ପଞ୍ଜାବରେ AAPକୁ ବଡ଼ ଝଟକା, BJPରେ ମିଶିଲେ ୩ ବିଧାୟକ

ନୂଆଦିଲ୍ଲୀ: ପଞ୍ଜାବ ରାଜନୀତିରେ ଏକ ବଡ଼ ରାଜନୈତିକ ହଲଚଲ ଦେଖିବାକୁ ମିଳିଛି। ଆମ୍ ଆଦମୀ ପାର୍ଟି (AAP)ର ୩ ଜଣ ବିଧାୟକ ବିଧାୟକ ପଦରୁ ଇସ୍ତଫା ଦେବାର ଗୋଟିଏ ଦିନ ପରେ ବିଜେପିରେ ସାମିଲ ହୋଇଛନ୍ତି। ସୋମବାର ନୂଆଦିଲ୍ଲୀରେ ସେମାନେ ଆନୁଷ୍ଠାନିକ ଭାବେ ବିଜେପିର ସଦସ୍ୟତା ଗ୍ରହଣ କରିଛନ୍ତି। ଏହି ଘଟଣା ପଞ୍ଜାବରେ AAP ପାଇଁ ଏକ ବଡ଼ ରାଜନୈତିକ ଝଟକା ବୋଲି ଚର୍ଚ୍ଚା ହେଉଛି।

ଆଗାମୀ ନିର୍ବାଚନକୁ ଦୃଷ୍ଟିରେ ରଖି ପଞ୍ଜାବରେ ନିଜର ରାଜନୈତିକ ସ୍ଥିତି ମଜବୁତ କରିବାକୁ ବିଜେପି ଜୋରଦାର ଉଦ୍ୟମ କରୁଛି। ଏଭଳି ସମୟରେ ଆପ୍‌ର ତିନି ଜଣ ନେତାଙ୍କ ବିଜେପିରେ ଯୋଗଦାନ ଦଳ ପାଇଁ ଏକ ଗୁରୁତ୍ୱପୂର୍ଣ୍ଣ ରାଜନୈତିକ ସଫଳତା ଭାବେ ଦେଖାଯାଉଛି।

କିଏ ଏହି ୩ ଜଣ ନେତା?

ବିଜେପିରେ ସାମିଲ ହୋଇଥିବା ତିନି ଜଣ ନେତା ହେଲେ:

1. ଚେତନ ସିଂହ ଜୌରାମାଜରା: ସମାନା ନିର୍ବାଚନମଣ୍ଡଳୀରୁ ନିର୍ବାଚିତ ହୋଇଥିବା ପୂର୍ବତନ କ୍ୟାବିନେଟ୍ ମନ୍ତ୍ରୀ।

2. କୁଁୱର ବିଜୟ ପ୍ରତାପ ସିଂହ: ପୂର୍ବତନ IPS ଅଧିକାରୀ ଏବଂ ଅମୃତସର ଉତ୍ତର ନିର୍ବାଚନମଣ୍ଡଳୀର ପୂର୍ବତନ ବିଧାୟକ।

3. ହରମୀତ ସିଂହ ପଠାନମାଜରା: ସନୌର ନିର୍ବାଚନମଣ୍ଡଳୀର ପୂର୍ବତନ ବିଧାୟକ।

ବିଜେପିରେ ଯୋଗଦେବା ପରେ ଏହି ତିନି ନେତା ପଞ୍ଜାବରେ ବଢ଼ୁଥିବା ଗ୍ୟାଙ୍ଗଷ୍ଟର୍‌ଙ୍କ ଆତଙ୍କ ଓ ନିଶାଦ୍ରବ୍ୟ ସମସ୍ୟାକୁ ନେଇ ଚିନ୍ତା ପ୍ରକାଶ କରିଥିଲେ। ଏହି ସମସ୍ୟାଗୁଡ଼ିକର ସମାଧାନ କରିବାରେ ବିଜେପି ସକ୍ଷମ ହେବ ବୋଲି ସେମାନେ ଆଶା ପ୍ରକାଶ କରିଛନ୍ତି।

AAP ଓ ଭଗୱନ୍ତ ମାନ୍‌ଙ୍କୁ ଟାର୍ଗେଟ୍

ବିଜେପିରେ ଯୋଗଦେବା ପରେ ପୂର୍ବତନ IPS ଅଧିକାରୀ କୁଁୱର ବିଜୟ ପ୍ରତାପ ସିଂହ ପଞ୍ଜାବର ଆଇନଶୃଙ୍ଖଳା ପରିସ୍ଥିତିକୁ ନେଇ ଆପ୍ ସରକାରଙ୍କୁ ଟାର୍ଗେଟ୍ କରିଥିଲେ।

ସେ କହିଥିଲେ ଯେ ପଞ୍ଜାବରେ ଅପରାଧ, ନିଶାଦ୍ରବ୍ୟ, ଦୁର୍ନୀତି ଓ ଗ୍ୟାଙ୍ଗଷ୍ଟର୍‌ଙ୍କ ଆତଙ୍କ ବ୍ୟାପକ ଭାବେ ବଢ଼ିଛି। ଭଗୱନ୍ତ ମାନ୍ ଓ ଅରବିନ୍ଦ କେଜ୍ରିୱାଲ୍ ଆମ୍ ଆଦମୀ ପାର୍ଟିକୁ ସମ୍ପୂର୍ଣ୍ଣ ଭାବେ ଦୁର୍ବଳ ଓ ନଷ୍ଟ କରିଦେଇଛନ୍ତି ବୋଲି ସେ ଅଭିଯୋଗ କରିଥିଲେ।

ତାଙ୍କ କହିବା ଅନୁସାରେ, ଏକ ବିପ୍ଳବୀ ଚିନ୍ତାଧାରାକୁ ନେଇ ଗଠିତ ହୋଇଥିବା ଆମ୍ ଆଦମୀ ପାର୍ଟି ଏବେ ନିଜର ମୂଳ ଲକ୍ଷ୍ୟରୁ ଦୂରେଇ ଯାଇଛି।

ପଞ୍ଜାବରେ ଆଗାମୀ ନିର୍ବାଚନ ପୂର୍ବରୁ ଏହି ଦଳବଦଳ ରାଜ୍ୟର ରାଜନୈତିକ ସମୀକରଣକୁ କେତେ ପ୍ରଭାବିତ କରିବ, ତାହା ଉପରେ ଏବେ ସମସ୍ତଙ୍କ ନଜର ରହିଛି।