କୋଟିଆରେ ଫେଲ୍ ମାରିଲା ଆନ୍ଧ୍ରର ନିର୍ବାଚନୀ ରଣନୀତି, ୩ ପ୍ରବେଶ ପଥ ସିଲ୍ କଲା ଓଡ଼ିଶା

କୋରାପୁଟ: କୋଟିଆରେ ନିର୍ବାଚନ କରାଇବାକୁ ଆନ୍ଧ୍ରପ୍ରଦେଶର ଉଦ୍ୟମକୁ ବଡ଼ ଝଟକା ଲାଗିଛି। ଓଡ଼ିଶା ପ୍ରଶାସନର କଡ଼ା ସୁରକ୍ଷା ବ୍ୟବସ୍ଥା ଓ ସୀମାରେ ଅବରୋଧ ଯୋଗୁଁ ଶେଷରେ କୋଟିଆ ଅଞ୍ଚଳ ବାହାରେ ମତଦାନ କେନ୍ଦ୍ର ସ୍ଥାପନ କରିବାକୁ ବାଧ୍ୟ ହୋଇଛି ଆନ୍ଧ୍ରପ୍ରଦେଶ। ଏହାକୁ କୋଟିଆରେ ଓଡ଼ିଶା ପ୍ରଶାସନର ଏକ ବଡ଼ ପଦକ୍ଷେପ ଭାବେ ଦେଖାଯାଉଛି।

୩ଟି ପ୍ରବେଶ ପଥ ସିଲ୍ କଲା ଓଡ଼ିଶା ପ୍ରଶାସନ

କୋଟିଆକୁ ନେଇ ଓଡ଼ିଶା ଓ ଆନ୍ଧ୍ରପ୍ରଦେଶ ମଧ୍ୟରେ ଦୀର୍ଘଦିନ ଧରି ସୀମା ବିବାଦ ଲାଗି ରହିଛି। ଏହି ବିବାଦୀୟ ଅଞ୍ଚଳରେ ନିଜର ପ୍ରଶାସନିକ ଓ ରାଜନୈତିକ ପ୍ରଭାବ ବଢ଼ାଇବାକୁ ଉଭୟ ରାଜ୍ୟ ନିଜ ନିଜ ସ୍ତରରେ ଉଦ୍ୟମ କରୁଛନ୍ତି।

ଆନ୍ଧ୍ରପ୍ରଦେଶ କୋଟିଆ ଅଞ୍ଚଳରେ ପଞ୍ଚାୟତ ନିର୍ବାଚନ କରାଇବାକୁ ପ୍ରସ୍ତୁତି କରିଥିବା ବେଳେ ଓଡ଼ିଶା ପ୍ରଶାସନ ସତର୍କ ହୋଇଉଠିଥିଲା। କୋରାପୁଟ ଜିଲ୍ଲା ପ୍ରଶାସନ କୋଟିଆକୁ ସଂଯୋଗ କରୁଥିବା ତିନୋଟି ପ୍ରମୁଖ ପ୍ରବେଶ ପଥକୁ ସିଲ୍ କରିଥିଲା। ସୀମାନ୍ତ ରାସ୍ତାରେ ଯାଞ୍ଚ ଓ ନିରୀକ୍ଷଣକୁ ମଧ୍ୟ ଜୋରଦାର କରାଯାଇଥିଲା।

BNSS ଧାରା ୧୬୩ ଲାଗୁ, ସୀମାରେ କଡ଼ା ପହରା

କୋଟିଆରେ ଶାନ୍ତିଶୃଙ୍ଖଳା ବଜାୟ ରଖିବା ଏବଂ କୌଣସି ଅପ୍ରୀତିକର ପରିସ୍ଥିତି ଏଡ଼ାଇବା ପାଇଁ ପ୍ରଶାସନ ପକ୍ଷରୁ BNSS ଧାରା ୧୬୩ ଲାଗୁ କରାଯାଇଥିଲା। ଏହା ସହ ସୀମାନ୍ତ ଅଞ୍ଚଳରେ ପୋଲିସ ଓ ପ୍ରଶାସନିକ ଟିମ୍ ମୁତୟନ କରାଯାଇଥିଲା।

ସମ୍ବେଦନଶୀଳ ଅଞ୍ଚଳଗୁଡ଼ିକରେ ଯାତାୟାତ ଉପରେ ନଜର ରଖାଯିବା ସହ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରାଯାଇଥିଲା।

