ଦେଶର ବିଭିନ୍ନ ସ୍ଥାନରେ ଲଗାତାର ଅଗ୍ନିକାଣ୍ଡ ଘଟଣା ଚିନ୍ତା ବଢ଼ାଉଥିବା ବେଳେ ରାଜଧାନୀ ଦିଲ୍ଲୀରୁ ଆଉ ଏକ ବଡ଼ ଅଗ୍ନିକାଣ୍ଡର ଖବର ସାମ୍ନାକୁ ଆସିଛି। ବୁଧବାର ଭୋର ସମୟରେ ଉଦ୍ୟୋଗ ଭବନ ଅଞ୍ଚଳ ନିକଟରେ ଥିବା ଏକ ବସ୍ତିରେ ଭୟଙ୍କର ନିଆଁ ଲାଗିଥିଲା। ଅଗ୍ନିକାଣ୍ଡ ଏତେ ଭୟାବହ ଥିଲା ଯେ ନିଆଁ ଦୂରରୁ ମଧ୍ୟ ଦେଖାଯାଉଥିଲା।

ଘଟଣା ସମ୍ପର୍କରେ ସୂଚନା ପାଇବା ପରେ ଦମକଳ ବିଭାଗର ପ୍ରାୟ ୨୦ଟି ଗାଡ଼ି ଘଟଣାସ୍ଥଳରେ ପହଞ୍ଚି ଉଦ୍ଧାର ଓ ଅଗ୍ନି ନିର୍ବାପଣ କାର୍ଯ୍ୟ ଆରମ୍ଭ କରିଥିଲେ। ଦୀର୍ଘ ତିନି ଘଣ୍ଟାର ପ୍ରୟାସ ପରେ ନିଆଁକୁ ସଫଳତାର ସହ ନିୟନ୍ତ୍ରଣ କରାଯାଇଥିଲା। ବର୍ତ୍ତମାନ ପୁଣି ଥରେ ନିଆଁ ନଲାଗିବା ପାଇଁ କୁଲିଂ ଅପରେସନ୍ ଜାରି ରହିଛି।

ଦିଲ୍ଲୀ ଅଗ୍ନିଶମ ବିଭାଗର ଅଧିକାରୀ ସନ୍ଦୀପ ଦୁଗ୍ଗଲଙ୍କ କହିବା ଅନୁସାରେ, ଅଗ୍ନିକାଣ୍ଡ ଘଟିଥିବା ସ୍ଥାନଟି ସେନା ଭବନ ନିକଟରେ ଅବସ୍ଥିତ ଏକ ଅସ୍ଥାୟୀ ଶ୍ରମିକ ଶିବିର ଥିଲା। ସେଠାରେ ଛୋଟ ଏଲପିଜି ସିଲିଣ୍ଡର ବ୍ୟବହାର କରାଯାଉଥିବା ସହ ବିଦ୍ୟୁତ ତାର ମଧ୍ୟ ଝୁଲି ରହିଥିଲା। ତେବେ ଅଗ୍ନିକାଣ୍ଡର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ଏବଂ ତଦନ୍ତ ଜାରି ରହିଛି।

ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଏକ ବିଦ୍ୟୁତ ପ୍ୟାନେଲରୁ ନିଆଁ ଆରମ୍ଭ ହୋଇ ଦ୍ରୁତ ଗତିରେ ନିକଟସ୍ଥ ଝୁମ୍ପୁଡ଼ିଗୁଡ଼ିକୁ ବ୍ୟାପିଯାଇଥିଲା। ଫଳରେ ଝୁମ୍ପୁଡ଼ି ମଧ୍ୟରେ ଥିବା ଅନେକ ଜିନିଷପତ୍ର ପୋଡ଼ି ପାଉଁଶ ହୋଇଯାଇଛି। ତେବେ ଶ୍ରମିକମାନେ ସମୟ ଥିବାବେଳେ ବାହାରକୁ ପଳାଇ ଆସିଥିବାରୁ କୌଣସି ଜୀବହାନି ଘଟିନାହିଁ।

ଶ୍ରମିକମାନଙ୍କ କହିବା ଅନୁସାରେ, ନିଆଁ ଅତ୍ୟନ୍ତ ଦ୍ରୁତ ଗତିରେ ବ୍ୟାପିଥିଲା। ଏହି କାରଣରୁ ସେମାନେ କେବଳ ନିଜ ଜୀବନ ବଞ୍ଚାଇବା ପାଇଁ ବାହାରକୁ ଦୌଡ଼ିଥିଲେ। ସାମଗ୍ରୀ ଉଦ୍ଧାର କରିବା ପାଇଁ ସେମାନଙ୍କ ପାଖରେ ସମୟ ନଥିଲା। ଅଗ୍ନିକାଣ୍ଡରେ ଅନେକ ପରିବାରର ଦୈନନ୍ଦିନ ବ୍ୟବହାର ସାମଗ୍ରୀ ନଷ୍ଟ ହୋଇଥିବା ସୂଚନା ମିଳିଛି।