୨୦୨୩ ମସିହାରେ ମୁକ୍ତିଲାଭ କରିଥିବା 'OMG 2' ବକ୍ସ ଅଫିସରେ ସଫଳତା ସହ ସମାଲୋଚକଙ୍କ ପ୍ରଶଂସା ମଧ୍ୟ ପାଇଥିଲା। ପଙ୍କଜ ତ୍ରିପାଠୀ ଓ ଅକ୍ଷୟ କୁମାରଙ୍କ ଅଭିନୀତ ଏହି ଫିଲ୍ମରେ ପ୍ରଥମ ଭାଗର ମୁଖ୍ୟ ଚରିତ୍ର ପରେଶ ରାୱଲଙ୍କ ଅନୁପସ୍ଥିତିକୁ ନେଇ ପ୍ରଶଂସକଙ୍କ ମନରେ ପ୍ରଶ୍ନ ଉଠିଥିଲା।

ନିକଟରେ ଏକ ସାକ୍ଷାତକାରରେ ପରେଶ ରାୱଲ କହିଛନ୍ତି ଯେ, 'OMG 2'ର ମୂଳ କାହାଣୀ ତାଙ୍କର ଏକ ଧାରଣାରୁ ସୃଷ୍ଟି ହୋଇଥିଲା। ସେ ନିର୍ଦ୍ଦେଶକ ଅମିତ ରାୟଙ୍କ ସହ ମିଶି କାହାଣୀର ପ୍ରାରମ୍ଭିକ ରୂପରେଖ ପ୍ରସ୍ତୁତ କରିଥିଲେ। ତେବେ ସେ ନିଜକୁ କାହାଣୀକାର ନୁହେଁ ବରଂ କାହାଣୀକୁ ସଠିକ୍ ଦିଗ ଦେଖାଇଥିବା ଜଣେ ସହଯୋଗୀ ବୋଲି ବର୍ଣ୍ଣନା କରିଛନ୍ତି।

ପରେଶଙ୍କ କହିବା ଅନୁଯାୟୀ, ମୂଳ କାହାଣୀ ଜଣେ କିଶୋରକୁ କେନ୍ଦ୍ର କରି ରଚନା କରାଯାଇଥିଲା, ଯାହାର ଏକ ବ୍ୟକ୍ତିଗତ ଭିଡିଓ ଭାଇରାଲ ହେବା ପରେ ତା'ର ଜୀବନରେ ଝଡ଼ ଆସିଥିଲା। ସେହି କାହାଣୀରେ କିଶୋରର ବାପା ଖଜୁରାହୋ ମନ୍ଦିରର ଜଣେ ଟୁରିଷ୍ଟ ଗାଇଡ୍ ଥିଲେ। ପରେ ଏହି ଚରିତ୍ରକୁ ମହାକାଳ ମନ୍ଦିରର ଜଣେ ପାର୍ଟ ଟାଇମ୍ ପୂଜକ ଭାବେ ପରିବର୍ତ୍ତନ କରାଯାଇଥିଲା।

କାହାଣୀ ଲେଖିବା ସମୟରେ ଖ୍ୟାତନାମା ସେକ୍ସୋଲୋଜିଷ୍ଟ ଡାକ୍ତର ପ୍ରକାଶ କୋଠାରୀଙ୍କ ପରାମର୍ଶ ମଧ୍ୟ ନିଆଯାଇଥିଲା। ଫିଲ୍ମଟିକୁ ଅନୁରାଗ କଶ୍ୟପ, ସୋମେନ ମିଶ୍ରଙ୍କ ସମେତ ବଲିଉଡର ଅନେକ ବ୍ୟକ୍ତିତ୍ୱଙ୍କ ନିକଟରେ ଉପସ୍ଥାପନ କରାଯାଇଥିଲା। ତେବେ ପ୍ରାରମ୍ଭିକ ପର୍ଯ୍ୟାୟରେ ଏହି କାହାଣୀକୁ ସମର୍ଥନ ମିଳିନଥିଲା।

ପରେଶ ରାୱଲ କହିଛନ୍ତି ଯେ, ତାଙ୍କ କାହାଣୀରେ କୌଣସି ଦୈବୀ ଚରିତ୍ର ନଥିଲା। ସେ ଜଣେ ବାଇକରଙ୍କ ଚରିତ୍ର କଳ୍ପନା କରିଥିଲେ, ଯିଏ କିଶୋରର ବାପାଙ୍କୁ ସମସ୍ୟାରୁ ବାହାରିବାରେ ସାହାଯ୍ୟ କରିଥାନ୍ତେ। ଏହି ଚରିତ୍ର ପାଇଁ ସେ ଅଜୟ ଦେବଗନ ଓ ସଲମାନ ଖାନଙ୍କ ସହ ମଧ୍ୟ ଆଲୋଚନା କରିଥିଲେ। ସେ ଇଚ୍ଛାକୃତ ଭାବେ ଅକ୍ଷୟ କୁମାରଙ୍କୁ ଏହି ପ୍ରକଳ୍ପରୁ ଦୂରେ ରଖିଥିଲେ, ଯାହାଦ୍ୱାରା ଏହାକୁ 'OMG'ର ସିକ୍ୱେଲ ବୋଲି ବିଚାର କରାନଯାଉ।

ତେବେ ପରବର୍ତ୍ତୀ ସମୟରେ ଅକ୍ଷୟ କୁମାର ଏହି ପ୍ରକଳ୍ପ ପ୍ରତି ଆଗ୍ରହ ଦେଖାଇଥିଲେ ଏବଂ ଫିଲ୍ମକୁ 'OMG 2' ନାମରେ ନିର୍ମାଣ କରିବାକୁ ନିଷ୍ପତ୍ତି ହୋଇଥିଲା। ଏହି ପରିବର୍ତ୍ତନକୁ ପରେଶ ରାୱଲ ବିରୋଧ କରିଥିଲେ। ଏପରିକି ଅକ୍ଷୟ କୁମାର ତାଙ୍କୁ ଫିଲ୍ମରେ ଅଭିନୟ କରିବାକୁ ଅନୁରୋଧ କରିଥିଲେ ମଧ୍ୟ ସେ ମନା କରିଦେଇଥିଲେ।

ପରେଶ କହିଛନ୍ତି, "ଏହା ସେହି ଫିଲ୍ମ ନୁହେଁ, ଯାହାକୁ ମୁଁ କଳ୍ପନା କରିଥିଲି। ଏହି କାହାଣୀରେ ଈଶ୍ୱରଙ୍କ କୌଣସି ଭୂମିକା ନଥିଲା। ମୁଁ ଆରମ୍ଭରୁ କାହାଣୀ ସହ ଜଡ଼ିତ ଥିଲି ଏବଂ ଜାଣିଥିଲି ଏହା କିପରି ହେବା କଥା। ସେଥିପାଇଁ ମୁଁ ଫିଲ୍ମରୁ ଦୂରେଇ ଯାଇଥିଲି।"

ସେ ଆହୁରି କହିଛନ୍ତି ଯେ, ଫିଲ୍ମର କାହାଣୀ ଓ ଧାରଣା ପାଇଁ ତାଙ୍କୁ କୌଣସି ଅଧିକୃତ ଶ୍ରେୟ ଦିଆଯାଇନଥିଲା। ତାଙ୍କ ମତରେ, ଏହି ପ୍ରକଳ୍ପ ସହ ଜଡ଼ିତ ସମସ୍ତ ପ୍ରମୁଖ ବ୍ୟକ୍ତି ଜାଣିଥିଲେ ଯେ ଏହା ତାଙ୍କର ଧାରଣା ଥିଲା।