କଲମ୍ବିଆରେ ସୋମବାର ସକାଳେ ୭.୪ ତୀବ୍ରତାର ଏକ ଶକ୍ତିଶାଳୀ ଭୂମିକମ୍ପ ଭୟଙ୍କର କ୍ଷୟକ୍ଷତି ଘଟାଇଛି। ଏହି ଭୂମିକମ୍ପରେ ଅତି କମରେ ୧୩୨ ଜଣଙ୍କ ମୃତ୍ୟୁ ହୋଇଥିବା ବେଳେ ୫୭୦ ଜଣ ଆହତ ହୋଇଥିବା ରିପୋର୍ଟରେ କୁହାଯାଇଛି।
କଲମ୍ବିଆନ୍ ଆସୋସିଏସନ୍ ଅଫ୍ କ୍ୟାପିଟାଲ୍ ସିଟିଜ୍ର ସୂଚନା ଅନୁସାରେ, ଭୂମିକମ୍ପ ପରେ ଦେଶର ୫ଟି ରାଜଧାନୀ ସହରରେ ରେଡ୍ ଆଲର୍ଟ ଜାରି କରାଯାଇଛି। ପେରେଇରା ସହରରେ ହିଁ ୬୦ ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି।
ଭୂମିକମ୍ପ ଯୋଗୁଁ ୮୬ଟି କୋଠା ସମ୍ପୂର୍ଣ୍ଣ ଭାବେ ଭୁଶୁଡ଼ି ପଡ଼ିଥିବା ବେଳେ ୭ଟି ବିମାନବନ୍ଦରରେ ବିମାନ ଚଳାଚଳ ବନ୍ଦ କରାଯାଇଛି। ପ୍ରାୟ ୫ ଲକ୍ଷ ଲୋକ ବସବାସ କରୁଥିବା ପେରେଇରା ସହର ଭୂମିକମ୍ପର କେନ୍ଦ୍ରସ୍ଥଳଠାରୁ ୬୪ କିଲୋମିଟରରୁ କମ୍ ଦୂରରେ ରହିଛି।
ରାଜଧାନୀ ବୋଗୋଟା ସମେତ କଲମ୍ବିଆର ବିଭିନ୍ନ ସହରରେ ଭୂମିକମ୍ପର ତୀବ୍ର ଝଟକା ଅନୁଭୂତ ହୋଇଥିଲା। ବୋଗୋଟାରେ ଆଲାର୍ମ ବାଜିବା ପରେ ଅନେକ ଲୋକ ସତର୍କତାମୂଳକ ଭାବେ କୋଠାରୁ ବାହାରି ରାସ୍ତାକୁ ଚାଲିଆସିଥିଲେ।
ରାଷ୍ଟ୍ରପତି ଆବେଲାର୍ଡୋ ଡେ ଲା ଏସ୍ପ୍ରିଏଲାଙ୍କ ସୂଚନା ଅନୁସାରେ, ପ୍ରାୟ ୧,୫୭୭ଟି ଆବାସିକ କୋଠା କ୍ଷତିଗ୍ରସ୍ତ ହୋଇଥିବା ବେଳେ ୩୭ଟି କୋଠା ସମ୍ପୂର୍ଣ୍ଣ ଭାବେ ଧ୍ୱଂସ ହୋଇଛି। ଏହାଛଡ଼ା ୬୦ରୁ ଅଧିକ କୋଠା ଭୁଶୁଡ଼ି ପଡ଼ିବା ସହ ୧୮ଟି ସ୍ୱାସ୍ଥ୍ୟକେନ୍ଦ୍ର ଓ ୫୨ଟି ସ୍କୁଲ୍ କ୍ଷତିଗ୍ରସ୍ତ ହୋଇଛି।
