ଦେଶରେ **ଇ-୨୦ ଇନ୍ଧନ (୨୦% ଇଥାନଲ୍ ଓ ୮୦% ପେଟ୍ରୋଲ)**ର ବ୍ୟବହାର ଦ୍ରୁତ ଗତିରେ ବଢ଼ୁଥିବା ବେଳେ ଏହାକୁ ନେଇ ଯାନବାହନ ମାଲିକଙ୍କ ମଧ୍ୟରେ ଥିବା ସନ୍ଦେହ ଦୂର କରିଛନ୍ତି କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀନୀତିନ ଗଡ଼କରୀ।

ରାଜ୍ୟସଭାରେ ଏକ ଲିଖିତ ଉତ୍ତରରେ ସେ କହିଛନ୍ତି ଯେ, ଇ-୨୦ ଇନ୍ଧନ ଅଧିକାଂଶ ଯାନବାହନର ଇଞ୍ଜିନ୍ ଉପରେ କୌଣସି ବଡ଼ କ୍ଷତିକାରକ ପ୍ରଭାବ ପକାଇବ ନାହିଁ। ତେବେ୨୦୧୬ ପୂର୍ବରୁ ନିର୍ମିତ କିଛି ବିଏସ୍-୩ ମାନକର ଯାନରେରବର ପାର୍ଟସ୍ ଓ ଗାସ୍କେଟ ପରି କିଛି ଉପାଦାନ ବଦଳାଇବା ଆବଶ୍ୟକ ହୋଇପାରେ। ଏହି ପରିବର୍ତ୍ତନ ନିୟମିତ ସର୍ଭିସିଂ ସମୟରେ ସହଜରେ କରାଯାଇପାରିବ ଏବଂ ଇଞ୍ଜିନରେ କୌଣସି ବଡ଼ ପରିବର୍ତ୍ତନର ଆବଶ୍ୟକତା ନାହିଁ।

ଗଡ଼କରୀ କହିଛନ୍ତି ଯେ, ବର୍ତ୍ତମାନ ଦେଶରେ୨୦ କୋଟିରୁ ଅଧିକ ଦୁଇ ଚକିଆଏବଂ୩ କୋଟିରୁ ଅଧିକ ଚାରି ଚକିଆଯାନରେ ଇ-୨୦ ଇନ୍ଧନ ବ୍ୟବହୃତ ହେଉଛି।

ସରକାରଙ୍କ ସୂଚନା ଅନୁସାରେ,ଇଣ୍ଡିଆନ ଅଏଲ୍ କର୍ପୋରେସନ (IOCL), ଇଣ୍ଡିଆନ ଇନଷ୍ଟିଚ୍ୟୁଟ୍ ଅଫ୍ ପେଟ୍ରୋଲିୟମ୍ (IIP), SIAM ଓ ARAIମିଳିତ ଭାବେ ଦୁଇ ଚକିଆ ଓ ଚାରି ଚକିଆ ଯାନ ଉପରେ ଇ-୨୦ ଇନ୍ଧନର ପ୍ରଭାବକୁ ନେଇ ବ୍ୟାପକ ଅଧ୍ୟୟନ କରିଥିଲେ।

ଅଧ୍ୟୟନରେ ଜଣାପଡ଼ିଛି ଯେ, ଇ-୨୦ ଇନ୍ଧନ ବ୍ୟବହାର କଲେ ଇଞ୍ଜିନର କାର୍ଯ୍ୟଦକ୍ଷତା, ଷ୍ଟାର୍ଟିଂ କ୍ଷମତା, ଡ୍ରାଇଭିଂ ଅଭିଜ୍ଞତା କିମ୍ବା ଧାତୁ ଏବଂ ପ୍ଲାଷ୍ଟିକ୍ ଅଂଶ ଉପରେ କୌଣସି ଅସ୍ୱାଭାବିକ ପ୍ରଭାବ ଦେଖାଯାଇନାହିଁ। ଏହାସହ ଇଞ୍ଜିନରେ ଅତ୍ୟଧିକ ଘର୍ଷଣ ହେବାର ମଧ୍ୟ କୌଣସି ପ୍ରମାଣ ମିଳିନାହିଁ।

ମାଇଲେଜ୍ କମିଯିବାକୁ ନେଇ ଥିବା ଆଶଙ୍କା ସମ୍ପର୍କରେ ଗଡ଼କରୀ କହିଛନ୍ତି ଯେ, ଯାନର ମାଇଲେଜ୍ କେବଳ ଇନ୍ଧନ ଉପରେ ନିର୍ଭର କରେନାହିଁ। ରାସ୍ତାର ଅବସ୍ଥା, ଟ୍ରାଫିକ୍, ଡ୍ରାଇଭିଂ ଶୈଳୀ, ଯାନର ରକ୍ଷଣାବେକ୍ଷଣ ଓ ଇଞ୍ଜିନର ସ୍ଥିତି ମଧ୍ୟ ଏଥିରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥାଏ।

ସରକାର ସ୍ପଷ୍ଟ କରିଛନ୍ତି ଯେ, ଇ-୨୦ ପେଟ୍ରୋଲ ଦେଶବ୍ୟାପୀ ଲାଗୁ କରିବା ପୂର୍ବରୁ ବର୍ଷ ବର୍ଷ ଧରି ଲ୍ୟାବ୍, କ୍ଷେତ୍ର ଓ ବୈଷୟିକ ପରୀକ୍ଷଣ କରାଯାଇଥିଲା। ବିଶ୍ୱର ଅନେକ ଦେଶରେ ମଧ୍ୟ ଇଥାନଲ୍ ମିଶ୍ରିତ ଇନ୍ଧନ ସଫଳତାର ସହ ବ୍ୟବହୃତ ହେଉଥିବାରୁ ଏହାକୁ ପର୍ଯ୍ୟାୟକ୍ରମେ ଭାରତରେ ଲାଗୁ କରାଯାଇଛି।