ଥାଇଲ୍ୟାଣ୍ଡର ରାଜଧାନୀ ବ୍ୟାଙ୍କକର ଚାତୁଚକ ଜିଲ୍ଲାରେ ଥିବାନା ଲାଦପ୍ରାଓ (Na Ladprao)ନାମକ ଏକ ଭୋଜନାଳୟରେ ସୋମବାର ମଧ୍ୟରାତ୍ରିରେ ଭୟଙ୍କର ଅଗ୍ନିକାଣ୍ଡ ଘଟିଛି। ଏହି ଦୁର୍ଘଟଣାରେ ଅତି କମରେ ୨୭ ଜଣଙ୍କ ମୃତ୍ୟୁ ଘଟିଥିବାବେଳେ ୬୩ ଜଣ ଆହତ ହୋଇଛନ୍ତି। ଆହତଙ୍କ ମଧ୍ୟରୁ ୨୨ ଜଣଙ୍କ ଅବସ୍ଥା ଗୁରୁତର ରହିଛି।

ସ୍ଥାନୀୟ ସମୟ ଅନୁଯାୟୀ ରାତି ପ୍ରାୟ ୧୨ଟା ୨ ମିନିଟ୍ରେ ଏହି ଘଟଣା ଘଟିଥିଲା। ସେହି ସମୟରେ ଭୋଜନାଳୟରେ ବହୁ ସଂଖ୍ୟକ ଲୋକ ଉପସ୍ଥିତ ଥିଲେ।

ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ପ୍ରାୟ ୩୦ ମିନିଟ୍ର ଉଦ୍ୟମ ପରେ ନିଆଁକୁ ନିୟନ୍ତ୍ରଣକୁ ଆଣିଥିଲେ। ମୃତକଙ୍କ ମଧ୍ୟରେ ୯ ଜଣ ପୁରୁଷ ଏବଂ ୧୮ ଜଣ ମହିଳା ଥିବା ସୂଚନା ମିଳିଛି।

ଘଟଣା ପରେ ପ୍ରଧାନମନ୍ତ୍ରୀ ଅନୁତିନ୍ ଚାର୍ନଭିରାକୁଲ, ବ୍ୟାଙ୍କକ ଗଭର୍ନର ଚାଡଚାର୍ଟ ସିତ୍ତିପୁଣ୍ଟ ଓ ବିପର୍ଯ୍ୟୟ ନିବାରଣ ବିଭାଗର ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଉଦ୍ଧାର ଓ ରାହାତ କାର୍ଯ୍ୟର ତଦାରଖ କରିଥିଲେ।

ପ୍ରାରମ୍ଭିକ ତଦନ୍ତରୁ ଜଣାପଡ଼ିଛି ଯେ, ମଞ୍ଚରେ ଥିବା ଏକ ସର୍କିଟ୍ ବ୍ରେକରରୁ ଅଗ୍ନିକାଣ୍ଡର ସୂଚନା ମିଳିଥିଲା। ଏହା ପରେ ବିଦ୍ୟୁତ୍ ବିଚ୍ଛିନ୍ନ ହୋଇ ବିସ୍ଫୋରଣ ଘଟିଥିଲା ଏବଂ ନିଆଁ ଦ୍ରୁତ ଗତିରେ ସମଗ୍ର ଭୋଜନାଳୟକୁ ବ୍ୟାପିଯାଇଥିଲା।

ବ୍ୟାଙ୍କକ ଗଭର୍ନରଙ୍କ କହିବା ଅନୁଯାୟୀ, ଛାତରେ ବ୍ୟବହୃତ ସଜାସଜ୍ଜା ସାମଗ୍ରୀ ଅତ୍ୟନ୍ତ ଶୀଘ୍ର ନିଆଁକୁ ବ୍ୟାପିବାରେ ସାହାଯ୍ୟ କରିଥିଲା। ଏହି ସାମଗ୍ରୀରୁ ବାହାରିଥିବା ବିଷାକ୍ତ ଧୂଆଁ ଅଧିକାଂଶ ମୃତ୍ୟୁର କାରଣ ହୋଇଥିବା କୁହାଯାଇଛି।

ଅଧିକାରୀମାନେ ସୂଚନା ଦେଇଛନ୍ତି ଯେ, ଭୋଜନାଳୟରେ ଜରୁରୀକାଳୀନ ନିର୍ଗମ ପଥ ଥିଲା। କିନ୍ତୁ ଆତଙ୍କିତ ହୋଇ ଅନେକ ଲୋକ ପଛପଟରେ ଥିବା ଶୌଚାଳୟ ଆଡ଼କୁ ଦୌଡ଼ିଯାଇଥିବାରୁ ଉଦ୍ଧାର କାର୍ଯ୍ୟ ବାଧାପ୍ରାପ୍ତ ହୋଇଥିଲା।

ବର୍ତ୍ତମାନ ମୃତକଙ୍କ ପରିଚୟ ଚିହ୍ନଟ କରିବା ସହ ଘଟଣାର ସଠିକ୍ କାରଣ ନେଇ ତଦନ୍ତ ଜାରି ରହିଛି।