ପୁଲିସ ହାଜତରେ ଘଟୁଥିବା ମୃତ୍ୟୁକୁ ନେଇ ଦିଲ୍ଲୀ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। କୋର୍ଟ କହିଛନ୍ତି ଯେ, ହାଜତ ମୃତ୍ୟୁ ଆତ୍ମହତ୍ୟା ହୋଇଥିଲେ ମଧ୍ୟ ରାଜ୍ୟ ସରକାର ଏହାର ଦାୟିତ୍ୱରୁ ମୁକ୍ତ ହୋଇପାରିବେ ନାହିଁ। ସେହିସହିତ ପୀଡ଼ିତ ପରିବାରକୁ କ୍ଷତିପୂରଣ ଦେବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି।

୨୦୧୮ ମସିହାରେ ପୁଲିସ ହେପାଜତରେ ଆତ୍ମହତ୍ୟା କରିଥିବା ୧୯ ବର୍ଷୀୟ ଯୁବକଙ୍କ ପିତାଙ୍କ ଆବେଦନର ଶୁଣାଣି କରି ଦିଲ୍ଲୀ ହାଇକୋର୍ଟ ତାଙ୍କୁ ୧୮.୪୪ ଲକ୍ଷ ଟଙ୍କା କ୍ଷତିପୂରଣ ଦେବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।

ଜଷ୍ଟିସ ସଚିନ ଦତ୍ତ ଜୁଲାଇ ୧ରେ ପ୍ରକାଶ କରିଥିବା ରାୟରେ କହିଛନ୍ତି ଯେ, ହାଜତ ମୃତ୍ୟୁ କେବଳ ଏକ ବ୍ୟକ୍ତିଗତ ଦୁଃଖଦ ଘଟଣା ନୁହେଁ, ବରଂ ଆଇନର ଶାସନ ଓ ନ୍ୟାୟ ବ୍ୟବସ୍ଥା ପ୍ରତି ଏକ ଗୁରୁତର ଚ୍ୟାଲେଞ୍ଜ। ଜଣେ ବ୍ୟକ୍ତିଙ୍କୁ ପୁଲିସ ହେପାଜତରେ ରଖାଯାଇଥିବା ବେଳେ ତାଙ୍କ ଜୀବନ ଓ ସମ୍ମାନର ସୁରକ୍ଷା କରିବା ସମ୍ପୂର୍ଣ୍ଣ ଭାବେ ରାଜ୍ୟର ଦାୟିତ୍ୱ ବୋଲି କୋର୍ଟ ସ୍ପଷ୍ଟ କରିଛନ୍ତି।

କୋର୍ଟ କହିଛନ୍ତି ଯେ, ହାଜତରେ ଘଟୁଥିବା ଯେକୌଣସି ମୃତ୍ୟୁ—ତାହା ହିଂସା, ଅବହେଳା, ସନ୍ଦେହଜନକ ପରିସ୍ଥିତି କିମ୍ବା ଆତ୍ମହତ୍ୟା ଯୋଗୁ ହୋଇଥାଉ—ତାହାର ନ୍ୟାୟିକ ତଦନ୍ତ ଅତ୍ୟାବଶ୍ୟକ। ଏଭଳି ଘଟଣା ବ୍ୟକ୍ତିଙ୍କ ମୌଳିକ ଅଧିକାର ଓ ନ୍ୟାୟ ବ୍ୟବସ୍ଥାର ବିଶ୍ୱସନୀୟତା ସହ ଜଡ଼ିତ ବୋଲି ରାୟରେ ଉଲ୍ଲେଖ କରାଯାଇଛି।

ବିଚାରପତି ଆହୁରି କହିଛନ୍ତି ଯେ, ପୁଲିସ ହେପାଜତରେ ରହୁଥିବା ବ୍ୟକ୍ତି ସମ୍ବିଧାନର ଅନୁଚ୍ଛେଦ ୨୧ ଅନୁସାରେ ମିଳୁଥିବା ଜୀବନ ଓ ବ୍ୟକ୍ତିଗତ ସ୍ୱାଧୀନତାର ଅଧିକାରରୁ ବଞ୍ଚିତ ହୁଅନ୍ତି ନାହିଁ। ତେଣୁ ତାଙ୍କ ସୁରକ୍ଷା ସୁନିଶ୍ଚିତ କରିବା କର୍ତ୍ତୃପକ୍ଷଙ୍କ ମୌଳିକ ଦାୟିତ୍ୱ।

ଏହି ରାୟ କରୱାଲ ନଗର ଥାନାରେ ୨୦୧୮ରେ ଘଟିଥିବା ଏକ ହାଜତ ମୃତ୍ୟୁ ଘଟଣାକୁ ନେଇ ଦିଆଯାଇଛି। ମୃତ ଯୁବକଙ୍କ ପିତା ଅଭିଯୋଗ କରିଥିଲେ ଯେ, ୨୦୧୭ର ଏକ ମାମଲାରେ ତାଙ୍କ ପୁଅଙ୍କୁ କୋର୍ଟ ପରିସରରୁ ପୁଲିସ ଗିରଫ କରିଥିଲା। ପୁଲିସ ହେପାଜତରେ ତାଙ୍କୁ ନିର୍ଯାତନା ଦିଆଯାଇଥିବା ସହ ମୁକ୍ତ କରିବା ପାଇଁ ଟଙ୍କା ଦାବି କରାଯାଇଥିବା ମଧ୍ୟ ସେ ଅଭିଯୋଗ କରିଥିଲେ।

ପରଦିନ ସକାଳେ ପୁଲିସ ପକ୍ଷରୁ ଯୁବକ ହାଜତରେ ଆତ୍ମହତ୍ୟା କରିଥିବା ସୂଚନା ଦିଆଯାଇଥିଲା। ପୁଲିସର ଅବହେଳା ଏବଂ ଦାୟିତ୍ୱହୀନତା ଯୋଗୁ ତାଙ୍କ ପୁଅଙ୍କ ମୃତ୍ୟୁ ଘଟିଥିବା ଦାବି କରି ପିତା କ୍ଷତିପୂରଣ ମାଗିଥିଲେ।

ଆବେଦନକାରୀଙ୍କ ଦାବିକୁ ଗ୍ରହଣ କରି କୋର୍ଟ ରାଜ୍ୟ ସରକାରଙ୍କୁ ୮ ସପ୍ତାହ ମଧ୍ୟରେ ୧୮.୪୪ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି।