଛନ୍ତି ଯେ କେନ୍ଦ୍ରରେ ତାଙ୍କୁ ଭଲ ଯତ୍ନ ମିଳୁଛି। ସେଠାକାର ସୁବିଧା, ପରିଚ୍ଛନ୍ନତା ଓ ଯତ୍ନକୁ ସେ ପ୍ରଶଂସା କରିବା ସହ ଏଠାରେ ତାଙ୍କୁ ଅନେକ ଭଲପାଇବା ଓ ସମ୍ମାନ ମିଳୁଥିବା କହିଛନ୍ତି। ଏହି କାରଣରୁ ଘରଠାରୁ ଦୂରରେ ଥିବା ଅନୁଭବ ହେଉନାହିଁ ବୋଲି ସେ କହିଛନ୍ତି।

ତେବେ ଭିଡିଓରେ କାମ୍ବଲିଙ୍କୁ କଥା କହିବା ସମୟରେ କିଛି ସମସ୍ୟା ହେଉଥିବା ଦେଖାଯାଇଛି। ଏହା ପରେ ସୋସିଆଲ ମିଡିଆରେ ତାଙ୍କ ପ୍ରଶଂସକମାନେ ତାଙ୍କ ସ୍ୱାସ୍ଥ୍ୟ ନେଇ ଚିନ୍ତା ପ୍ରକାଶ କରିଛନ୍ତି। ତେବେ ବର୍ତ୍ତମାନର ଭିଡିଓରେ କାମ୍ବଲି ନିଜେ ଚିକିତ୍ସା ଚାଲିଥିବା ଏବଂ ଯତ୍ନ ଭଲ ଭାବେ ମିଳୁଥିବା କହିଛନ୍ତି।

କାମ୍ବଲିଙ୍କ ସ୍ୱାସ୍ଥ୍ୟକୁ ନେଇ ପୂର୍ବରୁ ମଧ୍ୟ ଚିନ୍ତା ପ୍ରକାଶ ପାଇଥିଲା। ଡିସେମ୍ବର ୨୦୨୪ରେ ସ୍ୱାସ୍ଥ୍ୟ ଅବନତି ପରେ ସେ ଠାଣେର ଏକ ହସ୍ପିଟାଲରେ ଭର୍ତ୍ତି ହୋଇଥିଲେ। ସେତେବେଳେ ଡାକ୍ତରୀ ପରୀକ୍ଷାରେ ମସ୍ତିଷ୍କରେ ରକ୍ତ ଜମାଟ ସମ୍ପର୍କିତ ସମସ୍ୟା ସାମ୍ନାକୁ ଆସିଥିଲା।

କ୍ରିକେଟର ଭାବେ କାମ୍ବଲି ଭାରତ ପାଇଁ ୧୭ଟି ଟେଷ୍ଟ ଓ ୧୦୪ଟି ଦିନିକିଆ ଖେଳିଥିଲେ। ଟେଷ୍ଟରେ ସେ ୧,୦୮୪ ରନ୍‌ ଏବଂ ଦିନିକିଆରେ ୨,୪୭୭ ରନ୍‌ କରିଥିଲେ।