ବାଂଲାଦେଶର ରାଜନୀତିରେ ପୁଣି ଥରେ ବଡ଼ ହଇଚଇ ସୃଷ୍ଟି ହୋଇଛି। ଦେଶର ରାଷ୍ଟ୍ରପତିମହମ୍ମଦ ଶାହାବୁଦ୍ଦିନତାଙ୍କ ପାଞ୍ଚ ବର୍ଷିଆ କାର୍ଯ୍ୟକାଳ ଶେଷ ହେବାର ପ୍ରାୟ ଦୁଇ ବର୍ଷ ପୂର୍ବରୁ ଇସ୍ତଫା ଦେଇପାରନ୍ତି ବୋଲି ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି।

ସୂଚନା ଅନୁଯାୟୀ, ପ୍ରଧାନମନ୍ତ୍ରୀତାରିକ୍ ରହମାନଙ୍କ ନେତୃତ୍ୱାଧୀନ ବିଏନପି ସରକାର ରାଷ୍ଟ୍ରପତିଙ୍କ କିଛି କାର୍ଯ୍ୟକଳାପକୁ ନେଇ ଅସନ୍ତୁଷ୍ଟ ଥିବା କୁହାଯାଉଛି। ବିଶେଷ କରି ଭାରତରେ ଅବସ୍ଥାନ କରୁଥିବା ପୂର୍ବତନ ପ୍ରଧାନମନ୍ତ୍ରୀଶେଖ୍ ହସିନାଙ୍କ ସହ ସେ କଥିତ ଭାବେ ଯୋଗାଯୋଗ କରିବାକୁ ଚେଷ୍ଟା କରିଥିବା ଖବର ସାମ୍ନାକୁ ଆସିବା ପରେ ବିବାଦ ବଢ଼ିଛି।

୨୦୨୪ ଅଗଷ୍ଟରେ ଛାତ୍ର ଆନ୍ଦୋଳନ ପରେ ଶେଖ୍ ହସିନା ସରକାର କ୍ଷମତାଚ୍ୟୁତ ହୋଇଥିଲା। ସେହି ସମୟରୁ ରାଷ୍ଟ୍ରପତି ଶାହାବୁଦ୍ଦିନ ପୂର୍ବ ସରକାର ସହ ଜଡ଼ିତ ସର୍ବୋଚ୍ଚ ସାମ୍ବିଧାନିକ ପଦବୀରେ ରହିଥିବା ଏକମାତ୍ର ବ୍ୟକ୍ତି ଭାବେ ଚର୍ଚ୍ଚାରେ ରହିଆସିଛନ୍ତି।

ଏପରି ସମୟରେ ଶେଖ୍ ହସିନା ଆସନ୍ତା ଡିସେମ୍ବର ସୁଦ୍ଧା ବାଂଲାଦେଶ ଫେରିବାକୁ ଘୋଷଣା କରିଥିବାରୁ ଦେଶର ରାଜନୈତିକ ପରିବେଶ ଆହୁରି ସଂବେଦନଶୀଳ ହୋଇପଡ଼ିଛି।

ଉଲ୍ଲେଖଯୋଗ୍ୟ ଯେ, ନଭେମ୍ବର ୨୦୨୫ରେ ବାଂଲାଦେଶର ଆନ୍ତର୍ଜାତୀୟ ଅପରାଧ ଟ୍ରିବ୍ୟୁନାଲ୍ ଶେଖ୍ ହସିନା ଓ ପୂର୍ବତନ ଗୃହମନ୍ତ୍ରୀ ଅସଦୁଜ୍ଜାମାନ ଖାନଙ୍କୁ ମାନବାଧିକାର ଉଲ୍ଲଂଘନ ମାମଲାରେ ମୃତ୍ୟୁଦଣ୍ଡ ଦେଇଥିଲେ।

ମହମ୍ମଦ ଶାହାବୁଦ୍ଦିନ ୨୦୨୩ ଏପ୍ରିଲରେ ପାଞ୍ଚ ବର୍ଷ ପାଇଁ ରାଷ୍ଟ୍ରପତି ଭାବେ ଶପଥ ନେଇଥିଲେ। ବାଂଲାଦେଶ ସମ୍ବିଧାନ ଅନୁଯାୟୀ, ସେ ଯଦି ଇସ୍ତଫା ଦିଅନ୍ତି, ତେବେ ନୂତନ ରାଷ୍ଟ୍ରପତି ନିର୍ବାଚିତ ନ ହେବା ପର୍ଯ୍ୟନ୍ତ ସଂସଦର ବାଚସ୍ପତିହାଫିଜୁଦ୍ଦିନ ଅହମ୍ମଦକାର୍ଯ୍ୟକାରୀ ରାଷ୍ଟ୍ରପତି ଭାବେ ଦାୟିତ୍ୱ ସମ୍ଭାଳିବେ।