ସଂସଦର ମୌସୁମୀ ଅଧିବେଶନର ପ୍ରଥମ ସପ୍ତାହ ହଟ୍ଟଗୋଳ ମଧ୍ୟରେ କଟିଛି। ଶୁକ୍ରବାର ମଧ୍ୟ ଲୋକସଭା ଓ ରାଜ୍ୟସଭାରେ ବିରୋଧୀ ଦଳର ଜୋରଦାର ପ୍ରତିବାଦ ଯୋଗୁଁ ଗୃହ କାର୍ଯ୍ୟ ସ୍ୱାଭାବିକ ଭାବେ ଚାଲିପାରିନଥିଲା। ହଟ୍ଟଗୋଳ ମଧ୍ୟରେ କେନ୍ଦ୍ର ସରକାର ‘ଜାତୀୟ ସମ୍ମାନର ଅପମାନ ନିବାରଣ (ସଂଶୋଧନ) ବିଲ୍-୨୦୨୬’ ଆଗତ କରିଛନ୍ତି।

ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ରାଜ୍ୟସଭାରେ ଏହି ବିଲ୍ ଉପସ୍ଥାପନ କରିଥିଲେ। ପ୍ରସ୍ତାବିତ ବିଲ୍‌ରେ ଜାତୀୟ ଗୀତ **‘ବନ୍ଦେ ମାତରମ୍’**କୁ ଜାତୀୟ ସଙ୍ଗୀତ ଓ ଜାତୀୟ ପତାକା ଭଳି ଆଇନଗତ ସୁରକ୍ଷା ଦେବାର ବ୍ୟବସ୍ଥା ରହିଛି।

ବିଲ୍‌ଟି ସଂସଦରେ ପାରିତ ହୋଇ ଆଇନରେ ପରିଣତ ହେଲେ, ‘ବନ୍ଦେ ମାତରମ୍’ ଗାନକୁ ଅସମ୍ମାନ କରିବା, ଗୀତ ଗାଇବାରେ ବାଧା ସୃଷ୍ଟି କରିବା କିମ୍ବା ଅପମାନଜନକ ବ୍ୟବହାର କରିବା ମାମଲାରେ ସର୍ବାଧିକ ୩ ବର୍ଷ ଜେଲ୍, ଜରିମାନା କିମ୍ବା ଉଭୟ ଦଣ୍ଡ ହୋଇପାରିବ।

କେନ୍ଦ୍ର ସରକାର କହିଛନ୍ତି ଯେ, ଜାତୀୟ ଗୀତ ପ୍ରତି ସମ୍ମାନ ବଜାୟ ରଖିବା ଏବଂ ଜାତୀୟ ଭାବନାକୁ ସୁଦୃଢ଼ କରିବା ପାଇଁ ଏହି ସଂଶୋଧନ ଆଣାଯାଇଛି। ଅନ୍ୟପଟେ ବାମପନ୍ଥୀ ଦଳ ସମେତ ବିରୋଧୀ ଦଳଗୁଡ଼ିକ ଏହି ବିଲ୍‌କୁ ବିରୋଧ କରି ଗୃହରେ ହଟ୍ଟଗୋଳ କରିଥିଲେ।

ଶୁକ୍ରବାର ସକାଳ ୧୧ଟାରେ ରାଜ୍ୟସଭାର କାର୍ଯ୍ୟ ଆରମ୍ଭ ହେବା ପରେ ବିରୋଧୀଙ୍କ ପ୍ରତିବାଦ ଯୋଗୁଁ ଗୃହକୁ ପ୍ରଥମେ ଦୁପୁର ୧୨ଟା ପର୍ଯ୍ୟନ୍ତ ମୁଲତବି କରାଯାଇଥିଲା। ପରେ ପୁଣି ଦୁଇଟା ପର୍ଯ୍ୟନ୍ତ ମୁଲତବି ହୋଇଥିଲା। ଅପରାହ୍ନରେ ପୁଣି କାର୍ଯ୍ୟ ଆରମ୍ଭ ହେଲେ ମଧ୍ୟ ହଟ୍ଟଗୋଳ ଜାରି ରହିଥିଲା। ଏହି ପରିସ୍ଥିତି ମଧ୍ୟରେ ବିଲ୍‌ଟି ଆଗତ କରାଯାଇଥିଲା।

ବର୍ତ୍ତମାନ ବିଲ୍‌ଟି ଉପରେ ସଂସଦରେ ଆଲୋଚନା ଓ ଅନୁମୋଦନ ପ୍ରକ୍ରିୟାକୁ ସମସ୍ତଙ୍କ ନଜର ରହିଛି।