ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘ମନ୍ କି ବାତ୍’ର ୧୩୫ତମ ଅଧ୍ୟାୟରେ ଜଳ ସଂରକ୍ଷଣ ପାଇଁ ଦିଆଯାଇଥିବା ଆହ୍ୱାନ ପରେ ଓଡ଼ିଶାରେ ‘କ୍ୟାଚ୍ ଦ ରେନ୍ ୨୦୨୬’ ଅଭିଯାନକୁ ଅଧିକ ଗତି ମିଳିଛି। ଭୂତଳ ଜଳସ୍ତର ବୃଦ୍ଧି, ପାରମ୍ପରିକ ଜଳାଶୟର ପୁନରୁଦ୍ଧାର ଓ ବର୍ଷାଜଳ ସଂଗ୍ରହକୁ ଏହି ଅଭିଯାନରେ ପ୍ରାଥମିକତା ଦିଆଯାଉଛି।
ଅଭିଯାନ ଅଧୀନରେ ରାଜ୍ୟରେ ମୋଟ ୯୦୫ଟି ଜଳ ସଂରକ୍ଷଣ ଭିତ୍ତିଭୂମି ନିର୍ମାଣ କରାଯାଇଛି। ସେଥିମଧ୍ୟରୁ ୮୪୯ଟି ଛାତ ଉପରି ବର୍ଷାଜଳ ସଂଗ୍ରହ (RRWH) ବ୍ୟବସ୍ଥା ଓ ୫୬ଟି ଭୂତଳ ଜଳ ପୁନଃଭରଣ ଶାଫ୍ଟ ରହିଛି।
୮୪୯ଟି RRWH ମଧ୍ୟରୁ ୨୧ଟି ସରକାରୀ କୋଠାରେ ଏବଂ ୮୨୮ଟି ବେସରକାରୀ କୋଠାରେ ନିର୍ମାଣ ହୋଇଛି। ଏହା ମାଧ୍ୟମରେ ବର୍ଷା ସମୟରେ ଅପଚୟ ହେଉଥିବା ପାଣିକୁ ସଂଗ୍ରହ କରାଯାଇ ଭୂତଳ ଜଳସ୍ତର ବୃଦ୍ଧିରେ ସହାୟତା କରାଯାଉଛି।
୫୬ଟି ଭୂତଳ ଜଳ ପୁନଃଭରଣ ଶାଫ୍ଟ ମଧ୍ୟରୁ ଯାଜପୁରରେ ୪୫ଟି, କେନ୍ଦ୍ରାପଡ଼ାରେ ୧୦ଟି ଓ ସୁନ୍ଦରଗଡ଼ରେ ଗୋଟିଏ ଶାଫ୍ଟ ନିର୍ମାଣ ହୋଇଛି।
ଅଧିକାରୀଙ୍କ ଅନୁସାରେ, ଏହି ସଂରଚନାଗୁଡ଼ିକ ମୌସୁମୀ ବର୍ଷାଜଳକୁ ଧରି ଭୂମି ଭିତରକୁ ପହଞ୍ଚାଇବାରେ ସହାୟକ ହେବ। ଏହା ଭୂତଳ ଜଳସ୍ତର ବୃଦ୍ଧି ସହ ଜଳସେଚନ ସୁବିଧା ଓ ଶୁଷ୍କ ସମୟରେ ଜଳ ଉପଲବ୍ଧତା ବଢ଼ାଇବ।
ଭିତ୍ତିଭୂମି ନିର୍ମାଣ ସହ ଲୋକଙ୍କ ମଧ୍ୟରେ ସଚେତନତା ପାଇଁ ରାଜ୍ୟରେ ୯୬୮ଟି IEC କାର୍ଯ୍ୟକ୍ରମ ଆୟୋଜିତ ହୋଇଛି। ଏଥିରେ ରାସ୍ତା ନାଟକ, ଲୋକକଳା ପ୍ରଦର୍ଶନ, ସଚେତନତା ଅଭିଯାନ, ସମୁଦାୟ ସହଭାଗିତା ଓ ବିଭିନ୍ନ ଆଉଟ୍ରିଚ୍ କାର୍ଯ୍ୟକ୍ରମ ସାମିଲ ରହିଛି।
ଖୋର୍ଦ୍ଧାରେ ସର୍ବାଧିକ ୨୩୦ଟି ଏବଂ ଅନୁଗୁଳରେ ୧୨୪ଟି IEC କାର୍ଯ୍ୟକ୍ରମ ହୋଇଛି। କଟକ, କେନ୍ଦ୍ରାପଡ଼ା, ଯାଜପୁର, ସୁନ୍ଦରଗଡ଼, ଝାରସୁଗୁଡ଼ା, ନବରଙ୍ଗପୁର ଓ ସୁବର୍ଣ୍ଣପୁରରେ ୬୨ଟି ଲେଖାଏଁ କାର୍ଯ୍ୟକ୍ରମ ହୋଇଛି।
