ମହିଳା ସଂରକ୍ଷଣ ସହିତ ସମ୍ପୃକ୍ତ ତିନୋଟି ବିଲ୍ ଉପରେ ସଂସଦରେ ଗୁରୁବାର ରାତି ୧ଟା ପର୍ଯ୍ୟନ୍ତ ତିବ୍ର ଆଲୋଚନା ହୋଇଥିଲା। ଏହା ପରେ କେନ୍ଦ୍ର ସରକାର ମଧ୍ୟରାତିରେ ମହିଳା ସଂରକ୍ଷଣ ଆଇନ ୨୦୨୩ କାର୍ଯ୍ୟକାରୀ କରିବାକୁ ବିଜ୍ଞପ୍ତି ଜାରି କରିଥିଲେ।

ଏହି ଆଇନ ଅନୁଯାୟୀ, ସଂସଦ ଏବଂ ରାଜ୍ୟ ବିଧାନସଭାରେ ମହିଳାଙ୍କ ପାଇଁ ୩୩ ପ୍ରତିଶତ ଆସନ ସଂରକ୍ଷଣ ବ୍ୟବସ୍ଥା ରହିଛି, ଯାହା ୧୬ ଏପ୍ରିଲ ୨୦୨୬ ଠାରୁ ଲାଗୁ ହୋଇଛି।

ତଥାପି, ଏହି ସଂରକ୍ଷଣ ବ୍ୟବସ୍ଥା ତୁରନ୍ତ ପ୍ରଭାବୀ ହେବ ନାହିଁ। ଅଧିକାରୀମାନଙ୍କ କହିବା ଅନୁଯାୟୀ, ପରବର୍ତ୍ତୀ ଜନଗଣନା ଏବଂ ସୀମାନିର୍ଦ୍ଧାରଣ ପ୍ରକ୍ରିୟା ସମାପ୍ତ ହେବା ପରେ ଏହା ପୂର୍ଣ୍ଣ ରୂପେ କାର୍ଯ୍ୟକାରୀ ହେବ।

ସଂସଦରେ ଏହି ବିଲ୍ ଉପରେ ହୋଇଥିବା ବିତର୍କ ସମୟରେ ୧୬ ଏପ୍ରିଲରୁ ଏହାକୁ କାହିଁକି ଲାଗୁ କରାଗଲା ସେଥିରେ କିଛି ଅସ୍ପଷ୍ଟତା ରହିଥିଲା। ଏକ ଅଧିକାରୀ କହିଛନ୍ତି ଯେ ଏହା ପ୍ରାୟୋଗିକ କାରଣରୁ କରାଯାଇଛି।

ସମ୍ବିଧାନ (୧୦୬ତମ ସଂଶୋଧନ) ଆଇନ, ୨୦୨୩ ଅନୁଯାୟୀ ଏହି ବ୍ୟବସ୍ଥା ଲାଗୁ ହୋଇଛି। ୨୦୨୩ ସେପ୍ଟେମ୍ବରରେ ପାରିତ ‘ନାରୀ ଶକ୍ତି ବନ୍ଦନା ଆଇନ’ ଅନୁଯାୟୀ ମହିଳାଙ୍କୁ ଏକ-ତୃତୀୟାଂଶ ଆସନ ସଂରକ୍ଷଣ ଦେବାକୁ ବ୍ୟବସ୍ଥା କରାଯାଇଛି।

ଏହା ମଧ୍ୟ ସ୍ପଷ୍ଟ କରାଯାଇଛି ଯେ, ୨୦୨୭ ଜନଗଣନା ପରେ ସୀମାନିର୍ଦ୍ଧାରଣ ହେବା ପରେ ଏହି ସଂରକ୍ଷଣ ପ୍ରକୃତରେ କାର୍ଯ୍ୟକାରୀ ହେବ। ଏହାକୁ ୨୦୨୯ ଠାରୁ ପୂର୍ଣ୍ଣ ଭାବେ ଲାଗୁ କରିବା ଲକ୍ଷ୍ୟ ରହିଛି।