ଭୁବନେଶ୍ୱର: ସ୍ୱଚ୍ଛତା କ୍ଷେତ୍ରରେ ଜାତୀୟ ସ୍ତରରେ ଆଉ ଏକ ବଡ଼ ସଫଳତା ହାସଲ କରିଛି ଓଡ଼ିଶାର ରାଜଧାନୀ ଭୁବନେଶ୍ୱର। ସ୍ୱଚ୍ଛ ସର୍ବେକ୍ଷଣ ୨୦୨୫-୨୬ରେ ସାରା ଦେଶରେ ପଞ୍ଚମ ସ୍ଥାନ ଅଧିକାର କରିଛି ଏହି ସହର। ୧୦ ଲକ୍ଷରୁ ଅଧିକ ଜନସଂଖ୍ୟା ଥିବା ସହର ବର୍ଗରେ ଏହି ମାନ୍ୟତା ମିଳିଛି। ଏଥିସହ ଓଡ଼ିଶାର ପ୍ରଥମ ସ୍ୱଚ୍ଛ ସହର ଭାବେ ମଧ୍ୟ ଭୁବନେଶ୍ୱର ସମ୍ମାନିତ ହୋଇଛି।

ନଭେମ୍ବର ୧୧ ତାରିଖରେ ନୂଆଦିଲ୍ଲୀର ବିଜ୍ଞାନ ଭବନଠାରେ ଆୟୋଜିତ ପୁରସ୍କାର ବିତରଣ ସମାରୋହରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏହି ସମ୍ମାନ ପ୍ରଦାନ କରିଥିଲେ। ଭୁବନେଶ୍ୱର ମେୟର ସୁଲୋଚନା ଦାସ, ବିଏମ୍‌ସି କମିଶନର ଚଞ୍ଚଳ ରାଣା, ଡେପୁଟି ମେୟର ମଞ୍ଜୁଲତା କହଁର ଓ ସ୍ୱାସ୍ଥ୍ୟ ଓ ପରିମଳ ଷ୍ଟାଣ୍ଡିଂ କମିଟି ଅଧ୍ୟକ୍ଷ ବିରଞ୍ଚି ନାରାୟଣ ମହାସୁପକାର ଏହି ପୁରସ୍କାର ଗ୍ରହଣ କରିଥିଲେ।

ଗତବର୍ଷର ନବମ ସ୍ଥାନରୁ ଏଥର ପଞ୍ଚମକୁ ଉନ୍ନତି

ସ୍ୱଚ୍ଛତା ରାଙ୍କିଂରେ ଭୁବନେଶ୍ୱର ଏଥର ଉଲ୍ଲେଖନୀୟ ଉନ୍ନତି କରିଛି। ଗତବର୍ଷ ନବମ ସ୍ଥାନରେ ଥିବା ରାଜଧାନୀ ଏଥର ପଞ୍ଚମ ସ୍ଥାନକୁ ଉଠିଛି। ୨୦୨୪ରେ ଏହାର ଜାତୀୟ ରାଙ୍କିଂ ୮୪ ଥିଲା ବୋଲି ରିପୋର୍ଟରେ ଉଲ୍ଲେଖ ରହିଛି।

ସହରର ପରିମଳ ବ୍ୟବସ୍ଥାରେ ଉନ୍ନତି, ଯାନ୍ତ୍ରିକ ରାସ୍ତା ସଫେଇ, ଅଳିଆର ପୃଥକୀକରଣ ଓ ବୈଜ୍ଞାନିକ ପଦ୍ଧତିରେ ବର୍ଜ୍ୟବସ୍ତୁ ପରିଚାଳନା ଭଳି ପଦକ୍ଷେପ ଏହି ସଫଳତାରେ ସହାୟକ ହୋଇଛି। ଏହା ସହ ସହରବାସୀଙ୍କ ସହଯୋଗ ଓ ସଚେତନତାକୁ ମଧ୍ୟ ଗୁରୁତ୍ୱ ଦିଆଯାଇଛି।

ସହରବାସୀଙ୍କୁ ସଫଳତାର ଶ୍ରେୟ ଦେଲେ ମେୟର

ପୁରସ୍କାର ଗ୍ରହଣ ପରେ ଭୁବନେଶ୍ୱର ଫେରିଥିବା ମେୟର ସୁଲୋଚନା ଦାସ ଏହି ସଫଳତାର ଶ୍ରେୟ ସହରବାସୀଙ୍କୁ ଦେଇଛନ୍ତି। ଏହି ଜାତୀୟ ସ୍ୱୀକୃତି ଭୁବନେଶ୍ୱରକୁ ଏକ ସ୍ୱଚ୍ଛ, ସୁନ୍ଦର, ସବୁଜ ଓ ସୁସ୍ଥ ସହର ଭାବେ ଗଢ଼ିତୋଳିବା ପାଇଁ ବିଏମ୍‌ସିର ପ୍ରତିବଦ୍ଧତାକୁ ଆହୁରି ଦୃଢ଼ କରିଛି ବୋଲି ସେ କହିଛନ୍ତି।

ଆଗାମୀ ଦିନରେ ସ୍ୱଚ୍ଛତା ଅଭିଯାନକୁ ଅଧିକ ବ୍ୟାପକ ଓ ଲୋକାଭିମୁଖୀ କରିବାକୁ ବିଏମ୍‌ସି ସଂକଳ୍ପବଦ୍ଧ ବୋଲି ମେୟର କହିଛନ୍ତି।

ସ୍ୱଚ୍ଛତାରେ ଓଡ଼ିଶାର ଅନ୍ୟ ସହରକୁ ମଧ୍ୟ ସମ୍ମାନ

ସ୍ୱଚ୍ଛ ସର୍ବେକ୍ଷଣ ୨୦୨୫-୨୬ରେ ଓଡ଼ିଶାର ଅନ୍ୟ ସହର ଓ ପୌରସଂସ୍ଥାଗୁଡ଼ିକ ମଧ୍ୟ ଜାତୀୟ ସ୍ତରରେ ସଫଳତା ପାଇଛନ୍ତି। ପୁରୀ ସ୍ୱଚ୍ଛ ଉପକୂଳ ସହର ବର୍ଗରେ ପ୍ରଥମ ସ୍ଥାନ ହାସଲ କରିଥିବାବେଳେ, ୨୦ ହଜାରରୁ ୫୦ ହଜାର ଜନସଂଖ୍ୟା ବର୍ଗରେ ଆସ୍କା ପୌରସଂସ୍ଥା ଦ୍ୱିତୀୟ ସ୍ଥାନ ପାଇଛି।

ଏହି ସଫଳତା ରାଜ୍ୟର ସହରାଞ୍ଚଳରେ ସ୍ୱଚ୍ଛତା, ବର୍ଜ୍ୟବସ୍ତୁ ପରିଚାଳନା ଓ ନାଗରିକଙ୍କ ଭାଗିଦାରୀ ବଢ଼ୁଥିବାର ସୂଚନା ଦେଉଛି।