ଭୁବନେଶ୍ୱର: ରାଜ୍ୟର ଦୁଇ ପ୍ରମୁଖ ସହର ଭୁବନେଶ୍ୱର ଓ ପୁରୀ ମଧ୍ୟରେ ଯାତାୟାତ ବ୍ୟବସ୍ଥାରେ ଆସିବ ବଡ଼ ପରିବର୍ତ୍ତନ। ଭୁବନେଶ୍ୱର-ପୁରୀ ଜାତୀୟ ରାଜପଥକୁ ୬ ଲେନ୍ରେ ପରିଣତ କରିବାକୁ ଯୋଜନା ହୋଇଛି। ଏହି ପ୍ରକଳ୍ପକୁ ଆସନ୍ତା ୨ରୁ ଅଢ଼େଇ ବର୍ଷ ମଧ୍ୟରେ ଶେଷ କରିବାକୁ ଲକ୍ଷ୍ୟ ରଖାଯାଇଛି।
ଏନେଇ ଭାରତୀୟ ଜାତୀୟ ରାଜପଥ ପ୍ରାଧିକରଣ (NHAI) ପକ୍ଷରୁ ବିସ୍ତୃତ ପ୍ରକଳ୍ପ ରିପୋର୍ଟ ବା DPR ପ୍ରସ୍ତୁତି ପ୍ରକ୍ରିୟା ଆରମ୍ଭ ହୋଇଛି। ଭୁବନେଶ୍ୱରର ନିର୍ମାଣ ସୌଧଠାରେ ଜାତୀୟ ରାଜପଥ ବିଭାଗ ଓ NHAIର ବିଭିନ୍ନ ପ୍ରକଳ୍ପର ସମୀକ୍ଷା ପରେ ପୂର୍ତ୍ତ, ଆଇନ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଏହି ସୂଚନା ଦେଇଛନ୍ତି।
ପ୍ରସ୍ତାବିତ ଯୋଜନା ଅନୁସାରେ ଭୁବନେଶ୍ୱରରୁ ପୁରୀ ପର୍ଯ୍ୟନ୍ତ ରାସ୍ତାରେ ମୁଖ୍ୟ ୬ ଲେନ୍ ସହ ସର୍ଭିସ୍ ଲେନ୍ର ବ୍ୟବସ୍ଥା ରହିବ। ଏହାଦ୍ୱାରା ଦୈନନ୍ଦିନ ଯାତାୟାତ ଅଧିକ ସୁଗମ ହେବା ସହ ରାସ୍ତାରେ ଟ୍ରାଫିକ୍ ଚାପ ହ୍ରାସ ପାଇବା ଆଶା କରାଯାଉଛି।
ଏହି ରାସ୍ତାରେ ସପ୍ତାହାନ୍ତ, ଛୁଟିଦିନ ଓ ରଥଯାତ୍ରା ଭଳି ବଡ଼ ଧାର୍ମିକ ଉତ୍ସବ ସମୟରେ ଯାନବାହନ ଚଳାଚଳ ବହୁତ ବଢ଼ିଯାଏ। ଫଳରେ ଯାତ୍ରୀ, ପର୍ଯ୍ୟଟକ ଓ ଜଗନ୍ନାଥ ଦର୍ଶନ ପାଇଁ ଆସୁଥିବା ଭକ୍ତମାନଙ୍କୁ ଦୀର୍ଘ ସମୟ ଟ୍ରାଫିକ୍ରେ ଅଟକି ରହିବାକୁ ପଡ଼େ। ୬ ଲେନ୍ ପ୍ରକଳ୍ପ କାର୍ଯ୍ୟକାରୀ ହେଲେ ଏହି ସମସ୍ୟାରୁ ଅନେକ ଆଶ୍ୱସ୍ତି ମିଳିପାରିବ।
ପ୍ରକଳ୍ପର ଡିଜାଇନ୍, ନିର୍ମାଣ ଯୋଜନା ଓ ଅନ୍ୟାନ୍ୟ ବୈଷୟିକ ଦିଗକୁ ନେଇ DPR ପ୍ରସ୍ତୁତ କରାଯିବ। ଏହା ସହ ଜମି ଅଧିଗ୍ରହଣ, ଜଙ୍ଗଲ ଜମି ଅନୁମତି ଏବଂ ପ୍ରକଳ୍ପ କାର୍ଯ୍ୟକାରିତା ସମୟରେ ଦେଖାଦେଉଥିବା ସମସ୍ୟାଗୁଡ଼ିକର ସମାଧାନ ଉପରେ ମଧ୍ୟ ସମୀକ୍ଷା ବୈଠକରେ ଆଲୋଚନା ହୋଇଛି।
