ଜମ୍ମୁ-କଶ୍ମୀରର ଡୋଡାରେ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ପ୍ରେମ ନଗର ବ୍ରିଜ୍‌ରୁ ଜଣେ ଯୁବତୀ ଚେନାବ ନଦୀକୁ ଡେଇଁବା ପରେ ନିଖୋଜ ହୋଇଛନ୍ତି। ନିଖୋଜ ଯୁବତୀଙ୍କ ନାମ ପାୟଲ ଦେବୀ। ସେ କୃଷ୍ଣ ଲାଲଙ୍କ ଝିଅ ବୋଲି ଜଣାପଡ଼ିଛି।

ସୂଚନା ଅନୁସାରେ, ପାୟଲ ଏକ ମେଳାକୁ ଯାଇଥିଲେ। ଫେରିବା ସମୟରେ ନିଜ ଗାଁର ଜଣେ ପରିଚିତ ବ୍ୟକ୍ତିଙ୍କ ସହ ବାଇକ୍‌ରେ ଘରକୁ ଫେରୁଥିଲେ। ଏହି ସମୟରେ ତାଙ୍କ ଓଢ଼ଣୀ ବାଇକ୍‌ରେ ଲାଗିଯାଇଥିବାରୁ ଚାଳକ ବାଇକ୍‌ ଅଟକାଇଥିଲେ।

ଏହାପରେ ପାୟଲ ପ୍ରେମ ନଗର ବ୍ରିଜ୍‌ର ଧାରକୁ ଯାଇଥିଲେ। ସେଠାରେ ଉପସ୍ଥିତ ଲୋକଙ୍କୁ ସେ ନିଜ ଜୀବନ ଶେଷ କରିବାକୁ ଯାଉଥିବା କହିଥିଲେ। ଲୋକମାନେ ତାଙ୍କୁ ବୁଝାଇବା ସହ ଏପରି ପଦକ୍ଷେପ ନନେବାକୁ ଅନୁରୋଧ କରିଥିଲେ।

ଘଟଣା ସମ୍ପର୍କରେ ତାଙ୍କ ସହ ଥିବା ବାଇକ୍‌ ଚାଳକ ପାୟଲଙ୍କ ବାପାଙ୍କୁ ଫୋନ୍‌ କରି ଜଣାଇଥିଲେ। ପାୟଲଙ୍କ ବାପା ମଧ୍ୟ ଫୋନ୍‌ରେ ତାଙ୍କ ସହ କଥା ହୋଇ ତାଙ୍କୁ ରୋକିବାକୁ ଚେଷ୍ଟା କରିଥିଲେ। କିନ୍ତୁ ପାୟଲ ଏହା ତାଙ୍କ ଜୀବନ ଏବଂ ସେ ନିଷ୍ପତ୍ତି ନେଇସାରିଥିବା କହିଥିବା ଜଣାପଡ଼ିଛି।

ଏହାପରେ ବାପାଙ୍କୁ ଫୋନ୍‌ରେ ‘ବାଏ ବାଏ ପାପା’ କହି ପାୟଲ ଚେନାବ ନଦୀକୁ ଡେଇଁ ପଡ଼ିଥିଲେ।

ଘଟଣା ପରେ ସ୍ଥାନୀୟ ବାସିନ୍ଦା, ପୁଲିସ ଟିମ୍‌ ଏବଂ State Disaster Response Force (SDRF) କର୍ମଚାରୀମାନେ ମିଶି ନଦୀରେ ତଲାସୀ ଅଭିଯାନ ଆରମ୍ଭ କରିଛନ୍ତି। ତେବେ ଖବର ଲେଖାଯିବା ସୁଦ୍ଧା ପାୟଲଙ୍କ କୌଣସି ସନ୍ଧାନ ମିଳିନାହିଁ। ତାଙ୍କୁ ଖୋଜିବା ପାଇଁ ଉଦ୍ଧାରକାରୀ ଦଳର ଅଭିଯାନ ଜାରି ରହିଛି।