ରାଜଧାନୀ ଦିଲ୍ଲୀରେ ହୋଇଥିବା ହିଂସାତ୍ମକ ପ୍ରତିବାଦର ଗୋଟିଏ ଦିନ ପରେ କକ୍ରୋଚ୍ ଜନତା ପାର୍ଟି (ସିଜେପି)ର ନେତା ଅଭିଜିତ୍ ଦୀପକେ ତାଙ୍କ ଏକ୍ସ (X) ହ୍ୟାଣ୍ଡେଲରେ ଏକ ପୋଷ୍ଟ କରିଛନ୍ତି। ଏହି ପୋଷ୍ଟରେ ସେ ନିଜ ସମର୍ଥକମାନଙ୍କୁ କ୍ଷମା ପ୍ରାର୍ଥନା କରିଛନ୍ତି।

ଅଭିଜିତ୍ ଦୀପକେ କହିଛନ୍ତି ଯେ, ଆନ୍ଦୋଳନ ସମୟରେ ଯେଉଁ ଛାତ୍ରଛାତ୍ରୀ ଓ ପ୍ରତିବାଦକାରୀ ଆହତ ହୋଇଛନ୍ତି, ସେମାନଙ୍କ ପାଇଁ ସେ ଦୁଃଖିତ। ବିଶେଷକରି ମହିଳା ପ୍ରତିବାଦକାରୀଙ୍କ ସହ ଘଟିଥିବା ଘଟଣାକୁ ନେଇ ସେ ଚିନ୍ତା ପ୍ରକାଶ କରିଛନ୍ତି।

ସେ ନିଜ ପୋଷ୍ଟରେ ଲେଖିଛନ୍ତି ଯେ ଆନ୍ଦୋଳନକାରୀଙ୍କୁ ଆହୁରି ଭଲ ଭାବରେ ସୁରକ୍ଷା ଦିଆଯାଇପାରିଥାନ୍ତା। ସେ ଦିଲ୍ଲୀ ପୁଲିସର କାର୍ଯ୍ୟପ୍ରଣାଳୀକୁ ସମାଲୋଚନା କରିବା ସହ ସରକାର ଉପରେ ମଧ୍ୟ ଅଭିଯୋଗ ଲଗାଇଛନ୍ତି।

ସୋମବାର ହୋଇଥିବା ପ୍ରତିବାଦରେ ଅନେକ ଛାତ୍ରଛାତ୍ରୀ ଆହତ ହୋଇଥିବା ବେଳେ କିଛି ପୁଲିସ କର୍ମଚାରୀ ମଧ୍ୟ ଆହତ ହୋଇଥିବା ଜଣାପଡ଼ିଛି।

ଅଭିଜିତ୍ ଦୀପକେ ଆହତ ପ୍ରତିବାଦକାରୀଙ୍କୁ ତାଙ୍କ ସହ ସିଧାସଳଖ ଯୋଗାଯୋଗ କରିବାକୁ ଅପିଲ୍ କରିଛନ୍ତି। ସେ କହିଛନ୍ତି ଯେ ସେ ବ୍ୟକ୍ତିଗତ ଭାବେ ସେମାନଙ୍କ ସହ କଥା ହେବାକୁ ଚାହୁଁଛନ୍ତି।

ଏହି ଘଟଣା ପରେ ସେ ମଙ୍ଗଳବାର ମଧ୍ୟ ସଂସଦ ଅଭିମୁଖେ ପଦଯାତ୍ରା ଜାରି ରଖିବାକୁ ଘୋଷଣା କରିଛନ୍ତି। ପ୍ରତିବାଦକାରୀମାନେ ଜନ୍ତର ମନ୍ତରରେ ପୁଣି ଥରେ ତମ୍ବୁ ଓ ଅସ୍ଥାୟୀ ମଞ୍ଚ ସ୍ଥାପନ କରିଥିବା ସୂଚନା ମିଳିଛି।

ଏହି ମଧ୍ୟରେ ଦିଲ୍ଲୀ ପୁଲିସ ପଡ଼ୋଶୀ ରାଜ୍ୟଗୁଡ଼ିକର ପୁଲିସ ପ୍ରଶାସନକୁ ଚିଠି ଲେଖି ଜନ୍ତର ମନ୍ତରରେ ବଡ଼ ଭିଡ଼କୁ ନିୟନ୍ତ୍ରଣ କରିବା ପାଇଁ ସହଯୋଗ ମାଗିଛି।