ଆମେରିକା ଓ କାନାଡା ମଧ୍ୟରେ ଚାଲିଥିବା ବାଣିଜ୍ୟ ଆଲୋଚନା ଶେଷ ମୁହୂର୍ତ୍ତରେ ବିଫଳ ହୋଇଛି। ଏହା ପରେ ଦୁଇ ଦେଶ ମଧ୍ୟରେ ଶୁଳ୍କ ବିବାଦ ଆହୁରି ଗଭୀର ହେବାର ଆଶଙ୍କା ବଢ଼ିଛି।

ଆମେରିକା ପକ୍ଷରୁ କାନାଡାର ବିଭିନ୍ନ ସାମଗ୍ରୀ ଉପରେ ନୂଆ ୫୦% ଶୁଳ୍କ ଲାଗୁ କରାଯାଇଛି। ଏହି ଶୁଳ୍କ ଅଧୀନରେ ମଦ, ଦୁଗ୍ଧଜାତ ଦ୍ରବ୍ୟ, ସିମେଣ୍ଟ, ପୋଷାକ ଏବଂ ହକି ଉପକରଣ ସମେତ ଅନେକ ସାମଗ୍ରୀ ରହିଛି। ଏହା ବ୍ୟତୀତ କାନାଡୀୟ ଇସ୍ପାତ, ଆଲୁମିନିୟମ, ଅଟୋମୋବାଇଲ୍ ଓ କାଠ ଉପରେ ପୂର୍ବରୁ ଲାଗୁ ଥିବା ଶୁଳ୍କ ମଧ୍ୟ ଜାରି ରହିଛି।

ଆଲୋଚନା ବିଫଳ ହେବା ପରେ କାନାଡା ପ୍ରଧାନମନ୍ତ୍ରୀ ମାର୍କ କାର୍ନି ଆମେରିକା ସହ ବାଣିଜ୍ୟ ଆଲୋଚନାକୁ ସ୍ଥଗିତ କରିଛନ୍ତି। ସେ କହିଛନ୍ତି, ଆଲୋଚନାରେ ଗୁରୁତ୍ୱପୂର୍ଣ୍ଣ ପ୍ରଗତି ହୋଇଥିଲେ ମଧ୍ୟ କାନାଡାର ଲକ୍ଷ୍ୟ ପୂରଣ ପାଇଁ ତାହା ପର୍ଯ୍ୟାପ୍ତ ନଥିଲା। ଆମେରିକା ପକ୍ଷରୁ ଶେଷ ମୁହୂର୍ତ୍ତରେ ଦିଆଯାଇଥିବା କିଛି ସର୍ତ୍ତକୁ ସେ ‘ଅନ୍ୟାୟ’ ଓ ‘ଅର୍ଥନୈତିକ ଭାବେ ଅସଙ୍ଗତ’ ବୋଲି କହିଛନ୍ତି।

କାର୍ନି ସ୍ପଷ୍ଟ କରିଛନ୍ତି ଯେ, ଆମେରିକା ଯେତିକି ଶୁଳ୍କ ଲାଗୁ କରିବ, କାନାଡା ମଧ୍ୟ ସେହି ଅନୁପାତରେ ‘ଡଲାର୍ ଫର୍ ଡଲାର୍’ ପ୍ରତିଶୋଧମୂଳକ ଶୁଳ୍କ ଲଗାଇବ। ଓଣ୍ଟାରିଓ ପ୍ରିମିୟର୍ ଡଗ୍ ଫୋର୍ଡ ମଧ୍ୟ କାନାଡା ସରକାରଙ୍କ ଦୃଢ଼ ଜବାବକୁ ସମର୍ଥନ କରିଛନ୍ତି।

ଏହା ପୂର୍ବରୁ ଉଭୟ ଦେଶର ଅଧିକାରୀମାନେ ଏକ ବାଣିଜ୍ୟିକ ଚୁକ୍ତି ନେଇ ଆଶାବାଦୀ ଥିଲେ। ଆଲୋଚନାରେ କାନାଡୀୟ ଇସ୍ପାତ ଓ ଆଲୁମିନିୟମ ଉପରେ ଆମେରିକାର ଶୁଳ୍କ ୫୦%ରୁ ୨୫%କୁ ଏବଂ ଅଟୋମୋବାଇଲ୍ ଉପରେ ଶୁଳ୍କ ୨୫%ରୁ ୧୫%କୁ କମାଇବା ନେଇ ଆଲୋଚନା ହେଉଥିଲା। ଏହା ବଦଳରେ ଆମେରିକା ପାଇଁ କାନାଡାରେ ମଦ ବିକ୍ରି ସମ୍ପର୍କିତ ପ୍ରତିବନ୍ଧକ ହଟାଇବା ସହ ଅନ୍ୟାନ୍ୟ ବାଣିଜ୍ୟିକ ରିହାତି ଦେବା ନେଇ ଆଲୋଚନା ହୋଇଥିଲା।

ଆମେରିକାର ଶୁଳ୍କ ନୀତିକୁ ନେଇ ଦୁଇ ଦେଶ ମଧ୍ୟରେ ଗତ ବର୍ଷଠାରୁ ତିକ୍ତତା ଲାଗି ରହିଛି। ବ୍ୟବସାୟିକ ସଂଗଠନଗୁଡ଼ିକ ଚେତାବନୀ ଦେଇଛନ୍ତି ଯେ, ଅଧିକ ଶୁଳ୍କ ଉଭୟ ଦେଶର ଅର୍ଥନୀତିକୁ କ୍ଷତି ପହଞ୍ଚାଇବା ସହ ଗ୍ରାହକଙ୍କ ଖର୍ଚ୍ଚ ବଢ଼ାଇପାରେ ଏବଂ ଯୋଗାଣ ଶୃଙ୍ଖଳାକୁ ପ୍ରଭାବିତ କରିପାରେ।

ଏବେ କାନାଡାର ପ୍ରତିଶୋଧମୂଳକ ଶୁଳ୍କ ଘୋଷଣା ପରେ ଆମେରିକା-କାନାଡା ବାଣିଜ୍ୟ ସମ୍ପର୍କ ଆହୁରି ତିକ୍ତ ହେବାର ସମ୍ଭାବନା ରହିଛି।