ଓଡ଼ିଶାର ବାଲେଶ୍ୱର ଜିଲ୍ଲାର ସିଙ୍ଗଲା ଥାନା ଅଧୀନ ବେଣ୍ଟାପୁର ଗ୍ରାମସ୍ଥିତ ମା' ମଙ୍ଗଳା ମନ୍ଦିରରେ ବଡ଼ ଧରଣର ଚୋରି ଘଟଣା ସାମ୍ନାକୁ ଆସିଛି। ଦୁର୍ବୃତ୍ତମାନେ ମନ୍ଦିରର ତାଲା ଓ ଲୁହା ଗ୍ରିଲ୍ ଭାଙ୍ଗି ମା'ଙ୍କର ପ୍ରାୟ୪ ଲକ୍ଷ ଟଙ୍କା ମୂଲ୍ୟର ସୁନା ଅଳଙ୍କାରଲୁଟି ନେଇଛନ୍ତି।

ଶନିବାର ସକାଳେ ସ୍ଥାନୀୟ ଲୋକମାନେ ମନ୍ଦିରକୁ ଆସିବା ପରେ ତାଲା ଭଙ୍ଗା ଓ ଗ୍ରିଲ୍ କ୍ଷତିଗ୍ରସ୍ତ ଅବସ୍ଥାରେ ଦେଖିଥିଲେ। ଏହାପରେ ଚୋରି ଘଟଣା ସାମ୍ନାକୁ ଆସିଥିଲା।

ସ୍ଥାନୀୟ ଲୋକଙ୍କ କହିବା ଅନୁସାରେ, ଶୁକ୍ରବାର ସନ୍ଧ୍ୟାରେ ନୀତିକାନ୍ତି ସରିବା ପରେ ମନ୍ଦିରକୁ ତାଲା ପକାଯାଇଥିଲା। ରାତିରେ ଚୋରମାନେ ମନ୍ଦିରରେ ପଶି ଏହି ଚୋରି କରିଥିବା ସନ୍ଦେହ କରାଯାଉଛି।

ମା'ଙ୍କର ମୁକୁଟ ସମେତ ସବୁ ଅଳଙ୍କାର ଲୁଟ୍

ସ୍ଥାନୀୟ ବାସିନ୍ଦା ଦେବେନ୍ଦ୍ର ନାଥ ଦେ କହିଛନ୍ତି, ସକାଳେ ମନ୍ଦିରକୁ ଆସି ଦେଖିଲେ ଦୁଇଟି ଗ୍ରିଲ୍ ଭଙ୍ଗା ଥିଲା। ଭିତରକୁ ପ୍ରବେଶ କରିବା ପରେ ମା'ଙ୍କର ସୁନା ମୁକୁଟ, ହାର, ବାହୁଡ଼ି, ପାଦୁକା ସହ ସମସ୍ତ ଅଳଙ୍କାର ଚୋରି ହୋଇଥିବା ଜଣାପଡ଼ିଥିଲା।

ସେ କହିଛନ୍ତି ଯେ, ଚୋରି ହୋଇଥିବା ଅଳଙ୍କାରର ମୂଲ୍ୟ ପ୍ରାୟ୪ ଲକ୍ଷ ଟଙ୍କା। ଘଟଣା ସମ୍ପର୍କରେ ତୁରନ୍ତ ସିଙ୍ଗଲା ଥାନାରେ ଏତଲା ଦିଆଯାଇଥିଲା।

ପୁଲିସର ତଦନ୍ତ ଜାରି

ଅଭିଯୋଗ ପାଇବା ପରେ ସିଙ୍ଗଲା ପୁଲିସ ଘଟଣାସ୍ଥଳରେ ପହଞ୍ଚି ଛାନଭିନ ଆରମ୍ଭ କରିଛି। ଘଟଣାସ୍ଥଳରୁ ବିଭିନ୍ନ ପ୍ରମାଣ ସଂଗ୍ରହ କରାଯାଉଥିବା ବେଳେ ଚୋରମାନଙ୍କୁ ଚିହ୍ନଟ କରିବାକୁ ତଦନ୍ତ ଜାରି ରହିଛି।

ଏହି ଘଟଣା ପରେ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଅଞ୍ଚଳର ସମସ୍ତ ମନ୍ଦିରରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବାକୁ ସେମାନେ ଦାବି କରିଛନ୍ତି। ଏହି ଚୋରି ପଛରେ କୌଣସି ସଂଗଠିତ ଗ୍ୟାଙ୍ଗର ସମ୍ପୃକ୍ତି ରହିଛି କି ନାହିଁ, ସେ ଦିଗରେ ମଧ୍ୟ ପୁଲିସ ତଦନ୍ତ କରୁଛି।