ଇ-୨୦ ପେଟ୍ରୋଲ୍ ବ୍ୟବହାର କରୁଥିବା ଯାନବାହନର ବୀମା କ୍ଲେମ୍ ବାତିଲ୍ ହୋଇପାରେ ବୋଲି ଚାଲିଥିବା ଚର୍ଚ୍ଚାକୁ କେନ୍ଦ୍ର ସରକାର ଖଣ୍ଡନ କରିଛନ୍ତି। ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ମଙ୍ଗଳବାର ସ୍ପଷ୍ଟ କରିଛି ଯେ, ଇ-୨୦ ପେଟ୍ରୋଲ୍ ବ୍ୟବହାର କଲେ ଗାଡ଼ିର ବୀମା ସୁରକ୍ଷା କିମ୍ବା କ୍ଲେମ୍ ପ୍ରକ୍ରିୟା ଉପରେ କୌଣସି ନକାରାତ୍ମକ ପ୍ରଭାବ ପଡ଼ିବ ନାହିଁ।

ମନ୍ତ୍ରଣାଳୟ କହିଛି ଯେ, ବୀମା କମ୍ପାନୀ, ଯାନ ନିର୍ମାତା ଏବଂ ଅନ୍ୟ ସମ୍ପୃକ୍ତ ଅଂଶୀଦାରଙ୍କ ସହ ଆଲୋଚନା ପରେ ଏହା ସ୍ପଷ୍ଟ ହୋଇଛି ଯେ ଇ-୨୦ ଇନ୍ଧନ ସମ୍ପର୍କିତ ଆଶଙ୍କାଗୁଡ଼ିକ ଭିତ୍ତିହୀନ। ତେଣୁ ଗ୍ରାହକମାନେ ନିର୍ଭୟରେ ଏହି ଇନ୍ଧନ ବ୍ୟବହାର କରିପାରିବେ।

ସରକାର ଦର୍ଶାଇଛନ୍ତି ଯେ ପେଟ୍ରୋଲରେ ଇଥାନଲ ମିଶ୍ରଣ କରିବା ଏକ ବିଶ୍ୱସ୍ତରୀୟ ଭାବେ ସ୍ୱୀକୃତ ପଦ୍ଧତି। ଆମେରିକା, ବ୍ରାଜିଲ ଏବଂ ଜାପାନ ଭଳି ଦେଶ ଦୀର୍ଘ ଦିନ ଧରି ଏହି ପ୍ରଣାଳୀକୁ ସଫଳତାର ସହ ଅନୁସରଣ କରୁଛନ୍ତି। ବ୍ରାଜିଲରେ ତ ବର୍ଷ ଧରି ଇ-୨୭ ପେଟ୍ରୋଲ୍ ସାଧାରଣ ମାନକ ଇନ୍ଧନ ଭାବେ ବ୍ୟବହୃତ ହେଉଛି।

ସୂଚନା ଅନୁସାରେ, ଭାରତର ଇଥାନଲ ମିଶ୍ରଣ କାର୍ଯ୍ୟକ୍ରମ ଦେଶର ଅଶୋଧିତ ତୈଳ ଆମଦାନୀ ଉପରେ ନିର୍ଭରତା କମାଇବାରେ ବଡ଼ ଭୂମିକା ନେଇଛି। ଏହା ଫଳରେ ପ୍ରାୟ ୧.୪ ଲକ୍ଷ କୋଟି ଟଙ୍କାରୁ ଅଧିକ ବୈଦେଶିକ ମୁଦ୍ରା ସଞ୍ଚୟ ହୋଇଥିବା ସରକାର ଦାବି କରିଛନ୍ତି।

ଏହା ସହିତ ଇଥାନଲ ଉତ୍ପାଦନ ପାଇଁ କୃଷିଜାତ ସାମଗ୍ରୀର ଚାହିଦା ବଢ଼ିବାରୁ ଚାଷୀ ଓ ଗ୍ରାମୀଣ ଅର୍ଥନୀତି ମଧ୍ୟ ଲାଭାନ୍ବିତ ହୋଇଛି। କାର୍ବନ ନିର୍ଗମନ ହ୍ରାସ କରି ସ୍ୱଚ୍ଛ ପରିବହନ ବ୍ୟବସ୍ଥା ଗଠନରେ ମଧ୍ୟ ଏହି ପଦକ୍ଷେପ ସହାୟକ ହେଉଛି।

ସରକାର କହିଛନ୍ତି ଯେ, ବୈଜ୍ଞାନିକ ତଥ୍ୟ ଓ ନିୟମିତ ସମୀକ୍ଷା ଆଧାରରେ ଇଥାନଲ ମିଶ୍ରଣ କାର୍ଯ୍ୟକ୍ରମକୁ ଆଗାମୀ ଦିନରେ ମଧ୍ୟ ସୁରକ୍ଷିତ, ସ୍ୱଚ୍ଛ ଏବଂ ଗ୍ରାହକ-କେନ୍ଦ୍ରିକ ଭାବେ ଜାରି ରଖାଯିବ।