ଆମେରିକାର ମିଆମି ଆନ୍ତର୍ଜାତୀୟ ବିମାନବନ୍ଦରରେ ରବିବାର ଲ୍ୟାଣ୍ଡିଂ ସମୟରେ ଆମାଜନ୍ ପ୍ରାଇମ୍ ଏୟାରର ଏକ କାର୍ଗୋ ବିମାନ ରନୱେରୁ ବାହାରି ଦୁର୍ଘଟଣାଗ୍ରସ୍ତ ହେବା ପରେ ଭୟଙ୍କର ଅଗ୍ନିକାଣ୍ଡ ଘଟିଛି। ଏହି ଦୁର୍ଘଟଣାରେ ୫ ଜଣଙ୍କ ମୃତ୍ୟୁ ହୋଇଥିବା ଅଧିକାରୀମାନେ କହିଛନ୍ତି।

ଏହି ବୋଇଂ ୭୬୭-୩୦୦ ବିମାନଟି ୨୧ ଏୟାର ଦ୍ୱାରା ପରିଚାଳିତ ହେଉଥିଲା ଏବଂ ପ୍ରାଇମ୍ ଏୟାର ଫ୍ଲାଇଟ୍ ୭୫୯୮ ଭାବେ ଉଡ଼ାଣ କରୁଥିଲା। ବିମାନଟି ପ୍ୟୁର୍ଟୋ ରିକୋର ସାନ୍ ଜୁଆନ୍‌ରୁ ମିଆମି ଆସିଥିଲା।

ରବିବାର ପ୍ରାୟ ଦିନ ୨ଟା ET ସମୟରେ ବିମାନଟି ମିଆମି ବିମାନବନ୍ଦରର ଡାଏଗୋନାଲ୍ ରନୱେରେ ଲ୍ୟାଣ୍ଡିଂ କରୁଥିବା ବେଳେ ରନୱେ ଅତିକ୍ରମ କରି ବାହାରକୁ ଚାଲିଯାଇଥିଲା। ପରେ ଏହା ଏକାଧିକ ଯାନକୁ ଧକ୍କା ଦେଇଥିବା ଏବଂ ଅଗ୍ନିକାଣ୍ଡ ଘଟିଥିବା ଜଣାପଡ଼ିଛି। ଘଟଣା ପରେ ଆକାଶରେ ଘନ କଳା ଧୂଆଁ ଦେଖାଯାଇଥିଲା।

ଦୁର୍ଘଟଣା ପରେ ବିମାନବନ୍ଦରର ସମସ୍ତ ରନୱେ ଓ ଟ୍ୟାକ୍ସିୱେ ବନ୍ଦ କରାଯାଇଥିଲା। ଏଥିସହ ବିମାନ ଚଳାଚଳ ଉପରେ ମଧ୍ୟ ଅସ୍ଥାୟୀ ରୋକ୍ ଲଗାଯାଇଥିଲା।

ଘଟଣାସ୍ଥଳରେ ୬୦ରୁ ଅଧିକ ମିଆମି-ଡେଡ୍ ଫାୟାର ରେସ୍କ୍ୟୁ ୟୁନିଟ୍ ପହଞ୍ଚି ନିଆଁ ଲିଭାଇବା ସହ ପ୍ରଭାବିତ ଲୋକଙ୍କ ସ୍ଥିତି ଯାଞ୍ଚ କରିଥିଲେ।

ଫେଡେରାଲ୍ ଏଭିଏସନ୍ ଆଡମିନିଷ୍ଟ୍ରେସନ୍ (FAA) ଦୁର୍ଘଟଣାର ତଦନ୍ତ କରିବ ବୋଲି କହିଛି। ନ୍ୟାସନାଲ୍ ଟ୍ରାନ୍ସପୋର୍ଟେସନ୍ ସେଫ୍ଟି ବୋର୍ଡ (NTSB) ମଧ୍ୟ ଘଟଣା ସମ୍ପର୍କରେ ତଥ୍ୟ ସଂଗ୍ରହ କରୁଛି।

ଆମାଜନ୍‌ର ମୁଖପାତ୍ର କେଲି ନାଣ୍ଟେଲ୍ ନିଶ୍ଚିତ କରିଛନ୍ତି ଯେ ୨୧ ଏୟାର ଦ୍ୱାରା ପରିଚାଳିତ ଏକ ଆମାଜନ୍ ଏୟାର ବିମାନ ମିଆମି ଆନ୍ତର୍ଜାତୀୟ ବିମାନବନ୍ଦରରେ ଲ୍ୟାଣ୍ଡିଂ ସମୟରେ ଦୁର୍ଘଟଣାରେ ପଡ଼ିଛି।

ଆମାଜନ୍ ପକ୍ଷରୁ କୁହାଯାଇଛି ଯେ ଘଟଣା ସମ୍ପର୍କରେ ଅଧିକ ତଥ୍ୟ ସଂଗ୍ରହ କରାଯାଉଛି ଏବଂ ସ୍ଥାନୀୟ ପ୍ରଶାସନ ଓ ଅଧିକାରୀଙ୍କ ସହ କମ୍ପାନୀ ସମନ୍ୱୟ ରଖିଛି। ଘଟଣାରେ ପ୍ରଭାବିତ ସମସ୍ତଙ୍କ ସୁରକ୍ଷା, ସୁସ୍ଥତା ଓ ଯତ୍ନକୁ ସର୍ବାଧିକ ପ୍ରାଥମିକତା ଦିଆଯାଉଥିବା ଆମାଜନ୍ କହିଛି।