ବାତ୍ୟା ‘ଆର୍ଣ୍ଣବ’ର ସମ୍ଭାବ୍ୟ ପ୍ରଭାବକୁ ନେଇ ଭୁବନେଶ୍ୱର ମହାନଗର ନିଗମ (BMC) ପକ୍ଷରୁ ପ୍ରସ୍ତୁତି ତୀବ୍ର କରାଯାଇଛି। ବାତ୍ୟା ସହ ପ୍ରବଳ ବର୍ଷା ଓ ପବନରେ ଯେପରି ଜନଜୀବନ ଓ ସମ୍ପତ୍ତିର କ୍ଷତି କମ୍ ହୁଏ, ସେଥିପାଇଁ ଅନେକ ପ୍ରତିଷେଧକ ପଦକ୍ଷେପ ନିଆଯାଇଛି।

BMC ପକ୍ଷରୁ ରାସ୍ତାକଡ଼ରେ ଥିବା ବଡ଼ ହୋର୍ଡିଂ, ବ୍ୟାନର ଓ ପୂଜା ତୋରଣ ତୁରନ୍ତ ହଟାଇବାକୁ ଅଧିକାରୀମାନଙ୍କୁ କୁହାଯାଇଛି। ନିର୍ଦ୍ଦେଶ ଅନୁସାରେ ତୋରଣ ନ ହଟାଇଲେ ପୋଲିସ୍‌ ମାମଲା ମଧ୍ୟ ହୋଇପାରେ। ଉଚ୍ଚ ମାଷ୍ଟ ଲାଇଟ୍‌କୁ ତଳକୁ ଆଣିବା ନେଇ ମଧ୍ୟ ପଦକ୍ଷେପ ନିଆଯାଉଛି।

ପ୍ରବଳ ବର୍ଷାରେ ଜଳବନ୍ଦୀ ଓ ଦୁର୍ଘଟଣା ରୋକିବା ପାଇଁ ଖୋଲା ଡ୍ରେନ୍‌ଗୁଡ଼ିକୁ ବ୍ୟାରିକେଡ୍‌ କରାଯିବ। ସମ୍ବେଦନଶୀଳ ଅଞ୍ଚଳ ଚିହ୍ନଟ କରି ସେଠାରେ ପମ୍ପସେଟ୍‌ ପ୍ରସ୍ତୁତ ରଖାଯାଇଛି। ରାସ୍ତାରେ ଗଛ କିମ୍ବା ବିଦ୍ୟୁତ୍‌ ଖୁଣ୍ଟି ଭାଙ୍ଗି ପଡ଼ିଲେ ଶୀଘ୍ର ହଟାଇ ଯାତାୟାତ ସ୍ୱାଭାବିକ କରିବାକୁ ଟିମ୍‌ଗୁଡ଼ିକୁ ପ୍ରସ୍ତୁତ ରଖାଯାଇଛି।

ନିମ୍ନାଞ୍ଚଳରେ ରହୁଥିବା ଲୋକଙ୍କୁ ପରିସ୍ଥିତି ଅନୁଯାୟୀ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ। ଏଥିପାଇଁ BMC ପକ୍ଷରୁ ୨୪ ଘଣ୍ଟିଆ ହେଲ୍ପଲାଇନ୍ ଓ କଣ୍ଟ୍ରୋଲ୍ ରୁମ୍‌ ବ୍ୟବସ୍ଥା କରାଯାଇଛି। ଜରୁରୀ ପରିସ୍ଥିତିରେ ବିଭିନ୍ନ ସରକାରୀ ବିଭାଗ ଓ ଅତ୍ୟାବଶ୍ୟକ ସେବା ସଂସ୍ଥା ସହ ସମନ୍ୱୟ ରଖି କାର୍ଯ୍ୟ କରିବ BMC।

ବାତ୍ୟା ଓ ବର୍ଷା ସମୟରେ ଅଧିକାରୀମାନେ ନିଜ ନିଜ ଦାୟିତ୍ୱରେ ଉପସ୍ଥିତ ରହିବେ। BMC କର୍ମଚାରୀଙ୍କ ଛୁଟି ମଧ୍ୟ ବାତିଲ୍ କରାଯାଇଛି, ଯାହାଦ୍ୱାରା ପ୍ରସ୍ତୁତି ଓ ଜରୁରୀ ପ୍ରତିକ୍ରିୟାରେ କୌଣସି ବାଧା ନ ହୁଏ।