ଯେଉଁ ପ୍ରକଳ୍ପଗୁଡ଼ିକରେ କାମ ଅଧାପନ୍ତରିଆ ରହିଛି, ସେଗୁଡ଼ିକୁ ଶୀଘ୍ର ଶେଷ କରିବାକୁ ସମ୍ପୃକ୍ତ ଅଧିକାରୀଙ୍କୁ ମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।
କେବଳ ଭୁବନେଶ୍ୱର-ପୁରୀ ରାସ୍ତା ନୁହେଁ, ରାଜଧାନୀରେ ରିଙ୍ଗ୍ ରୋଡ୍ ଓ ଆଉଟର ରିଙ୍ଗ୍ ରୋଡ୍ ନିର୍ମାଣ ଦିଗରେ ମଧ୍ୟ ସରକାର ପଦକ୍ଷେପ ନେଉଛନ୍ତି। ଏହି ପ୍ରକଳ୍ପଗୁଡ଼ିକ ଆଗକୁ ବଢ଼ିଲେ ଭୁବନେଶ୍ୱର ସହର ଭିତରେ ଟ୍ରାଫିକ୍ ଚାପ କମିବା ସହ ବାହ୍ୟ ଅଞ୍ଚଳରେ ଯାତାୟାତ ସୁବିଧା ବଢ଼ିବ ବୋଲି ଆଶା ରହିଛି।
ଏଥିସହ ରାଜ୍ୟର ବିଭିନ୍ନ ଜାତୀୟ ରାଜପଥ ପ୍ରକଳ୍ପର ଉଦ୍ଘାଟନ ଓ ଶିଳାନ୍ୟାସ ପାଇଁ ମଧ୍ୟ ଯୋଜନା ରହିଥିବା ମନ୍ତ୍ରୀ ସୂଚନା ଦେଇଛନ୍ତି।
ପୁରୀ ହେଉଛି ଓଡ଼ିଶାର ପ୍ରମୁଖ ଧାର୍ମିକ ଓ ପର୍ଯ୍ୟଟନସ୍ଥଳୀ। ପ୍ରତିଦିନ ହଜାର ହଜାର ଶ୍ରଦ୍ଧାଳୁ ଓ ପର୍ଯ୍ୟଟକ ଭୁବନେଶ୍ୱର ଦେଇ ପୁରୀ ଯାତ୍ରା କରନ୍ତି। ଏଭଳି ସ୍ଥିତିରେ ରାସ୍ତାର ସମ୍ପ୍ରସାରଣ ହେଲେ ଯାତ୍ରା ସମୟ କମିବା ସହ ପର୍ଯ୍ୟଟନ, ବାଣିଜ୍ୟ ଓ ସ୍ଥାନୀୟ ଅର୍ଥନୀତିକୁ ମଧ୍ୟ ଲାଭ ମିଳିପାରିବ।
ତେବେ ବର୍ତ୍ତମାନ ପ୍ରକଳ୍ପର DPR ପ୍ରସ୍ତୁତି ଆରମ୍ଭ ହୋଇଛି। ଏହାର ବିସ୍ତୃତ ଡିଜାଇନ୍, ଖର୍ଚ୍ଚ ଓ ନିର୍ମାଣ ସମୟସୂଚୀ ସମ୍ପର୍କରେ ଆଗାମୀ ପର୍ଯ୍ୟାୟରେ ଅଧିକ ସ୍ପଷ୍ଟତା ମିଳିବ।
ପ୍ରଦୂଷିତ ବାୟୁ ଯୋଗୁଁ ବଢ଼ିପାରେ ଟାଇପ୍‌-୨ ଡାଇବେଟି...
୧୨ ବର୍ଷୀୟା ନାବାଳିକା ଦୁଷ୍କର୍ମ-ହତ୍ୟା ମାମଲା: ପୋଲିସ ଏନ...
ବେଆଇନ ତମାଖୁ ଓ ନିଷିଦ୍ଧ ଇ-ସିଗାରେଟ୍ ବିକ୍ରି ଉପରେ ପୋଲିସ...
ନୂଆଦିଲ୍ଲୀ: କ୍ୟାନ୍ସର ଚିକିତ୍ସା କରାଉଥିବା ରୋଗୀ ଓ ସେମାନ...
ନୂଆଦିଲ୍ଲୀ: ଦେଶରେ ବାୟୁ ପ୍ରଦୂଷଣ ଏବେ ଏକ ଗମ୍ଭୀର ଜନସ୍ୱା...
ଉତ୍ତରପ୍ରଦେଶରେ ଜଣେ ମହିଳା ବକ୍ସରଙ୍କ ରହସ୍ୟଜନକ ମୃତ୍ୟୁକୁ...
ଭୁବନେଶ୍ୱର: ଆଜିକାଲି ଅନେକ ଲୋକ ନିଜ ସ୍ୱାସ୍ଥ୍ୟ ସମ୍ପର୍କର...
ଦୀପାବଳିର ଆଲୋକ ଓ ଉତ୍ସବ ମଧ୍ୟରେ ତାମିଲନାଡୁରେ ଖେଳିଯାଇଛି...