ଶିକ୍ଷାନୁଷ୍ଠାନଗୁଡ଼ିକୁ ମଧ୍ୟ ଏହି ଅଭିଯାନ ସହ ଯୋଡ଼ାଯାଇଛି। ସଚେତନତା କାର୍ଯ୍ୟକ୍ରମ, ଇଣ୍ଡକ୍ସନ୍ ସେସନ୍ ଓ ବୈଷୟିକ ଆଲୋଚନା ମାଧ୍ୟମରେ ଛାତ୍ରଛାତ୍ରୀଙ୍କୁ ଭୂତଳ ଜଳ ବିଜ୍ଞାନ, ଜଳଚକ୍ର ଓ ବର୍ଷାଜଳ ସଂଗ୍ରହର ବ୍ୟବହାରିକ ପ୍ରଣାଳୀ ବିଷୟରେ ଶିକ୍ଷା ଦିଆଯାଉଛି।
ନୂଆ ଭିତ୍ତିଭୂମି ସହ ପୁରୁଣା ଜଳ ସମ୍ପଦର ପୁନରୁଦ୍ଧାରକୁ ମଧ୍ୟ ଗୁରୁତ୍ୱ ଦିଆଯାଇଛି। ରାଜ୍ୟ ଯୋଜନାର ‘Improvement to Tanks and Minor Irrigation Projects Scheme’ ଅଧୀନରେ ସମସ୍ତ ୩୦ଟି ଜିଲ୍ଲାର ୯୮ଟି ଜଳାଶୟ ଚିହ୍ନଟ କରାଯାଇଛି। ଏଗୁଡ଼ିକର ନବୀକରଣ ଓ ଡିସିଲ୍ଟିଂ ମାଧ୍ୟମରେ ଜଳଧାରଣ କ୍ଷମତା ବଢ଼ାଇବାକୁ ଯୋଜନା ରହିଛି।
ଏହା ଫଳରେ ଅଧିକ ବର୍ଷାଜଳ ସଂରକ୍ଷଣ, ଜଳସେଚନ ବ୍ୟବସ୍ଥାରେ ସୁଧାର ଓ ଭୂତଳ ଜଳ ପୁନଃଭରଣରେ ସହାୟତା ମିଳିବ।
ଜଳସେଚନ ପ୍ରକଳ୍ପ, ଭୂତଳ ଜଳ କାର୍ଯ୍ୟାଳୟ ଓ ଜଳ ସଂରକ୍ଷଣ ଭିତ୍ତିଭୂମି ନିକଟରେ ବୃକ୍ଷରୋପଣ ମଧ୍ୟ କରାଯାଉଛି। ଅଧିକ ଗଛ ମାଟିକୁ ସ୍ଥିର ରଖିବା, ମୃତ୍ତିକା କ୍ଷୟ ହ୍ରାସ କରିବା, ବର୍ଷାଜଳ ଭୂମିରେ ଶୋଷିତ ହେବା ଓ ଜଳଗ୍ରହଣ କ୍ଷେତ୍ରର ପରିବେଶକୁ ସୁଦୃଢ଼ କରିବାରେ ସହାୟକ ହେବ।
‘କ୍ୟାଚ୍ ଦ ରେନ୍ ୨୦୨୬’ ମାଧ୍ୟମରେ ଘରଠାରୁ ସମୁଦାୟ ପର୍ଯ୍ୟନ୍ତ ବର୍ଷାଜଳ ସଂରକ୍ଷଣ ଓ ଭୂତଳ ଜଳ ପୁନଃଭରଣକୁ ଲୋକଙ୍କ ଦୈନନ୍ଦିନ ଅଭ୍ୟାସରେ ପରିଣତ କରି ଦୀର୍ଘମିଆଦୀ ଜଳ ସୁରକ୍ଷା ହାସଲ କରିବା ଲକ୍ଷ୍ୟ ରହିଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମୁମ୍ବାଇ ଗସ୍ତ ପୂର୍ବର...
ବାଲେଶ୍ୱର ଜିଲ୍ଲାରେ ସାମାଜିକ ସୁରକ୍ଷା ଭତ୍ତା ପାଣ୍ଠି ହେର...
ଉତ୍ତରପ୍ରଦେଶରେ ଶ୍ରମିକ ଓ ଅନ୍ୟାନ୍ୟ ଦୁର୍ବଳ ପରିବାରର ପିଲ...
ଆମେରିକା ଓ କାନାଡା ମଧ୍ୟରେ ଚାଲିଥିବାଟାରିଫ୍ ଯୁଦ୍ଧଏବେ ଏର...
ଗୁଜରାଟର ଜାମନଗରସ୍ଥିତ ଇଣ୍ଡିଆନ୍ ବ୍ୟାଙ୍କର ରଣଜିତସାଗର ରୋ...
ଭାରତୀୟ ଅର୍ଥନୀତି ପାଇଁ ଆସିଛି ଭଲ ଖବର।୨୦୨୬-୨୭ ଆର୍ଥିକ ବ...
ଆମେରିକାରେ ଚାକିରି କରିବା ସହିତ ନିଜ ପ୍ରତିଭାକୁ side bus...
ମଧ୍ୟପ୍ରଦେଶର ସାଗର ଜିଲ୍ଲାରେ କଥିତ ଭାବେ ବିଷାକ୍ତ ମଦ ପିଇ...
ଘରୋଇ LPG ଗ୍ରାହକଙ୍କ ପାଇଁ ବଡ଼ ଆଶ୍ୱସ୍ତି।ଘରୋଇ LPG refi...
