ଓଡ଼ିଶା କ୍ରୀଡ଼ା ଜଗତ ପାଇଁ ଆସିଛି ଏକ ବଡ଼ ଖୁସି ଖବର। ଦୀର୍ଘ ୮ ବର୍ଷ ପରେ ରାଜ୍ୟକୁ ଫେରିଛି ଅନ୍ତର୍ଜାତୀୟ ରଗ୍‌ବୀ ପ୍ରତିଯୋଗିତା। ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଆଜିଠୁ ଆରମ୍ଭ ହେଉଛି ଏସିଆ ରଗ୍‌ବୀ ଏମିରେଟ୍ସ ଅଣ୍ଡର-୨୦ ସେଭେନ୍ସ ଚାମ୍ପିୟନସିପ୍‌। ଏହି ଅନ୍ତର୍ଜାତୀୟ ପ୍ରତିଯୋଗିତାରେ ୧୦ଟି ଦେଶର ୧୭ଟି ଦଳ ଭାଗ ନେଉଛନ୍ତି।

ସବୁଠାରୁ ଖୁସିର କଥା ହେଉଛି, ଭାରତୀୟ ଦଳରେ ୮ ଜଣ ଓଡ଼ିଆ ଖେଳାଳି ସ୍ଥାନ ପାଇଛନ୍ତି। ଉଭୟ ପୁରୁଷ ଓ ମହିଳା ବର୍ଗରେ ଓଡ଼ିଆ ଖେଳାଳିଙ୍କ ଏହି ଉପସ୍ଥିତି ରାଜ୍ୟ ପାଇଁ ଗର୍ବର ବିଷୟ ପାଲଟିଛି।

ଭାରତୀୟ ଦଳରେ ୮ ଓଡ଼ିଆ ଖେଳାଳି

ଏହି ଚାମ୍ପିୟନସିପ୍‌ ପାଇଁ ଭାରତୀୟ ପୁରୁଷ ଓ ମହିଳା ଦଳରେ ମୋଟ ୮ ଜଣ ଓଡ଼ିଆ ଖେଳାଳି ସ୍ଥାନ ପାଇଛନ୍ତି।

ପୁରୁଷ ଦଳରେ ସ୍ଥାନ ପାଇଥିବା ୫ ଜଣ ଖେଳାଳି ହେଲେ:

• ଭରତ କିଷାନ

• ବିଦ୍ୟାଧର ମାଝୀ

• ଚରଣ ହେମ୍ବ୍ରମ

• ରାହୁଲ ମାଝୀ

• ସୁବାସ ହାଁସଦା

ସେହିପରି ମହିଳା ଦଳରେ ସ୍ଥାନ ପାଇଛନ୍ତି ୩ ଜଣ ଓଡ଼ିଆ ଖେଳାଳି:

• ମାମାଲି ସିଂ

• ଅନିତା ମୁର୍ମୁ

• ସୁମିତ୍ରା ମୁର୍ମୁ

ଏହି ୮ ଜଣ ଖେଳାଳିଙ୍କ ଯୋଗଦାନ ଓଡ଼ିଶାର ରଗ୍‌ବୀ କ୍ରୀଡ଼ା ପାଇଁ ଏକ ଗର୍ବର ମୁହୂର୍ତ୍ତ ।

୧୦ ଦେଶର ୧୭ ଦଳ ନେବେ ଭାଗ

ଏହି ଚାମ୍ପିୟନସିପ୍‌ରେ ଭାରତ ସମେତ ଚୀନ, ଉଜବେକିସ୍ତାନ, ଚାଇନିଜ୍ ତାଇପେଇ, ନେପାଳ, ଶ୍ରୀଲଙ୍କା, ମାଲେସିଆ, ଥାଇଲାଣ୍ଡ, ସିଙ୍ଗାପୁର ଓ ଜୋର୍ଡାନର ଦଳ ଭାଗ ନେଉଛନ୍ତି।

ଉଭୟ ପୁରୁଷ ଓ ମହିଳା ବର୍ଗରେ ଏହି ପ୍ରତିଯୋଗିତା ଅନୁଷ୍ଠିତ ହେବ। ରଗ୍‌ବୀ ଇଣ୍ଡିଆ, ରାଜ୍ୟ କ୍ରୀଡ଼ା ବିଭାଗ ଏବଂ ଓଡ଼ିଶା ରଗ୍‌ବୀ ଫୁଟବଲ୍ ଆସୋସିଏସନର ମିଳିତ ଆନୁକୂଲ୍ୟରେ ଆଜି ଓ ଆସନ୍ତାକାଲି ମ୍ୟାଚ୍‌ଗୁଡ଼ିକ ଖେଳାଯିବ ।

କ୍ରୀଡ଼ାମନ୍ତ୍ରୀ କଲେ ଟ୍ରଫି ଅନାବରଣ

ପ୍ରତିଯୋଗିତା ଆରମ୍ଭ ପୂର୍ବରୁ ରାଜ୍ୟ କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ ସୁରଜ ସମସ୍ତ ଦଳର ଅଧିନାୟକଙ୍କ ଉପସ୍ଥିତିରେ ଚାମ୍ପିୟନସିପ୍‌ର ଟ୍ରଫି ଅନାବରଣ କରିଛନ୍ତି।

ଦୀର୍ଘ ୮ ବର୍ଷ ପରେ ଓଡ଼ିଶାରେ ଅନ୍ତର୍ଜାତୀୟ ରଗ୍‌ବୀ ଫେରିଥିବାରୁ ଏହା ରାଜ୍ୟ ପାଇଁ ଗର୍ବର ବିଷୟ ବୋଲି କହିଛନ୍ତି କ୍ରୀଡ଼ାମନ୍ତ୍ରୀ।

କଳିଙ୍ଗ ଷ୍ଟାଡିୟମରେ ଏହି ଅନ୍ତର୍ଜାତୀୟ ଆୟୋଜନ ଓ ଭାରତୀୟ ଦଳରେ ୮ ଜଣ ଓଡ଼ିଆ ଖେଳାଳିଙ୍କ ଉପସ୍ଥିତି ରାଜ୍ୟର କ୍ରୀଡ଼ା ଜଗତକୁ ନୂଆ ଉତ୍ସାହ ଦେଇଛି।