ଜମ୍ମୁ-କଶ୍ମୀରରେ କଶ୍ମୀରୀ ପଣ୍ଡିତ କର୍ମଚାରୀଙ୍କୁ ଧମକ ମିଳୁଥିବା ଘଟଣାକୁ ନେଇ ନ୍ୟାସନାଲ କନଫରେନ୍ସ ମୁଖ୍ୟ ତଥା ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲା ବଡ଼ ଅଭିଯୋଗ ଆଣିଛନ୍ତି। ସେ ପ୍ରଶ୍ନ କରିଛନ୍ତି ଯେ, ଯଦି କଶ୍ମୀରୀ ପଣ୍ଡିତଙ୍କୁ ଧମକ ଦିଆଯାଉଛି, ତେବେ ଜମ୍ମୁ-କଶ୍ମୀରରେ କାର୍ଯ୍ୟରତ ବରିଷ୍ଠ ହିନ୍ଦୁ ଅଧିକାରୀମାନଙ୍କୁ ସମାନ ଧମକ କାହିଁକି ଦିଆଯାଉନାହିଁ?

ଅନନ୍ତନାଗରେ କଥା ହେଉଥିବା ବେଳେ ଫାରୁକ ଅବଦୁଲ୍ଲା ଅଭିଯୋଗ କରିଥିଲେ ଯେ, କଶ୍ମୀରୀ ପଣ୍ଡିତଙ୍କୁ ଦିଆଯାଉଥିବା ଧମକ ପଛରେ ଜମ୍ମୁ-କଶ୍ମୀରର ଲେଫ୍ଟନାଣ୍ଟ ଗଭର୍ଣ୍ଣରଙ୍କ ନେତୃତ୍ୱାଧୀନ ପ୍ରଶାସନର ଷଡ଼ଯନ୍ତ୍ର ଥାଇପାରେ। ଭୟର ପରିବେଶ ସୃଷ୍ଟି କରି ଜମ୍ମୁ-କଶ୍ମୀରକୁ ପୁଣି ରାଜ୍ୟ ମାନ୍ୟତା ଦେବା ପ୍ରକ୍ରିୟାକୁ ଅଟକାଇବା ଉଦ୍ଦେଶ୍ୟରେ ଏପରି କରାଯାଉଥିବା ସେ ଦାବି କରିଛନ୍ତି।

ତାଙ୍କ ଏହି ମନ୍ତବ୍ୟକୁ ନେଇ ବିଜେପି ତୀବ୍ର ପ୍ରତିକ୍ରିୟା ଦେଇଛି। ବିଜେପି ଜାତୀୟ ମୁଖପାତ୍ର ପ୍ରଦୀପ ଭଣ୍ଡାରୀ ଫାରୁକଙ୍କ ବୟାନକୁ ଆତଙ୍କବାଦୀଙ୍କ ପ୍ରତି ‘ସଫ୍ଟ ସପୋର୍ଟ’ ବୋଲି ଅଭିହିତ କରିଛନ୍ତି। ବିଜେପିର ଅଭିଯୋଗ ହେଉଛି, ଫାରୁକଙ୍କ ମନ୍ତବ୍ୟ କଶ୍ମୀରୀ ହିନ୍ଦୁଙ୍କ ଉପରେ ଥିବା ଧମକକୁ ହାଲୁକା କରି ଦେଖାଉଛି।

ଅଗଷ୍ଟ ମାସରେ କଶ୍ମୀରୀ ପଣ୍ଡିତଙ୍କୁ ଟାର୍ଗେଟ କରି ଦୁଇଟି ଧମକପତ୍ର ସାମ୍ନାକୁ ଆସିଥିଲା। ସୁରକ୍ଷା ଏଜେନ୍ସି ଓ ପୁଲିସ ସୂତ୍ର ଅନୁସାରେ, ଏହି ଧମକପତ୍ରଗୁଡ଼ିକ ‘ୟୁନାଇଟେଡ୍ ଲିବରେସନ୍ କାଉନସିଲ୍’ (ULC) ନାମରେ ଜାରି ହୋଇଥିଲା ଏବଂ ଏହା ନିଷିଦ୍ଧ ଆତଙ୍କବାଦୀ ସଂଗଠନ ଲଶ୍କର-ଏ-ତୋଇବାର ଏକ ସମ୍ଭାବ୍ୟ ଫ୍ରଣ୍ଟ୍ ହୋଇପାରେ ବୋଲି ସନ୍ଦେହ କରାଯାଉଛି।

ଅନ୍ୟପକ୍ଷରେ, ଜମ୍ମୁ-କଶ୍ମୀର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ପୂର୍ବରୁ ଏପରି ଧମକକୁ ଗୁରୁତର ଭାବେ ନେବାକୁ କହିଥିଲେ। ଧମକ ପାଇଥିବା କର୍ମଚାରୀଙ୍କ ସୁରକ୍ଷା ସୁନିଶ୍ଚିତ କରିବା ସହ ଧମକର ଉତ୍ସ ଖୋଜିବା ପାଇଁ ପୁଲିସ ଓ ଗୁଇନ୍ଦା ଏଜେନ୍ସିକୁ ତଦନ୍ତ କରିବାକୁ ସେ ଆହ୍ୱାନ କରିଥିଲେ।