ସ୍ଥାନୀୟ ଲୋକ ଓ ପୋଲିସ ସୂଚନା ଅନୁଯାୟୀ, ଅଭିଯୁକ୍ତ ଧାରୁଆ ଅସ୍ତ୍ରରେ ପ୍ରଥମେ ଜଗନ ସାହୁଙ୍କ ବେକ, ଛାତି ଓ ପେଟ ଅଞ୍ଚଳକୁ ଆକ୍ରମଣ କରିଥିଲା। ଫଳରେ ସେ ଘଟଣାସ୍ଥଳରେ ପ୍ରାଣ ହରାଇଥିଲେ। ତାଙ୍କୁ ବଞ୍ଚାଇବାକୁ ଯାଇଥିବା ବଟକୃଷ୍ଣ ସାହୁ ମଧ୍ୟ ଆକ୍ରମଣର ଶିକାର ହୋଇ ହାତ ଓ ଗୋଡ଼ରେ ଗୁରୁତର ଆଘାତ ପାଇଥିଲେ।

ଆହତ ବଟକୃଷ୍ଣ ସାହୁଙ୍କୁ ପ୍ରଥମେ ଭଣ୍ଡାରିପୋଖରୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ପରେ ତାଙ୍କ ଅବସ୍ଥା ସଙ୍କଟାପନ୍ନ ହେବାରୁ କଟକସ୍ଥିତ ଏସସିବି ମେଡିକାଲ କଲେଜ ଓ ହସ୍ପିଟାଲକୁ ସ୍ଥାନାନ୍ତର କରାଯାଇଛି।

ଏହି ହତ୍ୟାକାଣ୍ଡ ପରେ ଅଞ୍ଚଳରେ ଉତ୍ତେଜନା ଓ ଶୋକର ପରିବେଶ ସୃଷ୍ଟି ହୋଇଛି। ଜଗନ ସାହୁ ଜଣେ ସକ୍ରିୟ ଜନପ୍ରତିନିଧି ଏବଂ ଅଞ୍ଚଳରେ ଜଣାଶୁଣା ଯୁବକ ଥିବାରୁ ଘଟଣାଟି ସ୍ଥାନୀୟ ଲୋକଙ୍କୁ ମର୍ମାହତ କରିଛି।

ଘଟଣା ସମ୍ପର୍କରେ ପୋଲିସ ରତ୍ନାକର ସାହୁ ଓ ଜଗଦାନନ୍ଦ ନାୟକ ନାମକ ଦୁଇ ଜଣଙ୍କୁ ଅଟକ ରଖି ପଚରାଉଚରା କରୁଛି। ସୂତ୍ରରୁ ଜଣାପଡ଼ିଛି ଯେ, ପ୍ରାୟ ଦୁଇ ବର୍ଷ ପୂର୍ବରୁ ମଧ୍ୟ ରତ୍ନାକର ସାହୁ ଜଗନ ସାହୁଙ୍କ ଉପରେ ସମାନ ଧରଣର ଆକ୍ରମଣ କରିଥିଲେ ଏବଂ ପରେ ଜାମିନରେ ମୁକ୍ତ ହୋଇଥିଲେ।

ପୋଲିସ ପ୍ରାରମ୍ଭିକ ତଦନ୍ତରୁ ଏହି ଆକ୍ରମଣ ପଛରେ ପୁରୁଣା ଶତ୍ରୁତା ଥାଇପାରେ ବୋଲି ସନ୍ଦେହ କରୁଛି। ଭଣ୍ଡାରିପୋଖରୀ ପୋଲିସ ଘଟଣାର ତଦନ୍ତ ଆରମ୍ଭ କରିଥିବାବେଳେ ଏହା ପୂର୍ବ ଯୋଜନାବଦ୍ଧ ହତ୍ୟା କି ନୁହେଁ, ସେ ଦିଗରେ ମଧ୍ୟ ଖୋଳତାଡ଼ ଚାଲିଛି।