ୱାଶିଂଟନ୍: ଇରାନ ସହ ଚାଲିଥିବା ଯୁଦ୍ଧ ସମ୍ପର୍କିତ ଆମେରିକୀୟ ସାମରିକ ବ୍ୟବସ୍ଥା ଓ ଅସ୍ତ୍ର ମଜୁତ ନେଇ ସମ୍ବେଦନଶୀଳ ତଥ୍ୟ ଗଣମାଧ୍ୟମକୁ ଲିକ୍ ହେବା ଘଟଣାକୁ ନେଇ ତଦନ୍ତ ତୀବ୍ର ହୋଇଛି। ଏହି ମାମଲାରେ ଆମେରିକାର ଯୁକ୍ତ ସାମରିକ ମୁଖ୍ୟାଳୟ (Joint Staff)ର ପ୍ରାୟ ୫୦ ଜଣ ଉଚ୍ଚପଦସ୍ଥ ସାମରିକ ଅଧିକାରୀ ଓ ସିଭିଲିଆନ୍ କର୍ମଚାରୀଙ୍କୁ ପଲିଗ୍ରାଫ୍ ପରୀକ୍ଷା କରାଯାଇଥିବା ଏକ ରିପୋର୍ଟରେ କୁହାଯାଇଛି।

ଦି ନ୍ୟୁୟର୍କ ଟାଇମ୍ସର ରିପୋର୍ଟ ଅନୁସାରେ, ଅଗଷ୍ଟ ମାସରେ ଏହି ପଲିଗ୍ରାଫ୍ ପରୀକ୍ଷା ହୋଇଥିଲା। ସାମରିକ ଓ ସିଭିଲିଆନ୍ କର୍ମଚାରୀମାନେ ସାମ୍ବାଦିକଙ୍କୁ ଗୋପନୀୟ ସୂଚନା ଲିକ୍ କରିଛନ୍ତି କି ନାହିଁ, ସେନେଇ ସେମାନଙ୍କୁ ପ୍ରଶ୍ନ କରାଯାଇଥିବା ଜଣାପଡ଼ିଛି।

ରିପୋର୍ଟ ଅନୁସାରେ, ଏହି ପରୀକ୍ଷାର ମୁଖ୍ୟ ଉଦ୍ଦେଶ୍ୟ ଥିଲା ସମ୍ବେଦନଶୀଳ ତଥ୍ୟ କିଏ ଗଣମାଧ୍ୟମକୁ ଦେଇଛି ତାହା ଚିହ୍ନଟ କରିବା। ଏଥିସହ ଭବିଷ୍ୟତରେ ଏଭଳି ତଥ୍ୟ ଲିକ୍ ନକରିବା ପାଇଁ ଅନ୍ୟମାନଙ୍କ ମଧ୍ୟରେ ଭୟ ସୃଷ୍ଟି କରିବା ଏହାର ଆଉ ଏକ ଉଦ୍ଦେଶ୍ୟ ଥିବା ରିପୋର୍ଟରେ ଦାବି କରାଯାଇଛି।

ଏହି ତଦନ୍ତ ପଛରେ ଇରାନ ଯୁଦ୍ଧ ସମୟରେ ଆମେରିକାର ଅସ୍ତ୍ର ମଜୁତ ସମ୍ପର୍କିତ ଅନେକ ରିପୋର୍ଟ ମଧ୍ୟ ରହିଛି। ବିଶେଷକରି ଦୀର୍ଘପଥ କ୍ଷେପଣାସ୍ତ୍ର ଓ ପାଟ୍ରିଅଟ୍ ଇଣ୍ଟରସେପ୍ଟର୍‌ର ମଜୁତ କମିଥିବା ନେଇ ଖବର ପ୍ରକାଶ ପାଇଥିଲା।

ତେବେ ଆମେରିକାର ପେଣ୍ଟାଗନ୍ ଏହି ଘଟଣା ସମ୍ପର୍କରେ ସିଧାସଳଖ କୌଣସି ମତ ଦେଇନାହିଁ। ପେଣ୍ଟାଗନ୍ ପ୍ରବକ୍ତା ସିନ୍ ପାର୍ନେଲ୍ କହିଛନ୍ତି ଯେ ବିଭାଗ ଆଭ୍ୟନ୍ତରୀଣ କର୍ମଚାରୀ କିମ୍ବା ତଦନ୍ତ ସମ୍ପର୍କିତ ବିଷୟରେ ମନ୍ତବ୍ୟ କରେ ନାହିଁ। କିନ୍ତୁ ଜାତୀୟ ସୁରକ୍ଷା ସମ୍ପର୍କିତ ଗୋପନୀୟ ତଥ୍ୟ ଲିକ୍‌କୁ ଅତ୍ୟନ୍ତ ଗମ୍ଭୀରତାର ସହ ନିଆଯାଏ ଏବଂ ଏହାର ତଦନ୍ତ କରାଯାଏ ବୋଲି ସେ କହିଛନ୍ତି।

ପେଣ୍ଟାଗନ୍‌ରେ ସାମ୍ବାଦିକଙ୍କ ପ୍ରବେଶ ନେଇ ମଧ୍ୟ କଟକଣା

ରିପୋର୍ଟ ଅନୁସାରେ, ମେ’ ୫ ତାରିଖଠାରୁ ଆମେରିକାର ପ୍ରତିରକ୍ଷା ସଚିବ ପିଟ୍ ହେଗସେଥ୍ ଇରାନ ଯୁଦ୍ଧ ନେଇ କୌଣସି ପ୍ରେସ୍ ବ୍ରିଫିଂ କରିନାହାନ୍ତି। ଏହାସହ ପେଣ୍ଟାଗନ୍‌ରେ ସାମ୍ବାଦିକମାନଙ୍କ ପ୍ରବେଶକୁ ମଧ୍ୟ ସୀମିତ କରାଯାଇଥିବା ଖବର ରହିଛି।

ଏହି ସମୟରେ ଆମେରିକାର ଅସ୍ତ୍ର ମଜୁତକୁ ନେଇ ପ୍ରକାଶିତ ଖବର ଉପରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ତୀବ୍ର ପ୍ରତିକ୍ରିୟା ଦେଇଛନ୍ତି। ଆମେରିକାର ଅସ୍ତ୍ର ମଜୁତ କମିଯାଉଛି ବୋଲି ଯେଉଁ ଦାବି ହେଉଛି, ଟ୍ରମ୍ପ ତାହାକୁ ଖଣ୍ଡନ କରିଛନ୍ତି।

ଟ୍ରମ୍ପଙ୍କ ଦାବି ଅନୁସାରେ, ଆମେରିକା ପାଖରେ ପ୍ରଚୁର ପରିମାଣର ଅସ୍ତ୍ର ଓ ଗୋଳାବାରୁଦ ରହିଛି ଏବଂ ଦେଶ ନିଜର ଆବଶ୍ୟକତା ପାଇଁ ଅସ୍ତ୍ର ମଜୁତ କରୁଛି। ଆଗାମୀ ସମସ୍ତ ପରିସ୍ଥିତି ପାଇଁ ପ୍ରସ୍ତୁତି ଚାଲିଥିବା ମଧ୍ୟ ସେ କହିଛନ୍ତି।