‘ଆୱାରାପନ୍ ୨’କୁ ନେଇ ଦର୍ଶକଙ୍କ ମଧ୍ୟରେ ଉତ୍ସାହ ବଢ଼ୁଥିବା ବେଳେ ବଲିଉଡ୍ ଅଭିନେତା ଇମ୍ରାନ୍ ହାଶ୍ମି ତାଙ୍କ ଆଗାମୀ ହରର ଫିଲ୍ମ ‘ରୁହ୍’ର ଘୋଷଣା କରି ସମସ୍ତଙ்କୁ ଚମକାଇ ଦେଇଛନ୍ତି। ୨୦୨୭ ମସିହାରେ ପ୍ରେକ୍ଷାଳୟରେ ମୁକ୍ତିଲାଭ କରିବାକୁ ଥିବା ଏହି ଫିଲ୍ମର ଟିଜର ମଙ୍ଗଳବାର ସୋସିଆଲ ମିଡିଆରେ ଜାରି କରାଯାଇଛି।

ଟିଜରରେ ଏକ ରହସ୍ୟମୟ ଓ ଭୟଙ୍କର ପରିବେଶ ଦେଖିବାକୁ ମିଳିଛି। ଧୀରେ ଧୀରେ ସସ୍ପେନ୍ସ ବଢ଼ୁଥିବା ବେଳେ ଶେଷରେ ଇମ୍ରାନ୍ ହାଶ୍ମିଙ୍କ ଏକ ଭୟଙ୍କର ଅବତାର ସାମ୍ନାକୁ ଆସୁଛି, ଯେଉଁଥିରେ ତାଙ୍କ ଆଖି କଳା ହୋଇଯାଉଥିବା ଦେଖାଯାଏ। ଏହା ଫିଲ୍ମରେ ଅଲୌକିକ ଶକ୍ତିର ଉପସ୍ଥିତିକୁ ସୂଚିତ କରୁଛି।

ଟିଜରରେ ବ୍ୟବହୃତ ଟ୍ୟାଗଲାଇନ୍ — “When the legend revisits the darkness, a nightmare is born” — ଫିଲ୍ମର ରହସ୍ୟମୟ ଓ ଭୟଙ୍କର କାହାଣୀ ପ୍ରତି ଇଙ୍ଗିତ କରୁଛି। ମୟଙ୍କ ଶର୍ମାଙ୍କ ନିର୍ଦ୍ଦେଶନାରେ ନିର୍ମିତ ଏହି ଚଳଚ୍ଚିତ୍ରକୁ Vicked Films Production ପ୍ରସ୍ତୁତ କରୁଛି।

‘ରୁହ୍’କୁ ଏକ ‘ମ୍ୟୁଜିକାଲ୍ ହରର ସ୍ପେକ୍ଟାକଲ୍’ ଭାବେ ପ୍ରଚାର କରାଯାଉଛି। ଫିଲ୍ମଟି ହିନ୍ଦୀ, ତେଲୁଗୁ ଓ ତାମିଲ ଭାଷାରେ ମୁକ୍ତିଲାଭ କରିବ, ଯାହା ଏହାକୁ ପାନ୍-ଇଣ୍ଡିଆ ଦର୍ଶକଙ୍କ ପାଖରେ ପହଞ୍ଚାଇବ।

ଫିଲ୍ମର ନାୟିକା କିଏ ହେବେ, ସେନେଇ ନିର୍ମାତାମାନେ ଏପର୍ଯ୍ୟନ୍ତ କୌଣସି ସୂଚନା ଦେଇନାହାନ୍ତି। ଏହା ଦର୍ଶକଙ୍କ ମଧ୍ୟରେ ଆହୁରି କୌତୁହଳ ସୃଷ୍ଟି କରିଛି।

ସୋସିଆଲ ମିଡିଆରେ ଫିଲ୍ମ ଘୋଷଣା ପରେ ଇମ୍ରାନ୍ ହାଶ୍ମିଙ୍କ ପ୍ରଶଂସକମାନେ ଉତ୍ସାହ ପ୍ରକାଶ କରିଛନ୍ତି। ଅନେକେ ତାଙ୍କୁ ‘ହରର ଜାନରର କିଙ୍ଗ’ ବୋଲି ଅଭିହିତ କରିଛନ୍ତି। ‘ରାଜ୍ ୨’, ‘ରାଜ୍ ୩’, ‘ଏକ୍ ଥି ଡାୟନ୍’, ‘ଡିବ୍ବୁକ୍’ ଏବଂ ‘ଦ ବଡି’ ଭଳି ଚଳଚ୍ଚିତ୍ର ମାଧ୍ୟମରେ ସେ ହରର ଧାରାରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ।