ମଲୟାଲମ୍ ସିନେମାରେ ଯୋଡ଼ି ହୋଇଛି ଆଉ ଏକ ବଡ଼ ବକ୍ସ ଅଫିସ୍ ରେକର୍ଡ। ନିଭିନ୍ ପୌଲି ଓ ମମିଥା ବୈଜୁଙ୍କ ଅଭିନୀତ‘ବେଥଲେହେମ୍ କୁଡୁମ୍ବା ୟୁନିଟ୍’ମାତ୍ର ୨୪ ଦିନରେ ପ୍ରାୟ ୩୦୪.୯ କୋଟି ଟଙ୍କା ବିଶ୍ୱବ୍ୟାପୀ ଆୟ କରି ମଲୟାଲମ୍ ସିନେମାର ସର୍ବାଧିକ ଆୟକାରୀ ଫିଲ୍ମ ହୋଇଛି।

ଗିରିଶ୍ ଏଡିଙ୍କ ନିର୍ଦ୍ଦେଶିତ ଏହି ରୋମାଣ୍ଟିକ୍ କମେଡି ଫିଲ୍ମଟି ସେପ୍ଟେମ୍ବର ୧୩ରେ ଏହି ରେକର୍ଡ ହାସଲ କରିଥିବା ରିପୋର୍ଟ ହୋଇଛି। ଏହା ପୂର୍ବରୁ‘ଲୋକାହ୍ ଚାପ୍ଟର୍ ୧: ଚନ୍ଦ୍ରା’ପ୍ରାୟ ୩୦୨ କୋଟି ଟଙ୍କାର ବିଶ୍ୱବ୍ୟାପୀ ଆୟ ସହ ଏହି ରେକର୍ଡ ନିଜ ନାମରେ ରଖିଥିଲା।

‘ବେଥଲେହେମ୍ କୁଡୁମ୍ବା ୟୁନିଟ୍’ର ସଫଳତା ନିଭିନ୍ ପୌଲିଙ୍କ ପାଇଁ ମଧ୍ୟ ଏକ ବଡ଼ କମ୍ବ୍ୟାକ୍ ଭାବେ ଦେଖାଯାଉଛି। ଚତୁର୍ଥ ସପ୍ତାହରେ ମଧ୍ୟ ଫିଲ୍ମର ବ୍ୟବସାୟ ଜାରି ରହିଛି ଏବଂ ନୂଆ ଫିଲ୍ମ ରିଲିଜ୍ ସତ୍ତ୍ୱେ ଦର୍ଶକଙ୍କ ମଧ୍ୟରେ ଏହାର ଚାହିଦା କମିନାହିଁ।

୩୦୦ କୋଟି କ୍ଲବ୍ରେ ଏଣ୍ଟ୍ରି

ଫିଲ୍ମଟି ୨୪ତମ ଦିନରେ ବିଶ୍ୱବ୍ୟାପୀ ୩୦୦ କୋଟି ଟଙ୍କାର ମାଇଲ୍ଷ୍ଟୋନ୍ ପାର୍ କରିଥିଲା। ମଲୟାଲମ୍ ସିନେମାର ଗତ କିଛି ବର୍ଷର ବକ୍ସ ଅଫିସ୍ ବୃଦ୍ଧି ମଧ୍ୟରେ ଏହି ସଫଳତାକୁ ଆଉ ଏକ ବଡ଼ ଉପଲବ୍ଧି ଭାବେ ଦେଖାଯାଉଛି।

‘ମଞ୍ଜୁମେଲ୍ ବଏଜ୍’, ‘୨୦୧୮’, ‘L2: ଏମ୍ପୁରାନ୍’ ଏବଂ ‘ଲୋକାହ୍ ଚାପ୍ଟର୍ ୧: ଚନ୍ଦ୍ରା’ ଭଳି ଫିଲ୍ମଗୁଡ଼ିକ ପରେ ମଲୟାଲମ୍ ଇଣ୍ଡଷ୍ଟ୍ରିର ବକ୍ସ ଅଫିସ୍ ଯାତ୍ରାରେ ଏହା ଆଉ ଏକ ବଡ଼ ରେକର୍ଡ।ଫିଲ୍ମଟିରେ ନିଭିନ୍ ପୌଲି ଓ ମମିଥା ବୈଜୁଙ୍କ ବ୍ୟତୀତ ସଙ୍ଗୀତ ପ୍ରତାପ, ଶ୍ୟାମ ମୋହନ, ବିନୟ ଫୋର୍ଟ, ସୁରେଶ କୃଷ୍ଣ, ବିନ୍ଦୁ ପାଣିକର ଓ ଶ୍ରିନ୍ଦା ପ୍ରମୁଖ ଅଭିନୟ କରିଛନ୍ତି। ଭାବନା ଷ୍ଟୁଡିଓସ୍ର ବ୍ୟାନରରେ ଫହାଦ୍ ଫାସିଲ୍, ଦିଲୀଶ୍ ପୋଥନ୍ ଓ ଶ୍ୟାମ ପୁଷ୍କରନ୍ ଏହି ଫିଲ୍ମକୁ ପ୍ରଯୋଜନା କରିଛନ୍ତି।