ଚଳିତ ଫିଫା ବିଶ୍ୱକପ୍ରେ ସହଆୟୋଜକ ଆମେରିକା ଦମଦାର ପ୍ରଦର୍ଶନ ଜାରି ରଖି ବୋସନିଆ ଓ ହର୍ଜେଗୋଭିନାକୁ ୨-୦ ଗୋଲ୍ରେ ପରାସ୍ତ କରି ପ୍ରିକ୍ୱାର୍ଟରଫାଇନାଲ୍ରେ ସ୍ଥାନ ସୁନିଶ୍ଚିତ କରିଛି। ସାନ୍ ଫ୍ରାନ୍ସିସ୍କୋ ବେ ଏରିଆ ଷ୍ଟାଡିୟମ୍ରେ ଖେଳାଯାଇଥିବା ଏହି ରାଉଣ୍ଡ-୩୨ ମୁକାବିଲାରେ ଆମେରିକା ଆରମ୍ଭରୁ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲା।

ପ୍ରଥମାର୍ଦ୍ଧର ଶେଷ ମୁହୂର୍ତ୍ତରେ ଫୋଲାରିନ୍ ବାଲୋଗନ୍ ଗୋଲ୍ କରି ଆମେରିକାକୁ ୧-୦ରେ ଆଗୁଆ କରିଥିଲେ। ତେବେ ଦ୍ୱିତୀୟାର୍ଦ୍ଧର ୬୪ତମ ମିନିଟ୍ରେ ବୋସନିଆର ତାରିକ ମୁହାରେମୋଭିକ୍ଙ୍କୁ ବିପଦଜନକ ଫାଉଲ୍ କରିବାରୁ ବାଲୋଗନ୍ ରେଡ୍ କାର୍ଡ ପାଇ ପଡ଼ିଆ ଛାଡ଼ିଥିଲେ। ଏହା ପରେ ଆମେରିକାକୁ ୧୦ ଜଣ ଖେଳାଳିଙ୍କ ସହ ମ୍ୟାଚ୍ ଖେଳିବାକୁ ପଡ଼ିଥିଲା।

ଫିଫା ବିଶ୍ୱକପ୍ରେ ଗୋଲ୍ କରିବା ପରେ ରେଡ୍ କାର୍ଡ ପାଇବାରେ ବାଲୋଗନ୍ ୨୦୦୬ରେ ଜିନେଡିନ୍ ଜିଡାନଙ୍କ ପରେ ପ୍ରଥମ ଖେଳାଳି ହୋଇଛନ୍ତି।

ଜଣେ ଖେଳାଳି କମ୍ ଥିବାର ସୁଯୋଗ ନେବାକୁ ବୋସନିଆ ବହୁ ଚେଷ୍ଟା କରିଥିଲେ ମଧ୍ୟ ଆମେରିକାର ଦୃଢ଼ ରକ୍ଷଣଭାଗ ସାମ୍ନାରେ ସଫଳ ହୋଇପାରିନଥିଲା। ୮୨ତମ ମିନିଟ୍ରେ ମିଳିଥିବା ଫ୍ରି କିକ୍କୁ ମଲିକ ଟିଲମାନ ଚମତ୍କାର ଭାବେ ଗୋଲ୍ରେ ପରିଣତ କରି ଆମେରିକାର ବିଜୟକୁ ସୁନିଶ୍ଚିତ କରିଥିଲେ।

ଏହି ବିଜୟ ସହ ଆମେରିକା ୨୦୦୨ ପରେ ପ୍ରଥମ ଥର ପାଇଁ ଫିଫା ବିଶ୍ୱକପ୍ ନକ୍ଆଉଟ୍ ପର୍ଯ୍ୟାୟରେ ବିଜୟ ହାସଲ କରିଛି। ପ୍ରିକ୍ୱାର୍ଟରଫାଇନାଲ୍ରେ ଆମେରିକା ବେଲଜିୟମ୍କୁ ଭେଟିବ।