ପଶ୍ଚିମବଙ୍ଗରେ ଦ୍ୱିତୀୟ ପର୍ଯ୍ୟାୟ ମତଦାନ ଚାଲିଥିବାବେଳେ ରାଜନୈତିକ ମାହୋଲ ଅଧିକ ତେଜ ହୋଇଯାଇଛି। ଏହି ପରିପ୍ରେକ୍ଷିତରେ ତୃଣମୂଳ କଂଗ୍ରେସର ରାଜ୍ୟସଭା ସାଂସଦ ଡେରେକ୍ ଓ’ବ୍ରାଏନ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସିଧାସଳଖ ଚାଲେଞ୍ଜ ଦେଇ ରାଜନୈତିକ ତାପମାତ୍ରା ବଢ଼ାଇଦେଇଛନ୍ତି।

ଡେରେକ୍ ଓ’ବ୍ରାଏନ୍ ‘ଏକ୍ସ’ରେ ପୋଷ୍ଟ କରି କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦୀ ନିଜକୁ ପଶ୍ଚିମବଙ୍ଗର ସମସ୍ତ ୨୯୪ ଆସନର ପ୍ରାର୍ଥୀ ଭାବେ ପ୍ରତିଷ୍ଠା କରିଥିଲେ। ତେଣୁ ଯଦି ମମତା ବାନାର୍ଜୀଙ୍କ ନେତୃତ୍ୱାଧୀନ ଟିଏମ୍ସି ପୁଣିଥରେ କ୍ଷମତାକୁ ଫେରେ, ତେବେ ମୋଦୀ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବେ କି ବୋଲି ସେ ପ୍ରଶ୍ନ କରିଛନ୍ତି।

ସେ ଏହାକୁ ଏକ ଖୋଲା ଚାଲେଞ୍ଜ ଭାବେ ରଖି କହିଛନ୍ତି, “ସାହସ ଥାଇଥିଲେ ଏହି ଚାଲେଞ୍ଜ ଗ୍ରହଣ କରନ୍ତୁ।” ଏହି ବୟାନ ପରେ ରାଜନୈତିକ ମଞ୍ଚରେ ନୂଆ ଚର୍ଚ୍ଚା ଆରମ୍ଭ ହୋଇଛି।

ପଶ୍ଚିମବଙ୍ଗରେ ଏଥର ଟିଏମ୍ସି ଓ ବିଜେପି ମଧ୍ୟରେ ତୀବ୍ର ପ୍ରତିସ୍ପର୍ଧା ଦେଖାଯାଉଛି। ଟିଏମ୍ସି ଲଗାତାର ଚତୁର୍ଥ ଥର କ୍ଷମତାକୁ ଫେରିବା ଲକ୍ଷ୍ୟ ନେଇଥିବାବେଳେ ବିଜେପି ମଧ୍ୟ ପଶ୍ଚିମବଙ୍ଗରେ ସରକାର ଗଠନର ଦାବି କରୁଛି।

ନିର୍ବାଚନୀ ମଞ୍ଚରେ ଆକ୍ରମଣ-ପ୍ରତିଆକ୍ରମଣ ମଧ୍ୟରେ ଡେରେକ୍ଙ୍କ ଏହି ବକ୍ତବ୍ୟ ନିର୍ବାଚନୀ ଚର୍ଚ୍ଚାକୁ ନୂଆ ଦିଗ ଦେଇଛି। ମେ ୪ର ଫଳାଫଳ ପୂର୍ବରୁ ଏହି ରାଜନୈତିକ ଚାଲେଞ୍ଜ ରାଜ୍ୟର ରାଜନୀତିକୁ ଅଧିକ ଉତ୍ତେଜିତ କରିଛି।