ପଶ୍ଚିମ-ମଧ୍ୟ କଲମ୍ବିଆର ରିସାରାଲ୍ଡା ବିଭାଗ ଭୂମିକମ୍ପରେ ସବୁଠାରୁ ଅଧିକ ପ୍ରଭାବିତ ହୋଇଥିବା ରାଜ୍ୟପାଳ ଜୁଆନ୍ ଡିଏଗୋ ପାଟିନୋ କହିଛନ୍ତି। ସେପଟେ ଚୋକୋ ଅଞ୍ଚଳର ରାଜଧାନୀ କ୍ୱିବଡୋରେ ମଧ୍ୟ ଅନେକ ଲୋକ ଆହତ ହୋଇଥିବା ଏବଂ କୋଠାଗୁଡ଼ିକରେ ଗୁରୁତର କ୍ଷୟକ୍ଷତି ହୋଇଥିବା ସ୍ଥାନୀୟ ପ୍ରଶାସନ ସୂଚନା ଦେଇଛି।
ଆମେରିକାନ୍ ଜିଓଲୋଜିକାଲ୍ ସର୍ଭେ (USGS) ଅନୁସାରେ, ସ୍ଥାନୀୟ ସମୟ ସକାଳ ପ୍ରାୟ ୭ଟା ୩୪ ମିନିଟ୍ରେ ଭୂମିକମ୍ପ ଘଟିଥିଲା। ଏହାର କେନ୍ଦ୍ରସ୍ଥଳ ବୋଗୋଟାଠାରୁ ପ୍ରାୟ ୨୮୦ କିଲୋମିଟର ପଶ୍ଚିମରେ ଥିବା ସାନ୍ ଜୋସେ ଡେଲ୍ ପାଲମାର ନିକଟରେ ଏବଂ ପ୍ରାୟ ୧୦୭ କିଲୋମିଟର ଗଭୀରତାରେ ଥିଲା।
ଭୂମିକମ୍ପ ପରେ ଆଫ୍ଟରସକ୍ର ଆଶଙ୍କା ରହିଥିବାରୁ ପ୍ରଶାସନ ପକ୍ଷରୁ ସତର୍କତା ଜାରି କରାଯାଇଛି। ଉଦ୍ଧାର ଓ ରିଲିଫ୍ କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ସରକାର ଜରୁରୀକାଳୀନ ବୈଠକ ଡାକିଛନ୍ତି।
ବୋଗୋଟାରେ ପ୍ରଭାବିତ ଅଞ୍ଚଳଗୁଡ଼ିକ ପାଇଁ ପାନୀୟ ଜଳ, କମ୍ବଳ, ଚାଦର, ମ୍ୟାଟ୍, ଦୀର୍ଘସ୍ଥାୟୀ ଖାଦ୍ୟ, ବ୍ୟକ୍ତିଗତ ସ୍ୱଚ୍ଛତା ସାମଗ୍ରୀ ଓ ପ୍ରଥମିକ ଚିକିତ୍ସା ସାମଗ୍ରୀ ସଂଗ୍ରହ ପାଇଁ ୬ଟି ସଂଗ୍ରହ କେନ୍ଦ୍ର ଖୋଲାଯାଇଛି। ଉଦ୍ଧାର ଓ ଖୋଜାଖୋଜି ଅଭିଯାନରେ ସହାୟତା ପାଇଁ ବୋଗୋଟାରୁ ୧୦୦ ଜଣ ଉଦ୍ଧାରକର୍ମୀଙ୍କୁ ପ୍ରଭାବିତ ସହରଗୁଡ଼ିକୁ ପଠାଇବା ପାଇଁ ମଧ୍ୟ ପ୍ରସ୍ତୁତି ହୋଇଛି।
ଚିତାଲାଗି ଅମାବାସ୍ୟା ଦିନ ବୁଧବାର ଏକ ବିରଳ ପୂର୍ଣ୍ଣ ସୂର୍...
ଓଡ଼ିଶାର ପରବର୍ତ୍ତୀ ଡିଜିପି ନିଯୁକ୍ତି ପ୍ରକ୍ରିୟାକୁ ନେଇ...
ନବରଙ୍ଗପୁରରେ ପ୍ରସ୍ତାବିତ ପରମାଣୁ ବିଦ୍ୟୁତ୍ ପ୍ରକଳ୍ପକୁ ନ...
ପୁରୀ ଜିଲ୍ଲା କୃଷ୍ଣପ୍ରସାଦ ଥାନା ଅଧୀନ କୁମାରପୁର ଗାଁକୁ ସ...