କୋଟିଆ ବାହାରେ ବୁଥ୍ କରିବାକୁ ବାଧ୍ୟ ହେଲା ଆନ୍ଧ୍ର

ଓଡ଼ିଶା ପ୍ରଶାସନର ଏହି କଡ଼ା ପଦକ୍ଷେପ ପରେ ଆନ୍ଧ୍ରପ୍ରଦେଶ ନିଜର ନିର୍ବାଚନୀ ଯୋଜନାରେ ପରିବର୍ତ୍ତନ କରିଥିଲା। କୋଟିଆ ଭିତରେ ମତଦାନ କେନ୍ଦ୍ର ସ୍ଥାପନ କରିବା ପରିବର୍ତ୍ତେ ନେରେଡିବାଲସା ନିକଟସ୍ଥ ସାରିକା ଏବଂ ଅନ୍ୟ କେତେକ ସ୍ଥାନରେ ଭୋଟ୍ ଗ୍ରହଣ କରାଯାଉଛି।

ଅର୍ଥାତ୍ କୋଟିଆ ଭିତରେ ନିର୍ବାଚନୀ କାର୍ଯ୍ୟକଳାପ କରିବାର ଯୋଜନାରୁ ଆନ୍ଧ୍ରକୁ ପଛକୁ ହଟିବାକୁ ପଡ଼ିଛି। ଏହି ପରିବର୍ତ୍ତନକୁ ଓଡ଼ିଶାର ସୁରକ୍ଷା ଓ ପ୍ରଶାସନିକ ପଦକ୍ଷେପର ପ୍ରଭାବ ଭାବେ ଦେଖାଯାଉଛି।

ସୀମାରେ ଓଡ଼ିଶା ପ୍ରଶାସନର ନଜର

ନିର୍ବାଚନୀ କାର୍ଯ୍ୟକଳାପ ମଧ୍ୟରେ କୋଟିଆର ତିନୋଟି ପ୍ରମୁଖ ପ୍ରବେଶ ପଥରେ ପୋଲିସ ଓ ପ୍ରଶାସନିକ ଟିମ୍ ପକ୍ଷରୁ ଯାଞ୍ଚ ଜାରି ରହିଛି। ବିଭିନ୍ନ ରାଜନୈତିକ ଦଳର ସଦସ୍ୟମାନେ ମଧ୍ୟ ସୀମାନ୍ତ ଅଞ୍ଚଳରେ ଉପସ୍ଥିତ ରହି ସ୍ଥିତି ଉପରେ ନଜର ରଖିଛନ୍ତି।

କୋଟିଆରେ ଓଡ଼ିଶାର ପ୍ରଶାସନିକ ଉପସ୍ଥିତି, ସୀମା ସୁରକ୍ଷା ଓ ସ୍ଥାନୀୟ ଲୋକଙ୍କ ଆସ୍ଥା ବଜାୟ ରଖିବା ଏବେ ସରକାରଙ୍କ ପାଇଁ ବଡ଼ ଆହ୍ୱାନ।

କୋଟିଆ ବିବାଦର ସମାଧାନ କେବେ?

କୋଟିଆକୁ ନେଇ ଦୁଇ ରାଜ୍ୟ ମଧ୍ୟରେ ଦୀର୍ଘବର୍ଷ ଧରି ଚାଲିଥିବା ବିବାଦର ସ୍ଥାୟୀ ସମାଧାନ ଏବେ ବି ହୋଇପାରିନାହିଁ। ନିର୍ବାଚନୀ ଉଦ୍ୟମକୁ ନେଇ ପୁଣିଥରେ ଏହି ପ୍ରସଙ୍ଗ ଚର୍ଚ୍ଚାକୁ ଆସିଛି।

ତେବେ ଓଡ଼ିଶାର ସୀମା ଓ ସ୍ୱାର୍ଥ ସୁରକ୍ଷା ସହ ସ୍ଥାନୀୟ ଲୋକଙ୍କ ଅଧିକାରକୁ ନେଇ ଆଗକୁ ଉଭୟ ରାଜ୍ୟ କି ପଦକ୍ଷେପ ନେଉଛନ୍ତି, ତାହା ଉପରେ ଏବେ ସମସ୍ତଙ୍କ ନଜର।